පාස්කු ඉරුදින බෝම්බ ප්‍රහාර මාලාවේ වගකිවයුත්තන්ට දඩුවම් ලබා දීම දේශපාලන සටන් පාඨකයට පමණක් සීමා නොකරන ලෙස ආණ්ඩුවෙන් ඉල්ලා සිටින විපක්ෂයේ මුස්ලිම් මන්ත්‍රීවරයෙක් අපරාධකරුවන් සොයා ගැනීම සදහා ආණ්ඩුව ගන්නා උත්සාහය ප්‍රශ්න කිරීමකට ලක් කර තිබේ.
මිනිස් ජීවිත 250 කට අධික ප්‍රමාණයක් විනාශ කරමින් මොහොමඩ් සහරාන් හෂීම් සිදු කළ අපරාධය නිසා සමස්ත මුස්ලිම් ප්‍රජාවම වන්දි ගෙවීමට සිදුවු බව පවසන සමගි ජන බලවේගයේ පාර්ලිමේන්තු මන්ත්‍රී මුජිබර් රහුමාන් අවධාරණය කරන්නේ එම ප්‍රජාවට මෙන්ම ප්‍රහාරයෙන් මිය ගිය පිරිසට ද සාධාරණය ඉටු වන්නේ බෝම්බ ප්‍රහාරය මෙහෙයවු අය අත්අඩංගුවට ගෙන දඩුවම් ලබා දීම තුළ බවයි.
දෙසැම්බර් 03 බ්‍රහස්පතින්දා මන්ත්‍රීවරයා පාර්ලිමේන්තුවේදී වැඩි දුරටත් ආණ්ඩුවෙන් ප්‍රශ්න කළේ පාස්කු ඉරිදා බෝම්බ ප්‍රහාරයට සම්බන්ධ වී දැනට ඉන්දියාවට පැන ගොස් ඇති බවට චෝදනා එල්ල වී සිටින ‘සාරා’නොහොත් පුලස්තනී මහේන්ද්‍රන් සොයා ගැනීම වෙනුවෙන් රාජ්‍ය තාන්ත්‍රික මාර්ගයෙන් මැදිහත් වී තිබේද යන්නයි.
“දැන් ඊයේ පෙරේදා ඉන්දියාවේ ආරක්ෂක උපදේශකතුමා ලංකාවට ආවා. එතුමා අගමැතිතුමා හම්බඋනා. ජනාධිපතිතුමා හම්බඋනා. මම හිතන්නේ සමහර විට රාජ්‍ය ආරක්ෂක ඇමතිතුමාවත් හම්බුනාද දන්නේ නෑ. දැන් එතකොට එතුමාගෙන් ඉල්ලීමක් කළාද? සාරා ඉන්දියාවේ ඉන්නවානම් සාරා බාර දෙන්න කියලා. ” මන්ත්‍රීවරයා ප්‍රශ්න කළේය.
ඉන්දියාවේ ජාතික ආරක්ෂක උපදේශක ශ්‍රී අජිත් දෝවාල් පසුගිය මස අගදී මෙරටට පැමිණ තිබුනේ ඉන්දියාව සහ මාලදිවයින සමඟ සමුද්‍රීය ආරක්ෂක සහයෝගීතාව පිළිබඳ 4 වන ජාතික ආරක්ෂක උපදේශක මට්ටමේ ත්‍රෛපාක්ෂික රැස්වීමකට සහභාගී වීම වෙනුවෙනි.
ඔහු සහ ශ්‍රී ලංකා අග්‍රාමාත්‍යවරයා අතර හමුවක් පැවති බව දැනුම් දෙමින් අග්‍රාමාත්‍ය මාධ්‍ය ලේකම් රොහාන් වැලිවිට නිවේදනය කර තිබුනේ එම සාකච්ඡාවේදී දකුණේ නිවාස යෝජනා ව්‍යාපෘතියක් ක්‍රියාත්මක කිරීම සදහා ශ්‍රී ලංකා අග්‍රාමාත්‍යවරයා, ඉන්දියාවේ ජාතික ආරක්ෂක උපදේශකගේ සහගෝගය ඉල්ලා සිටි බවයි.
‘සාරා’ රටින් පිට කිරීමට උදව් කළ බවට චෝදනා එල්ල වන පොලිස් නිලධාරියා ද මේ වනවිට අත්අඩංගුවේ සිටින බව පාර්ලිමේන්තුවේ දී සදහන් කළ මුජිබර් රහුමාන් මන්ත්‍රීවරයා එහිදී වැඩි දුරටත් අවධාරණය කළේ පාස්කු ප්‍රහාර මාලාවේ මරාගෙන මැරෙන කණ්ඩායමේ ප්‍රධාන සාමාජිකාවක වු ඇය ලංකාවට ගෙන්වා ගැනීම තුළ ප්‍රහාර මාලාවේ සුල මුල සොයා ගත හැකි බවයි.
දේවස්ථාන සහ සංචාරක හෝටල් කිහිපයක් ඉලක්ක කර ගනිමින් 2019 අප්‍රේල් මස 21 වන දින එල්ල කළ මරාගෙන මැරෙන බෝම්බ ප්‍රහාර මාලාව නිසා 250 කට අධික සාමාන්‍ය වැසියන් සංඛ්‍යාවක් මිය ගිය අතර තුවාල ලැබූ සංඛ්‍යාව 500කට අධිකය.
Facebook Comments
