හමුදාවෙන් නිදහස් කරගත් ඉඩම්වලට යන්න පාර හදාගන්න මාස එකහමාරක්

ජනාධිපතිවරයා විසින් මාස එක හමාරකට ඉහත දී නිදහස් කළ, වසර ගණනාවක් තිස්සේ යුද හමුදාව වාඩි ලා සිටි දෙමළ ජනයාට අයත් අක්කර දෙසියකට වැඩි උතුරේ භුමියකට පහසුවෙන් යාම ඊම සඳහා මාර්ග විවෘත කරදීම සදහා මැදිහත්වීමට උතුරු පළාත් ආණ්ඩුකාරවරියට සිදුව තිබේ.

යාපනයේ සංචාරයක යෙදී සිටියදී රනිල් වික්‍රමසිංහ ජනාධිපතිවරයා විසින් දෙමළ ජනයාට අයත් වලිකාමම් උතුරේ තෙල්ලිපලෙයි ඔට්ටගපුලම් ප්‍රදේශයේ අක්කර 234.8 ක භුමියක් මාර්තු 22 වැනිදා හමුදා ග්‍රහණයෙන් මුදා හරින ලදී.

පළාත් බද වාර්තාකරුවන් පවසන පරිදි ඉඩම් හිමියන්ට පිවිසීමට පහසු වන පරිදි ප්‍රවේශ මාර්ග විවෘත කර ඇත්තේ උතුරු පළාත් ආණ්ඩුකාර පී.එස්.එම්. චාල්ස් විසින් මැයි 7 වැනිදා ආරක්ෂක බලධාරීන් හමුවී ඉල්ලීමක් කිරීමෙන් අනතුරුවයි.

මේ වනවිට මාර්ග දෙකක් විවෘත කරගැනීමට ආණ්ඩුකාරවරියට හැකිවී තිබේ.

“පොන්නාලෙයි – බටහිර වෙරළ ආශ්‍රිත පාර පලාලි උතුර පාසල අසලින් සහ ගුවන්තොටුපල පාර මරුතඩි හන්දියේ සිට පලාලි වීරප්පලෙයි පාර දෙසට විවෘත කර ඇත. මීට අමතරව ගුවන් තොටුපල පාර සහ ඔට්ටගපුලම් ප්‍රධාන මාර්ගයේ නිදහස් කර ඇති ඉඩම් වෙත යාමට දැනටමත් අවසර ලබා දී ඇත,” යනුවෙන් උතුරු පළාත් සභාව විසින් මැයි 10 වැනිදා නිවේදනය කර තිබේ.

මාර්තු 22 වැනිදා යාපනය ඔට්ටගපුලම් ප්‍රදේශයේදී පැවති ‘උරුමය’ වැඩසටහනේ සින්නක්කර ඉඩම් ඔප්පු ලබාදීමේ වැඩසටහනට සමගාමීව, යාපනය ආරක්ෂක සේනා මූලස්ථානය විසින් වසර ගණනාවක් තිස්සේ වාඩි ලා සිටි දෙමළ ජනයාගේ ඉඩම් නිදහස් කිරීම ජනාධිපති රනිල් වික්‍රමසිංහගේ ප්‍රධානත්වයෙන් සිදු කර තිබුනේ පලාලි ගුවන් හමුදා කඳවුරේ දීය.

යාපනය ආඥාපති මේජර් ජෙනරාල් චන්දන වික්‍රමසිංහ විසින් එදින ජනාධිපතිවරයා අත පත් කරන ලද ඉඩම් නිදහස් කිරීමේ නිල ලිපි ලේඛන, අනතුරුව ජනාධිපති රනිල් වික්‍රමසිංහ විසින් යාපනය දිසාපති මරුදලිංගම් ප්‍රදීපන් ට භාර දී තිබේ.

ඒ අනුව වලිකාමම් උතුර ප්‍රාදේශීය කොට්ඨාසයේ ග්‍රාම සේවා වසම් පහකට අයත් අක්කර 234 ක් මෙලෙස සාමාන්‍ය ජනතාවට ලබාදීම සිදු කෙරුණු අතර එම ඉඩම් රජයේ කෘෂි නවීකරණ වැඩසටහනට සමගාමීව කෘෂිකාර්මික කටයුතු වෙනුවෙන් යොදා ගැනීමට නියමිත බව ජනාධිපති මාධ්‍ය ඒකකය නිවේදනය කර තිබුනි.

