කොරෝනා වසංගතය හේතුවෙන් රට පුරා නිරෝධායන ඇදිරිනීතිය ක්‍රියාත්මක වු සමයේ අපේක්ෂකයන් කිහිපදෙනකුම ජනතාවට සහන බෙදීමේ වැඩ පිලිවෙළ ඡන්ද ප්‍රචාරය සඳහා යොදාගෙන ඇති බව දිවයිනේ ප්‍රමුඛතම මැතිවරණ නිරීක්ෂණ සංවිධානයක් විසින් අනාවරණය කර තිබේ.
වාර්තා වී ඇති එවැනි ලොක්ඩවුන් සමයේ සිද්ධීන් 79 කින් වැඩිම ප්‍රමාණයකට වගකිව යුත්තේ ආණ්ඩු පක්ෂය බවයි පැෆ්රල් සංවිධානය පවසන්නේ.
එම සංවිධානයේ විධායක අධ්‍යක්ෂ රෝහන හෙට්ටිආරච්චි එම අනාවරණය සිදු කළේ ජුනි 01 බදාදා කොළඹදී පැවැති මාධ්‍ය හමුවක් අමතමිනි.
“බහුතරයක් පැමිනිලි රාජ්‍ය යාන්ත්‍රණයට එරෙහිව තමයි වාර්තා උනේ. ඒ වගේම විපක්ෂයේ දේශපාලන පක්ෂත් එහෙම නැත්නම් ආධාර කරුවෝ අපේක්ෂකයෝ කෝව්ඩි තත්වය තුළ බෙදපු සහනාධාර තමන්ගේ අපේක්ෂකත්වය ප්‍රවර්ධනය කරන්න කටයුතු කිරීම් වාර්තා වෙලා තියනවා.”
කොරෝනා වසංගතය වැනි ජාතික ව්‍යසනයකදී ජනතාවට අවශ්‍ය සහන සැලසීමට රජයකට වගකීමක් පවතින බව පෙන්වා දෙන විධායක අධ්‍යක්ෂ රෝහන හෙට්ටිආරච්චි අවධාරණය කරන්නේ ඒ වගකීමට අනුව රජය සහන සැලසීමේ ක්‍රියාවලිය සිදු කළ බවයි.
එයින් රජයට ඇතිවන වාසිය සම්බන්ධයෙන් කිසිවකුට විවේචනය කිරීමේ හැකියාවක් නැතත් ආරම්භයේදී දේශපාලනයකින් තොරව ක්‍රියාත්මක වු සහනාධාර ලබාදීමේ වැඩපිලිවෙළ ඉතාම කෙටි කාලයක් ඇතුලත දේශපාලනීකරණය වීම දැකගත හැකි වු බව ඔහු එහිදී අවධාරණය කළේය.
“රජය විසින් නිකුත් කරපු චක්‍රලේඛයක් හරහා ප්‍රාදේශිය දේශපාලන නායකත්වය මේකට මැදිහත් උනා. ඒ හරහා අදාල දේශපාලන කණ්ඩායම් ප්‍රවර්ධනය කිරීම අරමුණු කරගෙන මේ සහනාධාර ව්‍යාපෘතිය ක්‍රියාත්මක උනා. ඒක කනගාටුදායක තත්වයක්.”
එමෙන්ම මෙවර පාර්ලිමේන්තු මැතිවරණයට තරග කරන පළාත් පාලන ආයතන වල ප්‍රධානීන් තමන් අපේක්ෂකයකු බව දැන දැනම එම පළාත් පාලන ආයතන වල සම්පත් යොදා ගනිමින් සහනාධාර වැඩ පිලිවෙලට දායකත්වය ලබා දුන් අයුරුත් පැෆ්රල් සංවිධානය මාධ්‍ය හමුවේදී අනාවරණය කළේය.
නීතිමය ප්‍රතිපාදන වල පවතින ගැටලුවක් හේතුවෙන් ඔවුනට එරෙහිව නීතිමය ක්‍රියාමාර්ග ගැනීමට අසමත් වී ඇති බව පවසන රෝහන හෙට්ටිආරච්චි ජනතාවගෙන් ඉල්ලා සිටියේ මැතිවරණ නීති උල්ලංඝනය කරන අපේක්ෂකයන් සම්බන්ධයෙන් කල්පනා කාරී ලෙස නීන්දු තීරණ ගත යුතු බවයි.
මැතිවරණයට ඉදිරිපත් වී සිටින අපේක්ෂකයන්ගේ මානප අංක නිකුත් කිරීමෙන් පසුව මැතිවරණ නීතී උල්ලංඝනය කිරීමේ සිද්ධීන් 230 ක් වාර්තා වී ඇති බව පැවසු ඔහු වැඩි දුරටත් සදහන් කර සිටියේ අතර ඒ අතුරින් සිද්ධීන් 17 ක් රාජ්‍ය සම්පත් හා රාජ්‍ය බලය පාවිච්චි කිරීම සම්බන්ධයෙන් වන බවයි.
එමෙන්ම ප්‍රචණ්ඩකාරී සිද්ධින් අටක් මේ දක්වා වාර්තා වී ඇති බව ඔහු හෙළි කළේය. එයින් වැඩිම ගැටුම් සිදුවී ඇත්තේ “එකම දේශපාලන ධාරාවක” පිරිස් අතරය.
Facebook Comments
