ආණ්ඩු පක්ෂ අධීක්ෂණ මන්ත්‍රීවරුන් සඳහා කුලී පදනම මත වාහන ලබා ගැනීම සඳහා ලැබී ඇති කැබිනට් අනුමැතියට එරෙහිව කටයුතු කරන ජනමාධ්‍ය හා පාර්ලිමේන්තු ප්‍රතිසංස්කරණ අමාත්‍යාංශයේ ලේකම් එම ධුරයෙන් ඉවත් කරන්නැයි ඉල්ලා ජනාධිපති මෛත්‍රිපාල සිරිසේන සහ අගමැති රනිල් වික්‍රමසිංහ හට ලිපියක් භාර දීමට එම මන්ත්‍රිවරුන් ක්‍රියා කරමින් සිටින බව වාර්තා වේ.
එම ලිපියට ආණ්ඩුවේ පසුපෙළ මන්ත්‍රිවරුන් 58 දෙනෙකු අත්සන් කිරීමට නියමිත අතර අමාත්‍ය මණ්ඩල තීරණයක් බල ගන්වන ලෙස විෂය භාර අමාත්‍යවරයාට දැනුම් දුන් විට ඒ අනුව ක්‍රියා කිරීමට ලේකම්වරයා බැඳී සිටිතැයි මේ මන්ත්‍රීවරු පෙන්වා දෙති.
ජාතික රජයේ ක්‍රමවේදයන් අවස්ථා කිහිපයකදීම අභියෝගයට ලක් කළ ජනමාධ්‍ය හා පාර්ලිමේන්තු ප්‍රතිසංස්කරණ අමාත්‍යාංශයේ ලේකම් නිමල් බෝපගේ තවදුරටත් ධූරයේ තබා නොගන්නා ලෙසද ආණ්ඩු පක්ෂ මන්ත්‍රිවරු ජනාධිපතිවරයාගෙන් සහ අගමැතිවරයාගෙන් ඉල්ලා සිටී.
කුලී පදනම මත ලබා ගන්නා වාහන රජයට අයිතිවීමේ ක්‍රමවේදයක් සකස් කර තිබියදී මෙලෙස අමාත්‍යාංශ ලේකම්වරයා වාහන ගැනීම වළක්වන්නේ බවයි මන්ත්‍රීවරුන් පෙන්වා දෙන්නේ.
මේ අතර පසුගිය දිනක මාධ්‍ය හමුවක් කැඳවු ජනමාධ්‍ය හා පාර්ලිමේන්තු ප්‍රතිසංස්කරණ අමාත්‍යාංශයේ ලේකම් නිමල් බෝපගේ කියා සිටියේ කුලී පදනම යටතේ වාහන ලබාදීම සඳහා ඉදිරිපත් කර ඇති කැබිනට් පත්‍රිකාවට අත්සන් නොතැබීමට ගත් තීන්දුවේ තවදුරටත් රැඳී සිටින බවයි.
වත්මන් තාක්ෂණ ඇගයීම් කමිටුව සහ ප්‍රසම්පාදන කමිටුවත් ප්‍රතික්‍ෂේප කර ඇති යෝජනාව ජනාධිපතිවරයා විසින් ද ප්‍රතික්‍ෂේප කරනු ලැබ ඇති බව කී ලේකම්වරයා කුලී පදනම යටතේ වාහන ලබා ගැනීමට අගමැතිවරයාට අවශ්‍යතාවක් ඇතැයි තමන් විශ්වාස නොකරන බවද කියා සිටියේය.
Facebook Comments