එලෙස නිදහස් කර තිබුනේ වාසවිලාන් නැගෙනහිර (J/244), වාසවිලාන් බටහිර (J/245), පලාලි උතුර (J/254), පලාලි නැගෙනහිර (J/253), පලාලි දකුණ (J/252) යන ග්‍රාම නිලධාරී කොට්ඨාස යටතේ අක්කර 234.8ක භුමියකි.

ඉඩම් නිදහස් කිරීමේ රාජ්‍ය උත්සවයෙන් පසු අප්‍රේල් 30 වැනිදා දක්වා ගතවු දින 40 ට ආසන්න කාලය තුලදී දෙමළ ඉඩම් හිමිකරුවන්ට සිය ඉඩම් දැකබලාගැනීමේ අවස්ථාව ලැබී ඇත්තේ එක් වරක් පමණක් බව අප්‍රේල් 30 වැනිදා උතුරු පළාත් ආණ්ඩුකාර කාර්යාලයේ දී නැවන පදිංචි කිරීම් සම්බන්ධයෙන් පැවැති සාකච්ඡාවක දී ඉඩම් හිමියන් ආණ්ඩුකාරවරියට දැනුම් දී තිබේ.

ඒ සම්බන්ධයෙන් ආණ්ඩුකාරවරිය විසින් යුද හමුදාව දැනුම් දීමෙන් පසුව මැයි 1 වැනිදා සිට සිය ඉඩම් සුද්ද පවිත්‍ර කරගැනිම සදහා ඉඩම් හිමියන්ට අවසරය ලැබුනත් අධි ආරක්ෂිත කලාපයේ වැට හේතුවෙන් කිලෝ මීටර් හතර හමාරක් වැනි දීර්ඝ දුරක් ගෙවා දමමින් දෙමළ ඉඩම් හිමියන්ට සිය භුමිය වෙත ලගා වීමට සිදුව ඇත.

නිදහස් කළ ඉඩම්වලට පහසුවෙන් ඇතුළු විය හැකි පරිදි මාර්ග විවෘත කරදෙන මෙන් ජනතාව අවසර ඉල්ලා සිටි බැවින් උතුරු පළාත් ආණ්ඩුකාර පී.එස්. එම්. චාල්ස් ආරක්ෂක අංශ සමඟ සාකච්ඡා කර එම අවසරය ලබා දීමට කටයුතු කළ බවයි පළාත් බද වාර්තාකරුවන් පවසන්නේ.

ඒ අනුව නිදහස් කළ ඉඩමට පොන්නාලෙයි – පේදුරු තුඩුව වෙරළ පාරේ කන්නගි අම්මාන් කෝවිල් හන්දියෙන් නාගතම්බිරාන් කෝවිල් පාර හරහා මෙන්ම වීරප්පලෙයි පාරේ පලාලි පාර දෙසට මීටර් 100 ක් දුරින් සහ (ගුවන්තොටුපල පාර) හරහා වීරප්පලෙයි හන්දියෙන් දකුණට ඇතුළු විය හැකිි බවත් උතුරු පළාත් සභාව සිය නිල වෙබ් අඩවියේ නිවේදනය කර තිබුණි.

නමුත් පළාත් බද වාර්තාකරුවන් පවසන්නේ මැයි 9 වැනි බ්‍රහස්පතින්දා වන විටත් ඉඩම් හිමියන්ට එම මාර්ගය විවෘත වී නොතිබුණු බවයි.

මෙහි පදිංචි පවුල් 327ක් තම ඉඩම් හිමිකම් ලියාපදිංචි කර ඇති අතර ඒ අතරින් පවුල් 171ක් තම ඉඩම් සලකුණු කර එළිපෙහෙළි කිරීම ආරම්භ කර ඇති බව උතුරු පළාත් සභා වෙබ් අඩවියේ වැඩි දුරටත් සදහන්ය.

ඉඩම් සලකුණු කර පිරිසිදු කිරීමේ කටයුතු ඉතා කඩිනමින් ආරම්භ කිරීමට කටයුතු කරන ලෙස උතුරු පළාත් සභාව සෙසු පුද්ගලයන්ගෙන්ද ඉල්ලා සිටී.

ඒ සම්බන්ධ වියදම් දරනු ලබන්නේ කවුරුන් විසින්ද යන්න පැහැදිලි නැත.