ඉඩම් ඉල්ලන කයිවේලි උපවාසය සති දෙකකට අත් හිටුවයි

වන සංරක්ෂණ දෙපාර්තමේන්තුව විසින් අත්පත්කරගෙන සිටින දෙමළ ජනයාට අයත් භුමියක් නිදහස් කර දීම වෙනුවෙන් උපවාසයක යෙදුනු වන්නියේ දෙමළ පවුල්, ප්‍රශ්නය විසඳීම සඳහා ප්‍රාදේශීය ඉඩම් බලධාරියාා ට දෙසතියක කාලයක් දෙමින් තම අරගලය අත් හිටුවා තිබේ.

පුදුකුඩිඉරිප්පු, පරන්තන් මාර්ගයේ කයිවේලි ප්‍රදේශයේ දී ජුලි 24 වැනිදා දෙමළ විමුක්ති කොටි සංවිධානයේ හිටපු සාමාජිකයන් පිරිසකගේ පවුල් හතරක තරුණයන් සිව් දෙනකු උපවාසයක් ආරම්භ කර තිබුනේ වන සංරක්ෂණ දෙපාර්තමේන්තුව බලහත්කාරයෙන් අත්පත්කරගෙන සිටින තම භුමිය නිදහස් කරන ලෙස බල කරමිනි.

එල්.ටී.ටී.ඊ සංවිධානය විසින් 2000 වසරේදී සිය සංවිධානයේ සාමාජික පවුල් 45 ක් වෙනුවෙන් කයිවේලි ප්‍රදේශයේ නිවාස සංකීර්ණයක් ඉදිකර දී තිබෙන අතර ඇවිලී ගිය දැඩි යුද වාතාවරණය යටතේ 2000-2009 අතර කාලය තුලදී එම පවුල් එම නිවාස වලින් ඉවත්ව වෙනත් ප්‍රදේශ කරා ගොස් තිබේ.

යුද්ධය නිමා වීමෙන් පසුව ඔවුන් යළි සිය නිවාස තිබු ස්ථාන වල පදිංචි වීමට අවස්ථා කිහිපයකදී දැරු උත්සාහයන් අසාර්ථක වු බව පෙන්වා දෙන පළාත් බද වාර්තාකරුවන් පවසන්නේ 2012 වසරේදී එම ප්‍රදේශයද ඇතුලත් වන ලෙස මායිම් ගල් යොදා එම භුමිය වන සංරක්ෂණ දෙපාර්තමේන්තුව යටතට ගත් බවයි.

2000 වසරේදී කයිවේලි නිවාස 45 ට උරුමකම් කියු පවුල් අතුරින්, පවුල් කිහිපයක් වෙනත් ප්‍රදේශ වල නිවාස ඉදිකරගෙන තිබෙන අතර තවත් පවුල් කිහිපයක සාමාජිකයන් මිය ගොස් තිබේ.

ඉතිරි පවුල් 20 ක පමණ පිරිස ජුලි මාසයේ මුලදී තාවකාලිකව නිවාස ඉදිකරගනිමින් යළි එම භුමියේ පදිංචි වීමට අවශ්‍ය කටයුතු සකස් කරමින් සිටියදී ජුලි 12 වැනිදා දහවල් කාලයේ එම ස්ථානයට තුවක්කු, පිහි, කැති, පොළු, සහිතව පැමිණි වන සංරක්ෂණ දෙපාර්තමේන්තුවේ නිළධාරීන් සිය නිවාස විනාශ කරමින් තමන්ට පහර දුන් බවට හිටපු එල්.ටී‍.ටී.ඊ සාමාජිකයන්ගේ පවුල් වල ඥාතීහු චෝදනා කරති.

ඔවුන් වැඩි දුරටත් චෝදනා කරන්නේ වන සංරක්ෂණ දෙපාර්තමේන්තුවේ නිලධාරීන් සිය නිවාස ගිනී තැබීම සදහා භුමිතෙල්ද රැගෙන ආ බවයි.

