ලසන්ත ඝාතන නඩුවට මැදිහත්වීම ගැන ජනාධිපතිට නීතිඥ සංගමයෙන් ලිපියක්

ලසන්ත ඝාතන නඩුවට සම්බන්ධ චූදිතයන් තුන් කට්ටුවක් නිදහස් කිරීමට එරෙහි මහජන විරෝධය හමුවේ නීතිපති කැඳවීමට පියවර ගත් ජනාධිපතිවරයාට ලිපියක් ලියන ශ්‍රී ලංකා නීතිඥ සංගමය දේශපාලන මැදිහත්වීම් නීතියේ ආධිපත්‍යයට හානි පමුණුවන බවට අනතුරු අඟවයි.

චුදිත හමුදා-පොලිස් තිදෙනා නිදහස් කිරීමට නීතිපති ගත් තීන්දුව සමාලෝචනය කරන බව රජයේ මාධ්‍ය ප්‍රකාශකයා ගිය සතිය මැද ප්‍රකාශ කර තිබුණි.

“අපරාධ කරුණු සම්බන්ධයෙන් නීතිපතිවරයා ගන්නා තීන්දු කැබිනට් අමාත්‍යවරුන් ඇතුළු දේශපාලන අධිකාරිය විසින් සමාලෝචනය නොකළ යුතු බව ශ්‍රි ලංකා නීතීඥ සංගමයේ දැඩි මතය යි,” යනුවෙන් සංගමයේ සභාපති ජනාධිපති නීතිඥ අනුර මැද්දේගෙඩ ගේ සහ ලේකම් නීතිඥ චතුර ගල්හේන ගේ අත්සනින් සිකුරාදා (07) යවා ඇති ලිපියක දැක්වෙයි. නීතියේ ආධිපත්‍යය සඳහා තීරණාත්මක වන නීතිපති කාර්යාලයේ ස්වාධීනත්වයට එවන් සමාලෝචන මගින් හානි පැමිණෙන බව එහි අවධාරණය කෙරේ.

“දේශපාලන ඇඟිලි ගැසීම් බෑ” නීතිඥ සංගමය

නීතිපතිවරයාගේ බලය ක්‍රියාත්මක කිරීමේදි අනවශ්‍ය මැදිහත්වීම් නොකරන බවට සහතික වන්නැයි ජනාධිපතිවරයාගෙන් ඉල්ලා සිටින ශ්‍රී ලංකා නීතිඥ සංගමය, එය නීතියේ ආධිපත්‍යය ආරක්ෂා කිරීම සඳහා අත්‍යාවශ්‍ය වන නීතිපතිවරයාගේ කාර්යාලය ඇතුළු වැදගත් ආයතනවල ස්වාධීනත්වය ආරක්ෂා කිරීම කෙරෙහි ඉවහල්වනු ඇති බවට ද පෙන්වා දෙයි.

ලසන්ත වික්‍රමතුංග ඝාතනය කිරීම සම්බන්ධයෙන් ගල්කිස්ස මහේස්ත්‍රාත් අධිකරණය හමුවේ වසර 10 ට අධික කාලයක් විභාග කෙරුණු බී 92/ 2009 දරණ නඩුවේ සැකකරුවන් ලෙස නම් කොට සිටි තිස්සසිරි සුගතපාල, ප්‍රසන්න නානායක්කාර සහ ප්‍රේම් ආනන්ද උදුලාගම යන තිදෙනා නිදහස් කරන ලෙස නීතිපතිවරයා විසින් පසුගිය මාසයේ 27 දා අපරාධ පරික්ෂණ දෙපාර්තමේන්තුවේ අධ්‍යක්ෂකවරයා වෙත ලිපියක් මගින් දැනුම් දී තිබුණි. අදාල ලිපිය හෙළිදරවු වීමෙන් අනතුරුව ඒ සම්බන්ධයෙන් එල්ලවුණු මහජන විරෝධය සමගින් මාධ්‍යවේදීන් නැගූ ප්‍රශ්නවලට අමාත්‍ය මණ්ඩල ප්‍රකාශක දොස්තර නලින්ද ජයතිස්ස පසුගිය 05 වැනිදා පිළිතුරු දුන්නේ නීතිපතිවරයාගේ තීන්දුව සමාලෝචනය කිරීමට රජය කටයුතු කරමින් සිටින බව පවසමිනි.

