කිලිනොච්චියේ අලුත් තැබෑරුම් වසා දමන්න බලධාරීහු කල් ඉල්ලති

යුද පීඩිත කිලිනොච්චිය දිස්ත්‍රික්කය සදහා මේ වසරේ අලුතින් නිකුත් කරන ලද සුරාබදු බලපත්‍ර සම්බන්ධයෙන්, ප්‍රදේශවාසී ජනයාගෙන් එල්ල වන දැඩි විරෝධය හමුවේ, ඒ පිළිබඳව නැවත සමාලෝචනය කිරීමට දිස්ත්‍රික් සංවර්ධන කමිටුව කල් ඉල්ලා තිබේ.

බලපත්‍ර ලාභී තැබෑරුම් වැසීමට පියවර ගතහොත් උසාවි යාමට සිදුවනු ඇති බවට කමිටුවට සහභාගී වූ ආණ්ඩුවේ අමාත්‍යවරයා බිය පළකර ඇත.

2024 වර්ෂය සඳහා කිලිනොච්චි දිස්ත්‍රික්කය වෙනුවෙන් නිකුත් කරන ලද සුරාබදු බලපත්‍ර අහෝසි කිරීමේ යෝජනාව දෙසැම්බර් 26 වැනි බ්‍රහස්පතින්දා පැවැති දිස්ත්‍රික් සංවර්ධන කමිටුවට ඉදිරිපත් කර ඇත්තේ ඉලංගෙයි තමිල් අරසු කච්චි (ITAK) නායක, යාපනය දිස්ත්‍රික් පාර්ලිමේන්තු මන්ත්‍රී ශිවඥානම් ශ්‍රී ධරන් විසිනි.

“ලයිසන් ලබා දුන්නේ කවුරුන්ද යන්න හෙළි කළ යුතුයි. ඊට සම්බන්ධ දේශපාලනඥයන් හෙළි කළ යුතුයි. මේ කිලිනොච්චිය නගරයට නොගැලපෙන බව බොහෝ දෙනාගේ ඉල්ලීමයි.”

යාපනය දිස්ත්‍රික් ස්වාධින පාර්ලිමේන්තු මන්ත්‍රී වෛද්‍ය රාමනාදන් අර්ජුනා විසින් ශ්‍රී ධරන් මන්ත්‍රීවරයාගේ යෝජනාව ස්ථිර කළ බවයි පළාත් බද වාර්තාකරුවන් පවසන්නේ.

දෙසැම්බර් 24 වැනිදා කිලිනොච්චිය ඩිපෝ හන්දියෙන් ආරම්භ කළ විරෝධතා පෙළපාලියකින් දිස්ත්‍රික් ලේකම් කාර්යාලය දක්වා පැමිණි කාන්තාවන් බහුතරයකින් සමන්විත ප්‍රදේශවාසීවන් කිලිනොච්චියේ අලුතින් ආරම්භ කර ඇති සුරා සැල් වහා වසා දමන ලෙස බලකරමින් ලියු සන්දේශයක් ජනාධිපතිවරයාට බාර දීම වෙනුවෙන් දිස්ත්‍රික් ලේකම්වරයා අත පත් කර තිබුනි.

“තරුණයන්ගේ දෙමළ ජාතිකත්වය විසිරෙන්න දෙන්න එපා, අවුරුදු 30 ක අරගලයට විසඳුම තැබෑරුම් 36 ද, වහන්න වහන්න, තැබෑරුම් වහන්න,” ආදී සටන් පාඨ කියමින් එදින දියත් කළ විරෝධතා ව්‍යාපාරය සංවිධානය කර තිබුනේ මත්පැන් විරෝධි ව්‍යාපාරය සහ උතුරු නැගෙනහිර පුනරුත්ථාපන සංවිධානය ඒකාබද්ධවයි.

එම විරෝධයට එක්ව සිටි පියතුමකු සඳහන් කර තිබුනේ ප්‍රදේශයේ අලුතින් සුරා සැල් විවෘත කිරීම නිසා තරුණයන් දැඩි පීඩාවකට පත්ව සිටින බවයි.

“මතින් තොර කලාපයක්ව තිබූ කිලිනොච්චි දිස්ත්‍රික්කය මත්පැන්හල්වලින් පිරීලා තියනවා. ළමයින් සහ තරුණයන් විශේෂයෙන් පීඩාවට පත් වෙනවා. මත්පැන් වලට කැමැත්ත දක්වන පිරිස වැඩිවෙලා. මේක බලපෑම අත්විදින්නේ අම්මලා, අක්කලා. ඔවුන් ජීවිතය ආරක්ෂා කර ගන්න සටන් කරනවා. ”

ප්‍රදේශයේ අලුතින් ආරම්භ කළ සුරා සැල් වසා දැමිය යුතු බවට එම විරෝධයට දිනකට පසුදා , දිස්ත්‍රික් සංවර්ධන කමිටුවට යෝජනා ඉදිරිපත් වු අවස්ථාවේ කමිටු සභාපති, ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් පෙන්වා දී තිබුනේ නිසි ක්‍රමවේදයට අනුව ලබා දී ඇති එම බලපත්‍ර අහෝසි කිරීමට යාමේදී අධිකරණ ක්‍රියාමාර්ග වලට මුහුණ දීමටද සිදු වනු ඇති බවයි.

