එළඹෙන ජනාධිපතිවරණය සඳහා ඉදිරිපත් කරන තම පක්ෂයේ අපේක්ෂකයා තවත් නොබෝ දිනකින් ප්‍රකාශයට පත්කරන බව ශ්‍රී ලංකා පොදුජන පෙරමුණේ නිර්මාතෘ සහ හිටපු ඇමැති බැසිල් රාජපක්ෂ ප්‍රකාශ කර තිබේ.
ජනාධිපතිවරණය පමණක් නොව ඕනෑම මැතිවරණයක් සඳහා ශ්‍රී ලංකා පොදුජන පෙරමුණ සූදානම් බව පෙන්වාදෙන බැසිල් රාජපක්ෂ, ජයග්‍රහණය කළහැකි අපේක්ෂකයෙකු ඉදිරි ජනාධිපතිවරණය සඳහා ඉදිරිපත් කරන බවද එම ජයග්‍රහණය රටේ අනාගතය තීරණය කරන්නක් බවද පෙන්වාදෙයි.
බත්තරමුල්ලේ පිහිටා තිබෙන ශ්‍රී ලංකා පොදුජන පෙරමුණේ ජාතික මැතිවරණ මෙහෙයුම් කාර්යාලය විවෘත කිරීමේ අවස්ථාවට එක්වූ පසු මාධ්‍ය වෙත අදහස් දක්වමින් ඔහු මේ බව සදහන් කළේය.
එහිදී වැඩිදුරටත් අදහස් දක්වමින් ඔහු පෙන්වා දුන්නේ එළඹෙන ජනාධිපතිවරණය සඳහා ශ්‍රී ලංකා පොදුජන පෙරමුණ සූදානම් නමුත් ඒ සඳහා ඉදිරිපත් වන අපේක්ෂකයා මේ දක්වා තීරණය කර නොමැති බවයි.
වත්මන් ජනාධිපති රනිල් වික්‍රමසිංහ සිය ස්ථාවරය එළඹෙන 18 දාට පෙර දැනුම්දෙන බවට ප්‍රකාශයක් කර ඇතැයි පෙන්වාදුන් බැසිල් රාජපක්ෂ, තම පක්ෂයෙන් ඉදිරිපත් වන අපේක්ෂකයා සම්බන්ධයෙන් වන තීන්දුව ඉතා ඉක්මණින් ගන්නා බවද පැවසීය. පක්ෂයේ තීන්දුව ගත් පසුව නායකත්වයට දන්වන බව සදහන් කළ බැසිල් රාජපක්ෂ, වත්මන් ජනාධිපතිවරයාට සහයා ලබාදෙනවා ද නැද්ද යන්න සම්බන්ධයෙන් අවසන් තීරණය පක්ෂය විසින් ගන්නා බවද සදහන් කළේය.
කෙසේ වුවද තරුණයන්ට අවස්ථාවක් ලබාදෙන පක්ෂයක් ලෙස ජාතික සංවිධායකවරයා වශයෙන් නාමල් රාජපක්ෂ තෝරාගෙන තිබෙන බවද හෙතෙම පෙන්වා දුන්නේය.
මේ අතර ඔහු තවදුරටත් කියා සිටියේ, රට වෙනුවෙන් ඕනෑම අයෙකු සමඟ එක්ව කටයුතු කිරීමට මෙන්ම වෙන්ව කටයුතු කිරීමට ද ශ්‍රී ලංකා පොදුජන පෙරමුණ සූදානම් බවයි.
ඉදිරියේ දී පැවැත්වෙන සෑම මැතිවරණයකම විජයග්‍රහණයට පෙරමඟ සකසමින් පක්ෂ මූලස්ථානයට අනුබද්ධව ස්ථාපිත කළ ශ්‍රී ලංකා පොදුජන පෙරමුණේ ජාතික මැතිවරණ මෙහෙයුම් කාර්යාලය, එම පක්ෂයේ නිර්මාතෘ හා හිටපු ඇමැති බැසිල් රාජපක්ෂ ගේ ප්‍රධානත්වයෙන් අද (10) විවෘත කෙරිණි.
බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණ පක්ෂ මූලස්ථානය ආසන්නයේ මෙම මැතිවරණ මෙහෙයුම් කාර්යාලය පිහිටා තිබෙන අතර එළඹෙන ජනාධිපතිවරණය සඳහා මැතිවරණ කොමිසන් සභාව විසින් දින නියම කිරීමෙන් පසුදින එම කාර්යාලය විවෘත කිරීම ද විශේෂත්වයකි.
Facebook Comments