“මේ නීතිපතිවරයාගේ තීන්දුව ගැන ආණ්ඩුව අධ්‍යයනය කරමින් සිටිනවා. ඉදිරියේදි ප්‍රකාශයක් කරන්න සුදානම්. මෙය රටේ ප්‍රජාතන්ත්‍රවාදය සහ නීතිය ගැන ජනතාව බලා සිටින ප්‍රශ්නයක්.”

එම මතය බැහැර කරමින් නෛතික කරුණු දක්වන නීතිඥ සංගමය පෙන්වා දෙන්නේ නීතිපතිවරයා විසින් ගනු ලබන තීන්දු හෝ දෙනු ලබන නියෝග සම්බන්ධයෙන් යම් පාර්ශවයකට අගතියක් සිදුවන්නේ නම් එයට එරෙහිව ගත හැකි ක්‍රියාමාර්ගය වන්නේ ඉහළ අධිකරණයක් හමුවේ රීට් ආඥාවක් ඉල්ලීම හෝ මූලීක අයිතිවාසිකම් පෙත්සමක් ගොනු කොට කරුණු ඉදිරිපත් කිරීම බවයි. එසේ නොමැතිව නීතිපතිවරයාගේ තීන්දු දේශපාලන වශයෙන් සමාලෝචනය කිරීමට නෛතික ප්‍රතිපාදන නොමැති බවද සංගමය පෙන්වා දෙයි.
නීතිපති විසින් පොලිසියට දෙන ලද නියමය හෙලා දකිමින් වීදියේ විරෝධය පා බ්‍රහස්පතින්දා (6) නීතිඥයන් සමගින් නීතිපති කාර්යාලයට ගිය මාධ්‍යවේදීන්ටද උපදෙස් ලැබී තිබුනේ උසාවි යන ලෙසයි.

වින්දිතයන්ට හෝ පුරවැසියන්ට උත්තර දීමට බැඳී නැතැයි නීතිපති කාර්යාලයෙන් තමන්ට දැනුම් දෙන ලද බව විරෝධය කැඳවූ තරුණ මාධ්‍යවේදීන්ගේ සංගමයේ තරිඳු ජයවර්ධන ජනමාධ්‍ය හමුවේ කියා සිටියේය.

විරෝධතාවලින් පසුව සිකුරාදා (07) නීතිපතිවරයා කැඳවා කරුණු විමසා තිබුණු ජනාධිපති අනුර කුමාර දිසානායකට එහිදි නීතිපතිවරයා සහ සෙසු නිලධාරින් පවසා තිබුණේ විමර්ශනවල පවතින දෝෂ සහගත භාවය මත අදාල සැකකරුවන්ව නිදහස් කිරීමට සිදුවු බවකි.

නීතිපති දෙපාර්තමේන්තුව යනු ස්වාධීන ආයතනයක් බවත් එහි කටයුතුවට මැදිහත්වීම් කිරීම නුසුදුසු බවත් නීතිපති ප්‍රමුඛ නිලධාරින් විසින් එතැනදීද පෙන්වා දී ඇතැයි වාර්තාවේ.

ලසන්ත ඝාතනය සම්බන්ධ විමර්ශන මෙහෙයවූ රහස් පොලිසිය භාර නියෝජ්‍ය පොලිස්පති නව රජයේ මහජන ආරක්ෂක ලේකම් රවී සෙනෙවිරත්නද එම සාකච්ඡාවට සහභාගී වී තිබුණි. විමර්ශන සම්බන්ධයෙන් ඔහු පල කළ අදහසක් රජය හෝ නීතිපති කාර්යාලය විසින් හෝ ප්‍රසිද්ධියට පත් කර නැත.

නිදහස් කළේ CID විමර්ශන දෝෂ නිසා

එම හමුවෙන් අනතුරුව නීතිපති දෙපාර්තමේන්තුව පවසා තිබුනේ අදාළ සැකකරුවන් නිදහස් කිරීමට නිර්දේශ කරන ලද්දේ අපරාධ පරික්ෂණ දෙපාර්තමේන්තුව (CID) විසින් ඔවුන් සම්බන්ධයෙන් කරන ලද විමර්ශනවල පවතින දෝෂ හේතු කොට ගෙන බවයි.

“ඉදිරිපත් වූ කරුණු අනුව සහ එම හඳුනා ගැනීම් සම්බන්ධයෙන් උද්ගත වූ නෛතික දුර්වලතා හේතු කොට ගෙන අපරාධ චෝදනා ගොනු කිරීමට තරම් ප්‍රමාණවත් සාක්ෂි නොමැති වීම මත නිදහස් කිරීමට තීරණය කරන ලදී, ” යි නීතිපතිවරයා වෙනුවෙන් පරිපාලන නිලධාරි නීතිඥ ඇන්ජලෝ වැන්හෝෆ්ගේ අත්සනින් නිකුත් කරන ලද නිවේදනයක දැක්වේ.

