අවුරුදු දහයකදී ලංකාවේ වන අලි තුන්දාහක් මරු දකී

දිනකට වන අලියෙකු බැගින් ගෙවී ගිය දශකය තුල ශ්‍රී ලංකාව තුලදී මරුමුවට පත්වී ඇති බව අනාවරණය වී තිබේ.

පරිසර අමාත්‍ය වෛද්‍ය ධම්මික පටබැඳි පෙබරවාරි 6 වැනිදා පාර්ලිමේන්තුවට දැනුම් දුන්නේ ගතවූ වසර පහේ අලි මරණ ඊට පෙර වසර පහට වඩා ඉහල ගොස් ඇති බවයි.

අමාත්‍යවරයා සදහන් කරන පරිදි ගෙවී ගිය දස වසර තුළ මරණයට පත්ව ඇති අලි ගණන 3477කි.

“2015 -2019 කාලයේ අලි මරණ ගත්තොත් 1466 ක් සිද්ධ වෙලා තියනවා. 2020 -24 කාලයේ දී අලි මරණ 2011 ක් සිද්ධ වෙලා තියනවා. ඒ නිසා පසුගිය 2015 -2019 කාලයට සාපේක්ෂව 2020 -24 අවුරුදු පහේදී අලි මරණ සංඛ්‍යාව වැඩි වෙලා තියනවා.”

2015 සිට 2024 දක්වා කාලය තුළ අලි-මිනිස් ගැටුමෙන් රටට අහිමී වී ඇති මනුෂ්‍ය ජීවිත ගණන 1190 ක් බවයි පරිසර අමාත්‍ය වෛද්‍ය ධම්මික පටබැඳි පවසන්නේ.

“අපි මිනිස්සුන්ගේ මරණ ගත්තොත් 2015-2019 කාලයේ දී 456 ක් සිද්ධ වෙලා තියනවා. 2020 -24 කාලයේදී 734 ක් සිද්ධ වෙලා තියනවා. ඒ නිසා අලි මරණ ප්‍රමාණයත් ඒ 2020 -24 කාලයේදී වැඩි වෙලා තියනවා.”

අලි මිනිස් ගැටුම අවම කිරීමට වත්මන් රජය ගෙන ඇති කෙටි කාලීන හා දීර්ඝ කාලින ක්‍රියාමාර්ගද මන්ත්‍රීවරයා පාර්ලිමේන්තුවට හෙලි කළේය.

“විදුලි වැට, ඒ වගේම අලි වෙඩි යොදලා අලියන් පලවා හැරීම, ඊට පස්සේ යටි වගාවන් ඉවත් කිරීම, විදී ලාම්පු සවි කිරීම වගේ අපි එහෙම ක්‍රියාමාර්ග අරගෙන තියනවා.”

ඔහු තව දුරටත් සදහන් කළේ අලි මිනිස් ගැටුම අවම කිරීමට වෙනත් ක්‍රමවේද පවතීද යන්න සම්බන්ධයෙන් ද පර්යේෂණය කරමින් සිටින බවයි.

“ඊට අමතරව වන අලි සංචරණ රටාවන් හදුනා ගෙන, ඊට පස්සේ අපි මංකඩ විවෘත කිරීම, වාසස්ථාන සුපෝෂණය සහ මේ ගැටළු වලට තව මොනවද තියන විසදීමේ ක්‍රමවේදයන් කියන එක සම්බන්ධයෙන් අපි පර්යේෂණ කරමින් ඉන්නවා.”

“ක්ලීන් ශ්‍රී ලංකා” ආරම්භ කිරීම වෙනුවෙන් ජනාධිපති කාර්යාලයේ 2025 ජනවාරි 1 වැනිදා පැවති උත්සවයට එක් වෙමින් ජනාධිපති අනුර කුමාර දිසානායක පවසා තිබුනේ පරිසර පද්ධතිය ප්‍රතිෂ්ටාපනය කිරීම එම වැඩසටහනේ එක් ප්‍රධානම වැඩ කොටසක් ලෙස සලකන්නට අවශ්‍ය බවයි.

ජනාධිපතිවරයාගේ ගම්පලාතෙන් මෑතදී පළවා හරින දරන ලද අලි රංචුවක් රාජ්‍ය ආයතනයක් විසින් හාමතේ සිරකොටගෙන සිටීම පිළිබදව පරිසර සංවිධානයක් ඊට පසුදිනම ආණ්ඩුවට දැනුම් දී තිබුනි.