උතුරු නැගෙනහිර සංවර්ධන සැලැස්ම පිළිබඳ පාර්ලිමේන්තුව නියෝජනය කරන පක්ෂ නායකයන් කැදවා ජනාධිපතිවරයා අගනගරයේ බහු පාක්ෂික සමුළුවක් කැදවා දෙදිනක් ගත වෙද්දී, යුද පීඩිත වන්නියෙන් මතුවූ අලුත්ම සමූහ මිනීවලේ විමර්ශන කටයුතු සඳහා ජාත්‍යන්තර විශේෂඥයන් හවුල්කරගන්නා ලෙස බලකරමින් උතුරු පළාතේ දැවැන්ත එක් දින හර්තාලයක් දියත් කර තිබේ.
කොක්කුතොඩුවායි සමූහ මිනිස් සුසානයට සාධාරණයක් ඉටු කිරීම සදහා එහි කැනීමේ කටයුතු වලට ජාත්‍යන්තර විශේෂඥ දැනුම සහ අධීක්‍ෂණය අත්‍යවශ්‍ය බවට ඉල්ලා සිටි හර්තාලයේ මුලික ඉල්ලීම් අතර කුරුන්තුර් පුරා විද්‍යා භුමිය ඇතුළු දෙමළ නිජබිම පුරා සිදුවන සිංහල බෞද්ධ ආක්‍රමණයට හා යුද හමුදාව සිවිල් කටයුතු සදහා මැදිහත් වීමට විරෝධය පෑමත් වු බව පළාත් බද වාර්තාකරුවෝ පවසති.
වන්නියෙන් මතුවූ අලුත්ම සමූහ මිනීවලේ විමර්ශන කටයුතු දින නියමයක් නැතිව මේ වන විට කල් ගොස් තිබේ. විමර්ශන කටයුතු සඳහා ජාත්‍යන්තර විශේෂඥයන් හවුල් කර නොගැනීමට පසුගියදා පැවති ඉහල පෙලේ සාකච්ඡාවකදී තීන්දු කිරීම යුද පීඩිත ප්‍රදේශවාසීන්ගේ බලවත් කනස්සල්ලට හේතුවී ඇත. මීළඟ අධිකරණ දිනය නියමිතව ඇත්තේ අගෝස්තු 8 ටය.
දෙමළ ජනයා පාරම්පරිකව විසු ප්‍රදේශවල සිංහල ජනපද පිහිටුවමින් ප්‍රදේශයේ ජන සංයුතිය වෙනස් කිරීමටත්, පාරම්පරික හින්දු කෝවිල් විනාශ කර ඒ මත බෞද්ධ විහාර නිර්මාණය කරමින් දෙමළ ජනයාගේ දිගු කාලින ඉතිහාසය විකෘති කිරීමටත්, ආණ්ඩුව කටයුතු කරන බවට විරෝධයට එක්වු දෙමළ ජනයා චෝදනා කර තිබේ.
උතුරු සහ නැගෙනහිර දෙපළාතේ බලහත්කාරයෙන් අතුරුදහන් කරනු ලැබුවන්ගේ ඥාතීන්ගේ ප්‍රධානත්වයෙන් ජුලි 28 වැනි සිකුරාදා මුලතිව්හිදී දියත් කෙරුනු විරෝධතා පා ගමනට සහ උද්ඝෝෂණයට සහාය පළ කිරීම සදහා උතුරු පළාතේ දිස්ත්‍රික්ක පහේම කඩා සාප්පු වසා දමමින් සාර්ථක හර්තාලයක් ක්‍රියාත්මක වු බව පළාත් බද වාර්තාකරුවෝ පවසති.
උතුරු පළාතේ යාපනය, කිලිනොච්චිය, මුලතිව්, වව්නියා හා මන්නාරම් දිස්ත්‍රික්කයන්හි ජනතාව හර්තාලයට සහාය දැක්වීම නිසා ආණ්ඩුවේ කාර්යාල හා දෙපාර්තමේන්තු විවෘතව තිබුන ද ඒවා ජන ශුන්‍ය ප්‍රදේශ බවට පත්ව තිබෙනු දැකගන්නට හැකිය.
බලහත්කාරයෙන් අතුරුදහන් කළ සිය සමීපතමයන්ට යුක්තිය ඉල්ලා දියත් කෙරෙන අඛණ්ඩ විරෝධතාවයට දින 2350 ක් සපිරෙන දිනයේ උදෑසන 10 ට මුලතිව් අධිකරණ සංකීර්ණය අසලින් පටන්ගත් විරෝධතා පෙළපාලිය මාන්කුලම, මුලතිව් මාර්ගය ඔස්සේ දිස්ත්‍රික් ලේකම් කාර්යාලය දක්වා පැමිණ එම ස්ථානයේද දැවැන්ත විරෝධතාවයක් දියත් කළ බව ඔවුහු වැඩි දුරටත් පවසති.
හමුදාවට බාර වූ අයට මොකද උනේ, අවුරුදු 15 ට කලින් අපි හමුදාවට බාර දුන් අය කෝ, අපිට ඕනේ ජාත්‍යන්තර යුක්තිය ආදී සටන් පාඨ හා ඉල්ලීම් මුලික කරගත් විරෝධතා පෙළපාලිය සහ උද්ඝෝෂණය සදහා උතුරු සහ නැගෙනහිර පළාතේ බලහත්කාරයෙන් අතුරුදහන් කරනු ලැබුවන්ගේ ඥාතීන්ට අමතරව, විශ්වවිද්‍යාල උපාධි අපේක්ෂකයන් හා අනධ්‍යයන සේවකයන්, දෙමළ දේශපාලන පක්ෂ නියෝජිතයන්, බිම් මට්ටමේ සංවිධාන සහ ආගමික නායකයන්ගේද සහාය හිමිව තිබේ.
යුද්ධාවසානයේ රජයේ හමුදාවට භාරවීමෙන්ද, පැහැරගනු ලැබීමෙන්ද අනතුරුව අතුරුදහන් කරන ලද සමීපතමයන්ගේ ඉරණම හෙළි කරගැනීම සඳහා දෙමළ ජනතාව ඉකුත් පහළොස් වසරකට ආසන්න කාලයක් තිස්සේ ඉල්ලා සිටින්නේ ජාත්‍යන්තර මැදිහත්වීමකි.
නැගෙනහිර ජනතාවද හවුල් වූ විරෝධතාවය සදහා පාර්ලිමේන්තුව නියෝජනය කරන උතුරේ දෙමළ ජනතා නියෝජිතයන් කිහිප දෙනකුද එක්ව සිටි බව පළත් බද වාර්තාකරුවෝ වැඩි දුරටත් පවසති.
Facebook Comments
