දෙමළ පීඩිතයන් ආණ්ඩුව කෙරේ ඇති විශ්වාසය තවත් අඩුවේ

0

එක්සත් ජාතීන්ගේ සංවිධානය සමඟ එක්ව කටයුතු කිරීමට රාජපක්ෂ ආණ්ඩුව ජිනීවා මානව හිමිකම් කොමිසම හමුවේ සහතික වෙද්දී ලංකා ආණ්ඩුව සහ ආණ්ඩුවේ ආයතන ගැන විශ්වාසයක් නොමැති බැවින් ජාත්‍යන්තර සංවිධාන ගැන අපේක්‍ෂා සහගත වීමට යුද පීඩිතයන් පෙළඹී තිබේ.

රජයේ හමුදා හා පොලිසිය විසින් බලහත්කාරයෙන් අතුරුදහන් කළ වුන්ගේ සහ රජයේ හමුදා වෙත බාර කළ පසු අතුරුදහන් කළ වුන්ට යුක්තිය ඉල්ලා ඔවුන්ගේ ඥාතිහු දැනට දින 1500 ඉක්මවා උද්ඝෝෂණයේ නිරත වී සිටිති.

“ලංකාවේ ආණ්ඩුව ගැනවත් ආණ්ඩුවේ මානව හිමිකම් කොමිසම, සංහිඳියා කොමිසම් ගැන අපිට කිසිම විශ්වාසයක් නැහැ,“ යි යාපනය දිසා අතුරුදහන් කළ වුන්ගේ ඥාතීන්ගේ සංගමයේ සභාපති සිවපාදම් ඉලන්කෝදෛ කියා සිටියේ යාපනය මාධ්‍ය සමාජ ශාලාවේ 15 වැනිදා පැවති මාධ්‍ය හමුවක දිය,

“එක්සත් ජාතීන්ගේ සංවිධානයේ මානව හිමිකම් කවුන්සලය අපිට සාධාරණයක් ලබා දෙයි කියලා අපි බලාපොරොත්තු වෙනවා,“ යැයි ද ඇය පැවසුවාය.

ජිනීවා මානව හිමිකම් කවුන්සිලය සුම් තාක්ෂණය ඔස්සේ අමතමින් විදේශ අමාත්‍ය ජී.ඇල්.පීරිස් කියා සිටියේ “අප විසින් ස්වේච්ඡාවෙන් භාර ගන්නා ලද ජාත්‍යන්තර බැඳීම්වලට අනුකූලව, මෙම කවුන්සිලය සහ එක්සත් ජාතීන් විසින් නියම කරන ලද මානව හිමිකම් පද්ධතිය සමඟ අපගේ ශක්තිමත් හා අඛණ්ඩ සහයෝගීතාව“ පිළිබඳව අවධාරණය කරන බවය.

කෝවිඩ් වසංගතය පැතිර යාම හේතුවෙන් ජිනීවා මානව හිමිකම් කවුන්සලයේ මෙවර සැසිවාරයට සහභාගී වීම දුෂ්කර වීම නිසා අතුරුදහන් කළවුන්ගේ ඥාතිහු තමන් මුහුණ දෙන ගැටළු මාධ්‍ය මගින් ඉදිරිපත් කිරීමින් සිටිති.

“මම මගේ ළමයි පස් දෙනෙක් හමුදාවට බාර දුන්නා. මේ දරුවෝ කවුරුවත් අද නැහැ. අපි එයාලව හොයා හොයා නොගිය කඳවුරක් නැහැ. අපේ ළමයි වැරදි කරලා නැහැ“ යැයි පැවසූ සිවපාදම් ඉලන්කෝදෛ වැඩි දුරටත් කියා සිටියේ යුද්ධය අවසන් වූ වහාම ආණ්ඩුවේ ඉල්ලීම පිට පවුල් පිටින් හමුදාවට බාර වූ බවය.

“හමුදාව කළේ දෙමාපියන් තියලා ළමයිනුයි, ගැහැණු තියලා පිරිමියි බස් වල දාගෙන අරන් ගිය එක. ඒ මදිවට ගෙවල් වලට පැනලා කෙල්ලෝ කොල්ලෝ අරන් ගියා. මේ කාටවත් වෙච්ච දෙයක් නැහැ,“ යැයි ඇය චෝදනා කළාය.

අතුරුදහන් කළවුන්ට යුක්තිය ඉටු කරගැනීම සඳහා වූ අරගලයෙන් ගතවූ කාලය තුල ඒ වෙනුවෙන් වෙහෙස මහන්සි වූ සිය දෙනෙක් පමණ මේ වන විට මිය ගොස් ඇත.

මේ අතර මුලතිව් අතුරුදහන් කළ වුවන්ගේ ඥාතීන්ගේ සංගමය 14 වැනිදා මාධ්‍ය හමුවක් කැඳවා කියා සිටියේ `අතුරුදහන් කළ තැනැත්තන් පිලිබඳ කාර්යාලය ආණ්ඩුවේ වාසියට පිහිටවූ එකක්`බවය.

“OMP එක කරන්නේ ආණ්ඩුව කියන දෙයක් තමයි.උද්ඝෝෂණ වලින් අයින් වෙන්න කියලා අපිව බය කරන්න තමයි ඒගොල්ලෝ හදන්නේ,“ යැයි මුලතිව් දිසාවේ අතුරුදහන් කළවුන්ගේ ඥාතීන්ගේ සංගමයේ සභාපති මරිය සුරේෂ් ඊශ්වරී කියා සිටියාය.

ජිනීවා මානව හිමිකම් කොමසාරිස් මිචෙල් බැෂලේ ශ්‍රී ලංකාව පිලිබඳ වාර්තාව ඉදිරිපත් කිරීමත් සමඟ යුරෝපා සංගමයේ නියෝජිත පිරිසක් මේ මස අගදී මෙරට නිරීක්ෂණ චාරිකාවකට පැමිණීමට නියමිතය.

Facebook Comments

wedding people