අදාල සැකකරුවන් නිදහස් කිරීමේ නීතිපති තීන්දුව විසින් ගනු ලැබු ස්ථාවරය දේශපාලන හෝ බාහිර පාර්ශවයන් විසින් හෝ ප්‍රශ්න කිරීම හෙලා දකිමින් දිගින් දිගටම කරුණු දක්වා ඇති ශ්‍රි ලංකා නීතිඥ සංගමය පවසන්නේ එය නීතියේ ආධිපත්‍යයට එරෙහි වීමක් ලෙස තම සංගමය සලකන බවකි.

“රජයේ බලධාරියකු විසින් ගන්නා ලද තීන්දු පිළිබඳ විවාදය ප්‍රජාතන්ත්‍රවාදී සමාජයක තීරණාත්මක අංගයක් වන්නා සේම, මේ බලධාරීන්ගේ ස්වාධීනත්වය රක්ෂා කිරීමද ඒ හා සමානවම වැදගත් වෙයි. නීතී නිලධාරින් සහ අර්ධ නීතී නිලධාරින් විසින් නීතිය අනුව යමින් ගන්නා තීන්දු ඇතැම්විට එයාකාරයෙන්ම මහජන මතය පිළිබිඹු නොකරනවා විය හැකි බව තේරුම් ගත යුතු වන්නේය,” යි ශ්‍රී ලංකා නීතිඥ සංගමය ජනාධිපතිවරයාට සිහිපත් කර දී තිබේ.

ඝාතනයට ලක්වු මාධ්‍යවේදී ලසන්ත වික්‍රමතුංගගේ දියණිය අහිම්සා වික්‍රමතුංග විසින් අග්‍රාමාත්‍යවරිගෙන් ලිඛිතව ඉල්ලා තිබුණේ රාජකාරිය පැහැර හැරීම සම්බන්ධයෙන් චෝදනා එල්ල කොට නීතිපතිවරයාට එරෙහිව පාර්ලීමේන්තුව හමුවට දෝෂාභියෝග යෝජනාවක් ඉදිරිපත් කිරීමට කටයුතු කරන ලෙසයි.

ඇගේ ලිපියට පාර්ලිමේන්තුවේ පිලිතුරු දෙමින් අගමැතිනි හරිනි අමරසූරිය කියා සිටියේ යුක්තිය ඉටු කිරීම සඳහා ගත හැකි සෑම පියවරක්ම ගන්නා බවත්, අවශ්‍ය නම් අලුතින් විමර්ශන ආරම්භ කිරීමට සුදානම් බවත් ය.

අලුතින් සාක්ෂි හමුවේ නම් ‘අපරාධ චෝදනා ගොනු කිරීම සලකා බැලීමට බාධාවක් නොවන’ බවට නීතිපති දෙපාර්තමේන්තු නිවේදනය සහතික වී තිබේ.

එකිනෙකාට චෝදනා

මහජන අවධානය දිනාගත් පසුගිය කාලයේ සිදුවු අපරාධවල විමර්ශන ප්‍රගතිය සම්බන්ධයෙන් ගෙවුණු මාසයක දෙකක කාලය පුරාම නීතිපති දෙපාර්තමේන්තුවත්, පොලිසියේ අපරාධ පරික්ෂණ දෙපාර්තමේන්තුවත් එකිනෙකාට එරෙහිව චෝදනා එල්ල කර ගනිමින් සිටින අතර ජනාධිපතිවරයා පවා විටෙක පවසා තිබුණේ නඩු පැවරීමේ ප්‍රමාදයට හේතුව නීතිපති දෙපාර්තමේන්තුවේ පවතින අකාර්යක්ෂමතාවය බවයි.

මේ සම්බන්ධයෙන් කරන ලද විමසීමකදි සිය අනන්‍යතාවය සඳහන් නොකරන්නැයි ඉල්ලමින් ජ්‍යෙෂ්ට නීතිඥවරයෙකු පවසා සිටියේ අපරාධ නඩුවලදි අපරාධ පරීක්ෂයන්ට මෙන්ම නීතිපති දෙපාර්තමේන්තුවටද පැහැදිලි වගකීම් තිබෙන බැවින් අපරාධකරුවන්ට ගැලවී යාමට ඉඩනොදීමේ වගකීමෙන් ගැලවී යෑමට ඒ කිසිදු පාර්ශවයකට නොහැකි බවයි.