දෙමළ ඊළම් විමුක්ති කොටි සංවිධානයේ හිටපු සාමාජිකයන් පිරිසක් සමග ඇමරිකා එක්සත් ජනපද රාජ්‍ය දෙපාර්තමේන්තුවේ ඉහළ නිලධාරීන් ශ්‍රී ලංකවේ මැතිවරණය සම්බන්ධයෙන් සාකච්ඡා පවත්වා තිබේ.
හිටපු කොටි සටන්කාමීන්ට සදාකාලික ආරක්ෂාව සැලසෙන්නේ ප්‍රජාතන්ත්‍රවාදී දේශපාලන තලයේ ලබාගන්නා මැතිවරණ ජයග්‍රහණ තුලින් පමණක් බව යාපනයේදී තමන් හමුවූ එක්සත් ජනපද රාජ්‍ය දෙපාර්තමේන්තුවේ විදේශ කටයුතු නිලධාරිනී ක්‍රිස්ටිනා ජේම්ස් පැවසු බව ප්‍රජාතන්ත්‍රවාදී සටන්කාමීන්ගේ පක්ෂයේ ප්‍රකාශක කේ තුලසි ප්‍රකාශ කරයි.
ශ්‍රී ලංකාවේ ජාතික ප්‍රශ්නය විසඳීමේ ප්‍රධාන මාර්ගය බලය විමධ්‍යගත කිරීම බව එම පක්ෂයේ නායකයන් එක්සත් ජනපද දූත මණ්ඩලයට පෙන්වා දී තිබේ.
හිටපු එල්ටීටීඊ සාමාජිකයන්ට රජයේ ආරක්ෂක අංශ වලින් දිගින් දිගටම අඩන්තේට්ටම් සිදු කෙරෙන්නේ යයි තමන් විසින් එක්සත් ජනපද නිලධාරීන්ට කියා සිටි බවද ප්‍රජාතන්ත්‍රවාදී සටන්කාමීන්ගේ පක්ෂය පවසයි.
ත්‍රස්ත විරෝධී කටයුතු සහ සන්නද්ධ කණ්ඩායම් ප්‍රධාන දේශපාලන ප්‍රවාහයට රැගෙන ඒම සම්බන්ධ විශේෂඥවරියක වන ක්‍රිස්ටිනා ජේම්ස් සමග කොළඹ එක්සත් ජනපද තානාපති කාර්යාලයේ දේශපාලන අංශයේ ෂෝන් රූත ද සහභාගි වී තිබේ.
කෙසේ වෙතත් යාපනයේ පැවති සාකච්ඡා පිළිබඳව එක්සත් ජනපද බලධාරින් කිසිවක් හෙළි කර නැත.
Facebook Comments
