චම්පිකට නඩු දාන්න “නීතිපතිට උඩින් පොලිසිය ගිහින්” (VIDEO)

0
Ivory Agency Sri Lanka
wedding people

හිටපු අමාත්‍ය පාඨලී චම්පික රණවක සම්බන්ධ රිය අනතුරු නඩුවේ නීතිපතිවරයාගේ උපදෙස් වලට පිටින් පොලිසිය විසින් චෝදනා ගොනු කර ඇති බවට අධිකරණය පෙන්වා දී තිබේ.

2016 වසරේ රාජගිරිය ප්‍රදේශයේ ඇතිවූ රිය අනතුරු සිද්ධිය සම්බන්ධයෙන් අත්අඩංගුවට ගෙන රක්ෂිත බන්ධනාගාර සිටි හිටපු අමාත්‍යවරයාට ඇප ලබා දෙමින් 24 අඟහරුවාදා කොළඹ අතිරේක මහේස්ත්‍රාත් කාංචනා නෙරංජනා ද සිල්වා මේ බව කියා සිටියාය.

සැකකරු අත්අඩංගුවට ගැනීමේදී නීතිපතිවරයා විසින් පොදු දේපොළ පනත යටතේ අත්අඩංගුවට ගතයුතු බවට උපදෙස් ලබාදී නොමැති පැවසු මහේස්ත්‍රාත්වරිය සැකකරු විසින් සිදුකළ රිය අනතුර තුළින් රජයේ දේපළක් වන ජීප් රථයකට රුපියල් 917244/- ක අලාභයක් සිදුව ඇති බවට සඳහන් කරමින් පොදු දේපළ පනත යටතේ අධිකරණයට කරුණු වාර්තාකර තිබුණද නීතිපතිවරයාගේ උපදෙස් වලින් තොරව පොලිසිය විසින් මෙම නඩුවට අදාළ බී වාර්තාවට පොදු දේපල පනත ඇතුලත් කර ඇති බව සඳහන් කළේය.

ඒ අනුව ඇප ප්‍රතික්ෂේප කිරීමට තරම් කිසිදු කරුණක් අනාවරණය නොවන හෙයින් සැකකාර චම්පික රණවක ඇප මත මුදා හරින බව මහේස්ත්‍රාත්වරිය පවසා ඇත.

රුපියල් 25000 ක මුදල් ඇප සහ රුපියල් ලක්ෂ 5 බැගින් වූ ශරීර ඇප දෙකක් මත හිටපු අමාත්‍ය පාඨලී චම්පික රණවක මුදා හැරීමට නියෝග කළ කොළඹ අතිරේක මහේස්ත්‍රාත්වරිය සෑම මසකම අවසන් ඉරු දින පෙරවරු 9ත් 12ත් අතර කොළඹ අපරාධ කොට්ඨාශයට වාර්තා කළ යුතු බවටද නියම කර තිබේ.

සාක්ෂිකරුවන්ට බලපෑම් කිරීමෙන් වළකින ලෙස ද මහෙස්ත්‍රාත්වරිය විසින් අවවාද කළාය.

ප්‍රජාතන්ත්‍රවාදය හා නිදහස පිළිබඳ අරගලය ඉදිරියට ගෙන යන බවත් මාංචු වලින් හෝ සිරකඳවුරු වල දමා අරගලය නැවැත්විය නොහැකි බව ඇප ලබා අධිකරණයෙන් පිටතට පැමිණි හිටපු අමාත්‍ය පාඨලී චම්පික රණවක මාධ්‍ය වෙත කියා සිටියේය.

මේ අතර එම සිද්ධිය සම්බන්ධයෙන්ම අත් අඩංගුවට ගත් පාඨලී චම්පික රණවකගේ රියදුරා වන තුසිත කුමාර එළැඹෙන 06 දා තෙක් රක්ෂිත බන්ධනාගාර ගත කිරීමට කොළඹ මහේස්ත්‍රාත් අධිකරණය නියෝග කර ඇත.

Facebook Comments