12 වැනිදා හවස පුදුකුඩිඉරිප්පු පොලිස් ස්ථානාධිපතිවරයා ඇතුළු කණ්ඩායමක් එම ස්ථානයට පැමිණ ඇති වී තිබෙන ගැටළුව සම්බන්ධයෙන් දුරකතන මාර්ගයෙන් ප්‍රාදේශිය ලේකම්වරයා හා ග්‍රාම නිලධාරීවරයාද දැනුවත් කළ ජනතාවට පොරොන්දු වී තිබුනේ ග්‍රාම නිලධාරිවරයා සමග වැඩි දුරටත් සාකච්ඡා කර විසදුමක් ලබා දෙන බවයි.

පොරොන්දු වු පරිදි විසදුම් නොලැබීම හේතුවෙන් ජුලි 24 වැනිදා පවුල් 4 ක සාමාජිකයන් පුදුකුඩිඉරිප්පු, පරන්තන් මාර්ගයේ කයිවේලි ප්‍රදේශයේ උපවාසයක් ආරම්භ කර තිබුනේ තමන්ට අයත් භුමියේ පවුල් විස්සේම ජනතාව යළි පදිංචි කරන ලෙස බල කරමිනි.

ජුලි 25 වැනිදා උපවාස භුමියට පැමිණි මුලතිව් දිස්‍ත්‍රික් අතිරේක ලේකම් කේ. කනගේෂ්වරන්, මිනින්දෝරු දෙපාර්තමේන්තුවේ නිලධාරීන්, පුදුකුඩිඉරිප්පු ප්‍රාදේශිය ලේකම් කාර්යාලයේ ඉඩම් නිලධාරීන් හා වන සංරක්ෂණ දෙපාර්තමේන්තුවේ නිලධාරීන් උපවාසකරුවන් සමග සාකච්ඡා පවත්වා වන සංරක්ෂණ දෙපාර්තමේන්තුව අත්පත්කරගෙන සිටින දෙමළ ජනයා උරුම කියන භුමිය නිරීක්ෂණය කර තිබුනි.

පළාත් බද වාර්තාකරුවන් පවසන්නේ මේ වන විට වන සංරක්ෂන දෙපාර්තමේන්තුව අත්පත්කරගෙන සිටින එම භුමිය වන සංරක්ෂන දෙපාර්තමේන්තුට අයත් භුමියක් නොවන බවට මුලතිව් දිස්‍ත්‍රික් අතිරේක ලේකම් කේ. කනගේෂ්වරන් හා පුදුකුඩිඉරිප්පු ප්‍රාදේශිය ලේකම් කාර්යාලයේ ඉඩම් නිලධාරීන් විසින් හදුනා ගන්නා ලද බවයි.

එම භුමිය වන සංරක්ෂන දෙපාර්තමේන්තුවට අයිති නොමැති බවට තමන් විසින් හදුනා ගත්තද එය නිදහස් කිරීම වෙනුවෙන් අවශ්‍ය නීතිමය කටයුතු සදහා යම් කාලයක් ගත වන බැවින් උපවාසකරුවන්ට සතුටුදායක තීන්දුවක් ලබා දීම සදහා සති දෙකක කාලයක් ලබා දෙන ලෙස මුලතිව් දිස්‍ත්‍රික් අතිරේක ලේකම් කේ. කනගේෂ්වරන් කළ ඉල්ලිම පිළිගත් රවිචන්ද්‍රන් උදයචන්ද්‍රන්, යෝගේෂ්වරන් මයුරන්, ගනපති කදිර් කීරන්, ගෝවින්දන් ප්‍රසාන්දන් යන උපවාසකරුවන් සිව් දෙනා උපවාසය නතර කළ බව පළාත් බද වාර්තාකරුවෝ වැඩි දුරටත් පවසති.