ජාතික සංහිඳියා අලුත් අවුරුදු උත්සවය “සමගි අවුරුදු උදානය – 2019” නමින් යාපනය දුරෛයප්පා ක්‍රීඩාංගනයේදී පැවැත්වීමට කටයුතු සුදානම් කර තිබේ.
ජාතික සමගිය හා සංහිඳියා කාර්යාංශය , ජාතික ඒකාබද්ධතා, රාජ්‍ය භාෂා සමාජ ප්‍රගති හා හින්දු ආගමික කටයුතු අමාත්‍යාංශය සහ යාපනය දිස්ත්‍රික් ලේකම් කාර්යාලය ඒකාබද්ධව සංවිධාන කරනු ලබන ජාතික සංහිඳියා අලුත් අවුරුදු උත්සවය 09 අඟහරුවාදා දවස පුරා පැවැත්වෙන බවයි සංවිධායකයින් පවසන්නේ.
ජාතිය, ආගම, තරාතිරම කුමක් වුවද සංස්කෘතික විවිධත්වය පිළිගනිමින්, අගයමින්, සියල්ලන් සමඟ සතුටින්, සාමයෙන්, සංහිඳියාවෙන් යුතුව දිවි ගෙවීමට මෙම අලුත් අවුරුද්ද නව ඇරඹුමක් කරගනිමුයි යන අධිෂ්ධානයෙන් අවුරුදු උත්සවය සංවිධානය කර ඇත.
මෙම ජාතික සංහිඳියා අවුරුදු උත්සවයේ දී සිංහල හා දෙමළ අලුත් අවුරුදු චාරිත්‍ර වාරිත්‍ර හා අවුරුදු ක්‍රීඩා පැවැත්වෙන බවයි සංවිධායකයින් නිවේදනය කරන්නේ.
උත්සවයේ ප්‍රධාන ආරාධිත අමුත්තන් ලෙස ජාතික සමගිය හා සංහිඳියා කාර්යාංශයේ සභාපතිනී හිටපු ජනධිපතිනිය චන්ද්‍රිකා බණ්ඩාරනායක කුමාරතුංග සහ ජාතික ඒකාබද්ධතා, රාජ්‍ය භාෂා. සමාජ ප්‍රගති හා හින්දු ආගමික කටයුතු අමාත්‍ය මනෝ ගනේශන් සහභාගී වීමට නියමිතව ඇත.
දීර්ඝ කාලයක් යුද්ධයෙන් පිඩනයට පත් ජනතාවක් වාසය කරන මෙම පළාතේ ජිවත් වන සියලු ජන කොටස් සම්බන්ධ කර ගනිමින් මෙම උත්සවය පැවැත්වීම ජාතික සංහිදියාව වැඩි දියුණු කිරීමට රුකුලක් වනු ඇති බවට සංවිධායකයින් විශ්වාසය පළ කරති.
Facebook Comments