“මත්පැන්හල් කිහිපයකට අවසර දීමෙන් පසු ඒවායේ හිමිකරුවන් රුපියල් කෝටි ගණන් වියදම් කර ඒවා විවෘත කරන්න කටයුතු කරලා තියනවා. මෙම අවසරය ලබා දෙන්නේ සුරාබදු දෙපාර්තමේන්තුව සහ අදාළ ප්‍රාදේශයේ ඩී.එස්. හරහා තමයි. මේක අවලංගු කිරීමේදී උසාවි ප්‍රශ්න වලටත් මුහුණ දෙන්න වෙයි.”

පාසල්, කෝවිල් සමීපයේ එවැනි සුරා සැල් සදහා අවසර ලබා දී ඇත්නම් එහි වගකීම අදාල නිලධාරීන් බාර ගත යුතු බව ඔහු වැඩි දුරටත් පවසා තිබුනි.

“ජනතාවගේ විරෝධතාවය දිගටම තියනවානම් තාවකාලිකව අවලංගු කරන්න පුළුවන්. නැතිනම් අවලංගු කරන්න පුළුවන්. අපිට නීතියක් තියනවා ඒක කඩ කරලා ක්‍රියාත්මක වෙන්න බෑ. මේ සම්බන්ධයෙන් පියවරක් ගත යුතුයි. අදාල ආයතන මේක ගැන නැවත සලකා බැලිය යුතුයි. පාසල්, කෝවිල් ළඟ අවසර දීලා තියෙනවා නම් ඒකට වගකිව යුත්තේ නිලධාරීන්.”

කිලිනොච්චි දිස්ත්‍රික්කයේ අලුතින් ආරම්භ කළ සුරා සැල් වසා දැමීමට දිගින් දිගටම ඉදිරිපත් වු යෝජනා හමුවේ දිස්ත්‍රික් සංවර්ධන කමිටු සභාපති ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් අවසන් වශයෙන් තීරණය කර තිබුනේ ඒ සම්බන්ධයෙන් සමාලෝචනය කර තීන්දුවක් ගැනීමටයි.

“ඒක කවුරුත් එකඟ වෙන දෙයක්නේ? ඒ නිසා අපි මේ වෙලාවේ තීන්දුවක් ගමු ජී.ඒ, නිලධාරීන් කියන විදියට නීතියට අනුව තමයි දීලා තියෙන්නේ. කොහොම වුණත් අපි ඒ ගැන සමාලෝචනය කරලා තීරණයක් ගන්නවා කියලා තීරණයක් ගමු.”

දිස්ත්‍රික් ලේකම් කාර්යාලය හරහා කමිටුවක් පත් කර සති දෙකක කාලයක් තුළ වාර්තාවක් කැදවා එයට අනුව එම තීරණය ගැනීමට තිරණය වු බවයි පළාත් බද වාර්තාකරුවන් පවසන්නේ.

කිලිනොච්චි දිස්ත්‍රික් ලේකම් කාර්යාලයට දෙසැම්බර් 24 වැනිදා පැමිණි විරෝධතාකරුවන්ට දිස්ත්‍රික් ලේකම් එස්. මුරලිදරන් දැනුම් දී තිබුනේ මැත කාලීනව ප්‍රදේශයේ සුරා සැල් 16 ක් අලුතින් ආරම්භ කර ඇති බවයි.

“අපේ දිස්ත්‍රික්කයේ ද මෑතක දී මත්පැන් අලෙවිසැල් 16 ක් නිශ්චිත කාල පරාසයක් තුළ ආරම්භ කරලා තියනවා. මේක ගැන දිස්ත්‍රික් ලේකම් සමුළුවේදී මම දැනුවත් කරා. මම විතරක් නෙමෙයි ඒ සමුළුවට ආපු අනෙක් ලේකම්ලත් ඔවුන්ගේ ප්‍රදේශවද මේ ප්‍රශ්නය තියනවා කියලා ජනාධිපතිතුමාට කිව්වා. මේ ගැන මුදල් අමාත්‍යාංශය, ජනාධිපතිතුමා ඇතුළු අදාල පිරිස පියවර ගනිවි කියලා මම විශ්වාස කරනවා. ”

කිලිනොච්චි දිස්ත්‍රික් ලේකම් කාර්යාලයේ පැවැති දිස්ත්‍රික් සංවර්ධන කමිටු රැස්වීමට සහභාගී වී සිටි සුරා බදු දෙපාර්තමේන්තුවේ නිලධාරියෙක් දැනුම් දී තිබුනේ යුද නිමාවෙන් පසු මෑතක් වන තුරුම කිලිනොච්චි දිස්ත්‍රික්කය තුළ සුරා බදු බලපත්‍ර පැවැතියේ ආපනශාලා 3 ක් සදහා පමණක් බවයි.

2024 වර්ෂය සඳහා නිකුත් කරන ලද සුරාබදු බලපත්‍රවල සියලුම තොරතුරු දෙසැම්බර් 4 වැනිදා පාර්ලිමේන්තුවට අමාත්‍ය බිමල් රත්නායක විසින් හෙළි කර තිබුනි.