ටියුෂන් කරුවන් ජනපති හා එක්වී අධ්‍යාපන ලොක්කන් ගේ “තනතුර හෑල්ලු කරලා”

0

ජනාධිපතිවරයා හා උපකාරක පන්ති ගුරුවරුන් අතර පැවැති සාකච්ඡාවකට විභාග කොමසාරිස්වරයා සහ අධ්‍යාපන අමාත්‍යාංශ නිලධාරීන් සහභාගි වීම තුළින් ඔවුන් තම තනතුරුවල ස්වාධීනත්වය බරපතල ලෙස හෑල්ලුවට ලක් කර ඇති බවට අධ්‍යාපන ක්ෂේත්‍රයේ ප්‍රමුඛතම වෘත්තීය සමිති එකමුතුවක් විසින් චෝදනා කර තිබේ.

උපකාරක පන්ති “ව්‍යාපාරිකයන්ගේ” අදහස් මත ඔවුන් සමග සාකච්ඡා කර ජාතික විභාගවල දින තීරණය කිරීමට එම සාකච්ඡාවේදී එකඟතාවයකට පැමිණීම ජාතික විභාගවල ස්වාධීනත්වය සම්බන්ධයෙන් බරපතල ගැටලුවක් මතු කරන බවයි ගුරු-විදුහල්පති වෘත්තීය සමිති එකතුව පවසන්නේ.

එම එකමුතුවේ කැඳවුම්කරු ජෝසප් ස්ටාලින්ගේ අත්සනින් යුතුව ජුලි 01 බදාදා නිකුත් කර තිබෙන නිවේදනයක් මගින් අවධාරණය කර ඇත්තේ විභාග කොමසාරිස් තනතුර ස්වාධීන එකක් වන බැවින් එවැනි නිලධාරියෙකු උපකාරක පන්ති ව්‍යාපාරිකයන්ගේ සාකච්ඡාවකට කැඳවීම සහ ඔහු එම සාකච්ඡාවට සහභාගිවීම මෙන්ම ඔවුන් සමග තීන්දු තීරණ ගැනීම විභාග කොමසාරිස් ධූරය බරපතල ලෙස හෑල්ලුවට ලක් කිරීමක් බවයි.

ජුනි මස 29 වැනිදා පැවැති එම සාකච්ඡාවට රාජ්‍ය නිලධාරීන් කැදවා ජනාධිපතිවරයා දේශපාලන අරමුණු ඉටුකරගෙන ඇති බවටත් ගුරු-විදුහල්පති වෘත්තීය සමිති එකතුව සිය නිවේදනය මගින් චෝදනා කර තිබේ.

“ජනාධිපතිවරයා සිය බලය භාවිතා කරමින් සෞඛ්‍ය සේවා අධ්‍යක්ෂ ජනරාල්, වැඩබලන පොලිස්පති, අධ්‍යාපන ඇමති, අධ්‍යාපන ලේකම් ඇතුළු අධ්‍යාපන අමාත්‍යාංශ ඉහළ නිලධාරීන් මෙම සාකච්ඡාවට සහභාගි කරවීම තුළ පැහැදිලි වන්නේ ආණ්ඩුවේ දේශපාලන අරමුණු වෙනුවෙන් මෙම නිලධාරීන් දඩමීමා කරගෙන ඇති බවයි. එසේම මෙය නිදහස් අධ්‍යාපනයේ ස්වාධීනත්වයට ද බරපතල අත පෙවීමක් බව පෙන්වා දෙමු.”

මුදල් ඉපයීම එකම පරමාර්ථය කර ගත් උපකාරක පන්ති මාෆියාව සමස්ත පාසල් අධ්‍යාපනයටම බරපතල හානියක් අත්කර දී ඇති අතර, පසුගිය කාලයේ අවස්ථා කිහිපයකදීම ජාතික විභාගවල බරපතල විභාග වංචා සිදුවූයේ උපකාර පන්ති ව්‍යාපාරිකයන්ගේ තරගකාරීත්වය හා ව්‍යාපාරික අරමුණු නිසා බව ගුරු-විදුහල්පති වෘත්තීය සමිති එකතුව නගන තවත් චෝදනාවකි.

කොරෝනා වසංගත තත්වය මත කල් දැමුණු උසස් පෙළ හා ශිෂ්‍යත්ව විභාග සම්බන්ධයෙන් සාකච්ඡා කළ යුත්තේ අධ්‍යාපනඥයන්, පාසල් පද්ධතියේ විදුහල්පතිවරු සහ ගුරුවරු සමග උවත් මේ දක්වා එවැනි කිසිදු සාකච්ඡාවක් සිදු කර නොමැති බව පවසන ගුරු-විදුහල්පති වෘත්තීය සමිති එකතුව පෙන්වා දෙන්නේ විටින් විට විභාග දින වෙනස් කරමින් ආණ්ඩුව ලක්ෂ තුනකට අධික විභාග අපේක්ෂකයන් අපේක්ෂා භංගත්වයට හා මානසික පීඩනයකට ලක්කර ඇති බවයි.

මාස තුනකට වැඩි කාලයක් පාසල් වසා තිබියදී ඒ සම්බන්ධයෙන් සියලු පාර්ශවයන් සමග සාකච්ඡා කර තීරණයක් ගැනීමට ආණ්ඩුවට කිසිදු අවශ්‍යතාවයක් නොතිබු බවටත් ගුරු-විදුහල්පති වෘත්තීය සමිති එකතුව චෝදනා කරයි.

අධ්‍යාපනයේ අරමුණු පසෙකලා අධ්‍යාපන පද්ධතියට බරපතල විනාශයක් කර ඇති මෙම උපකාරක පන්ති මාෆියාව සම්බන්ධයෙන් අධ්‍යාපනඥයන් විටින් විට අදහස් පළ කර ඇති අතර, රජයේ පාසල් අධ්‍යාපනය ශක්තිමත් කිරීම වෙනුවට උපකාරක පන්ති ප‍්‍රවර්ධනයට ආණ්ඩුව කටයුතු කිරීම අධ්‍යාපනයේ අරමුණු විනාශ කිරීමක් බවයි මාධ්‍ය නිවේදනය මගින් වැඩි දුරටත් පෙන්වා දී ඇත්තේ.

එවැනි තත්වයක් තුළ මෙවැනි සාකච්ඡාවකට විභාග කොමසාරිස්වරයා සහභාගිවීම ජාතික විභාගවල ස්වාධීනත්වයට එල්ල කළ බරපතල තර්ජනයක් බව නැවත නැවතත් අවධාරණය කරන ගුරු-විදුහල්පති වෘත්තීය සමිති එකතුව තම තනතුරේ ස්වාධීනත්වය හෑල්ලුවට ලක් කරමින් ජාතික විභාගවල ස්වාධීනත්වය තර්ජනයට ලක් කරමින් කටයුතු කිරීම සම්බන්ධයෙන් විභාග කොමසාරිස්වරයාට මෙන්ම අධ්‍යාපන ක්ෂේත‍්‍රයේ ඉහළ නිලධාරීන් මෙම සාකච්ඡාවට කැඳවීම සම්බන්ධයෙන් දැඩි විරෝධය පළ කර තිබේ.

Facebook Comments

wedding people