රට තුළ උද්ගතව ඇති විදුලි අර්බුදයට හේතුව ජල විදුලි අර්බුදයක් හෝ කාලගුණයේ ප්‍රශ්නය නොව අර්බුදයට හේතුව විදුලි මාෆියාව බව ජනතා විමුක්ති පෙරමුණ පෙන්වා දී තිබේ.
මෙම විදුලි වංචාකරුවන් අතර ජනාධිපතිවරයාගේ ඥාතීන්ද සිටින බව එම පෙරමුණේ පාර්ලිමේන්තු මන්ත්‍රී සුනිල් හඳුන්නෙත්ති 03 බදාදා පැවති මාධ්‍ය හමුවක දී කියා සිටියේය.
“මෛත‍්‍රීපාල සිරිසේන ජනාධිපතිවරයාත් චෝදනා එල්ල කරන්නේ මහජන උපයෝගිතා කොමිසමටයි. ඇයි ඒ. ඔහුගේ හිතවතුන් මේ ජාවාරමේ ඉන්නවා. රවී කරුණානායක ඇමතිවරයාත් මේ ජාවාරමට සම්බන්ධයි.” මන්ත්‍රීවරයා පැවසීය.
වත්මන් විදුලි අර්බුදය පිළිබඳව 2016 වසරේ දී මහජන උපයෝගිතා කොමිසම විදුලි බල මණ්ඩලයට හා ආර්ථීක කළමණාකරන කමිටුවට දැනුම් දුන් බව කී සුනිල් හඳුන්නෙත්ති මන්ත්‍රීවරයා එහෙත් ඒ සඳහා කිසිඳු පියවරක් නොගත් බවට චෝදනා කළේය.
ලෝකයේ අනෙක් රටවල් විකල්ප බලශක්ති ප‍්‍රභවයන් කරා ගමන් කරන විට මෙරට බලධාරින් වැස්ස ලැබෙන තුරු බලා සිටින බවත් ජාවාරම් නවතා විදුලි අර්බුදයට ඇත්ත විසඳුම් සොයන ලෙසටත් පාර්ලිමේන්තු මන්ත්‍රී සුනිල් හඳුන්නෙත්ති වැඩි දුරටත් රජයට බල කර සිටී.
Facebook Comments
