අධිකරණයට අපහාස කිරීමේ චෝදනාව සම්බන්ධයෙන් දැනට සිරදඩුවම් විදින හිටපු පාර්ලිමේන්තු මන්ත්‍රී රන්ජන් රාමනායක හට සමාව දෙන ලෙස හිටපු ජනාධිපතිනි විසින් වත්මන් ජනාධිපතිවරයාගෙන් ඉල්ලා ඇත.
රංගන ශිල්පියෙකු, සමාජ සේවකයෙකු මෙන්ම දේශපාලනඥයෙකු ලෙසද රන්ජන් රාමනායක මෙරට පොදු ජනතාව වෙනුවෙන් අවංකව කැප වී කටයුතු කරමින් ඔහුගේ පෞද්ගලික ධනය පවා ජනතාවගේ සුබසිද්ධිය වෙනුවෙන් වැය කළ අයෙකු බව හිටපු ජනාධිපතිනි චන්ද්‍රිකා බණ්ඩාරනායක ජනාධිපති ගෝඨාභය රාජපක්ෂ වෙත යවා ඇති ලිපියකින් සිහිපත් කර දී තිබේ.
බරපතල වැරදි හේතුවෙන් අධිකරණයෙන් සිරදඩුවම් ලබා දුන් කිහිප දෙනෙකුටම රජයෙන් නිදහස ලබා දුන් හෙයින් බරපතල නොවන චෝදනාවකට හිටපු පාර්ලිමේන්තු මන්ත්‍රීවරයා මෙලෙස දුක්විදීමට සිදුවීම අවාසනාවන්ත කරුණක් බව ඇය පෙන්වා දෙයි.
එබැවින් වසර 04 ක සිර දඩුවමක් නියමවී සිටින රන්ජන් රාමනායක ඉන් මාස 8ක කාලයක් ගෙවා ඇති නිසා ජනාධිපති සමාව ලබා දීමට කාරුණික වන ලෙසයි හිටපු ජනාධිපතිනී චන්ද්‍රිකා බණ්ඩාරනායක කුමාරතුංග ජනාධිපති ගෝඨාභය රාජපක්ෂගෙන් තව දුරටත් ඉල්ලා සිටී.
මේ අතර සැප්තැම්බර් 12 වනදාට යෙදී ඇති ජාත්‍යන්තර සිරකරුවන්ගේ දිනයේදී ජනාධිපතිවරයා විසින් රන්ජන් රමානායක හට ජනපති සමාව ලබා දෙනු ඇතැයි විශ්වාස කරන බව විපක්ෂ නායක සජිත් ප්‍රේමදාස ට්විටර් පණිවිඩයක් නිකුත් කරමින් ප්‍රකාශ කර ඇත.
Facebook Comments
