අධිකරණයට අපහාස කිරීම නිසා හය අවුරුද්දකට සිරගත කරනු ලැබූ බොදුබල සේනා නායකයා නිදහස් කර යැවීමේ නියෝගයක් ජනාධිපතිවරයා විසින් ලබා දී නැතැයි බන්ධනාගාර ප්‍රකාශක තුෂාර උපුල්දෙණිය කොමසාරිස්වරයා කියා සිටියේය.
බොදුබල සේනා කැඳවුම්කරු ඩිලන්ත විතානගේ මාධ්‍යවේදීන්ට පවසා තිබුනේ ගලබොඩඇත්තේ ඥනසාර හිමියන්ට සමාව දී නිදහස් කර යැවීම සඳහා අවශ්‍ය කරන ලියකියවිලි ජනාධිපති මෛත්‍රිපාල සිරිසේන විසින් අත්සන් කර ඇති බවයි.
බොදුබලසේනානායකයා ට විශේෂ සමාවක් දීම මානව හිමිකම් ක්ෂේත්‍රයේ දැඩි දෝෂ දර්ශනයට ලක්වී ඇති අතර ජනාධිපති නීතිඥ ක්‍රිශාන්ත වැලිඅමුණ විසින් ජනපති සමාව හඳුන්වා තිබුනේ අධිකරණයේ ස්වාධීනත්වයට ගසන ලද කනේ පහරක් ලෙසයි.
19 වැනි ව්‍යවස්ථා සංශෝධනයෙන් පසු ජනාධිපති සතු සමාව දීමේ බලය අධිකරණ විමසුමට යටත් බව මානව හිමිකම් නීතිඥවරයා සමාජ මාධ්‍ය ජාල ඔස්සේ නිකුත් කළ නිවේදනයකින් පවසා තිබේ.
වෙසක් පොහොය දා ජනාධිපතිවරයා ද, ජනරජ දිනයේදී ජනපති අගමැති දෙපාර්ශවයේ නියෝජිතයන් වන බස්නාහිර ආණ්ඩුකාර අසාත් සාලි සහ බලශක්ති අමාත්‍ය රවී කරුණානායක ද හිරගෙදරදී ඥානසාර හිමියන් බැහැ දැක තිබුනි.
දස අවුරුද්දකට ඉහතදී අතුරුදහන් කරන ලද සිය සැමියා වෙනුවෙන් යුක්තිය ඉල්ලා සටන් වදින සන්ධ්‍යා එක්නැලිගොඩට උසාවි භූමියක් තුල තර්ජනය කොට අඩන්තේට්ටම් කිරීම සම්බන්ධයෙන් බොදුබල සේනා නායකයා වරදකරු බව අධිකරණය තීන්දු කරන ලද්දේ පසුගිය වසරේ මැයි මාසයේ දීය.
Facebook Comments
