දොස්තරලාට ලොකු හැන්දෙන් බෙදීමට විරුද්ධව සුව සේවයේ සටනක්

0

සෞඛ්‍ය කාර්ය මණ්ඩලයේ දීමනා වැඩිකිරීම පිළිබඳව දෙබිඩි පිළිවෙතක් අනුගමනය කරමින් වෛද්‍ය කාර්ය මණ්ඩලයට පමණක් අමතර සේවා දීමනාව ලබාදීමට එරෙහිව වසංගත මර්දනයේ නිරත සුව විරු නායකත්වය වෘත්තීය ක්‍රියාමාර්ගයකට එළඹ තිබේ.

අනුබද්ධ වෘත්තීය සමිති,ශාඛා සංවිධාන ප්‍රධානීන්,විධායක සභිකයන් මගින්,පරිපූරක වෛද්‍ය සේවාවේ සමස්ත සමාජිකත්වය වෙත පරිපූරක වෛද්‍ය වෘත්තීයවේදීන්ගේ ඒකාබද්ධ බලමණ්ඩලයේ සභාපති දැනුම් දී ඇත්තේ හෙට දිනයේ පැය පහක කාලයක් සේවයෙන් ඉවත් වීමේ විරෝධතා ව්‍යාපාරයක් දියත් කරන බවයි.

පරිපූරක වෛද්‍ය වෘත්තීයවේදීන්ගේ ඒකාබද්ධ බලමණ්ඩලයේ සභාපති රවී කුමුදේශ් පවසන්නේ වෛද්‍ය සේවාවේ අමතර දීමනා 78%කින් පමණ වැඩි කරමින් සෞඛ්‍ය අමාත්‍යවරිය රහසිගතව ඉදිරිපත් කරන ලද පත්‍රිකාවට අමාත්‍ය මණ්ඩලයේ අනුමැතිය ලැබී ඇති බවයි.

ඒ අනූව අමතර දීමනා නමැති ලේබලය යොදා ගනිමින් ස්ථිර දීමනා වැඩි කර ගැනීමක් සඳහා සෞඛ්‍ය අමාත්‍යාංශය නොමඟ යවා ඇති අතර එමඟින් වෛද්‍ය නිලධාරීන් සඳහා මසකට රු. 41,220.00 සිට රු. 78,120.00 දක්වා අමතර දීමනා වැඩිකිරීමක් සිදුව ඇති බව වෘත්තීයවේදියා පෙන්වා දෙයි.

ඔහු සංගමයේ සාමාජිකයන් වෙත වැඩි දුරටත් දැනුම් දී ඇත්තේ සෞඛ්‍ය සේවාවේ සියළු වෘත්තීය සමිති ඒකාබද්ධව ඊට සාපේක්ෂ දීමනාවක් ලබා දෙන ලෙස ඉල්ලා රෝහල් නමයකදී සිදු කළ වෘත්තීය ක්‍රියාමාර්ගයට අදාලව ජුනි 9 දින සෞඛ්‍ය අමාත්‍යවරිය සමඟ නිළ සාකච්ඡාවක් සිදු කරන ලද නමුත් ප්‍රධාන සේවා ඉල්ලීම් පිළිබඳව පිළිගතහැකි මට්ටමේ එකඟතාවයක් ලබා දීමට ඇය අපොහොසත් වු බවයි.

ඒ අනුව වෘත්තිය ක්‍රියාමාර්ගයකට එළඹීමට තිරණය කළ බව වෘත්තිය සමිති නායකත්වය සාමාජිකයන්ට දැනුම් දී තිබේ.

“එනයින්, ඒ පිළිබඳව හා දිඟින් දිඟටම වෛද්‍ය නොවන සේවාවන් වලට සිදුවන අගතීන් වලට අදාල ඉල්ලීම් 15 ක් මුල්කර ගනිමින් සමස්ත සෞඛ්‍ය සේවාවේ වෘත්තීය සමිති ඒකාබද්ධව 2021.06.11 දින උදෑසන 7.00 සිට දහවල් 12.00 දක්වා සේවයෙන් ඉවත් වීමේ විරෝධතා ව්‍යාපාරයක් දියත් කිරීමට පරිපූරක වෛද්‍ය වෘත්තීයවේදීන්ගේ ඒකාබද්ධ බලමණ්ඩලයේ විධායක සභාව ඒකමතිකව තීරණය කරන ලදී.”

කොරෝනා ප්‍රතිකාර

ඒ අනූව, අදාල කාලය තුල සේවාවෙන් ඉවත්ව නිරෝධායන නීති වලට අනුකූල වන සේ සියළු කාර්ය මණ්ඩලය සමඟ එක් ස්ථානයකට ඒකරාශී වන ලෙසත් දහවල් 12.00 ට අදාල සෞඛ්‍ය ආයතන ඉදිරිපිටදී උද්ඝෝෂණ ව්‍යාපාරයක් සංවිධානය කරන ලෙසත් රවී කුමුදේශ් සංගමයේ සාමාජිකයන්ගෙන් ඉල්ලා තිබේ.

“තවද මෙම පැය 4ක සේවයෙන් ඉවත්වීමේ ක්‍රියාමාර්ගය සඳහා සියළු අණුක ජීවී රසායනාගාර, මධ්‍යම ලේ බැංකුව, සියළු මාතෘ හා ළමා රෝහල්, සියළු පිළිකා රෝහල් දායක කර නොගන්නා නමුත් දහවල් 12.00ට පැවැත්වීමට නියමිත් විරෝධතා ව්‍යාපාරය සඳහා සියළුම රෝහල් වල සියළුම කාර්ය මණ්ඩලයේ සමුහික සහභාගීත්වය ලබා දිය යුතු බවද දන්වමු.”

සේවයෙන් ඉවත් වීමේ විරෝධතා ව්‍යාපාරය සම්බන්ධයෙන් දැනුම් දෙමින් සෞඛ්‍ය අමාත්‍ය පවිත්‍රාදේවි වන්නිආරච්චි වෙත සෞඛ්‍ය වෘත්තීය සමිති එකමුතුව යොමු කළ ලිපියක අවධාරණය කර ඇත්තේ වෘත්තීය ක්‍රියාමාර්ගය පැවැතියද කොරෝනා ආසාදිතයන් සදහා වු හදිසි හා අත්‍යවශ්‍ය සේවාවන් ආවරණය කිරීමට කටයුතු කරන බවයි.

Facebook Comments

wedding people