රජයේ ආරක්ෂක අංශ වතු හාම්පුතුන් සමග එක්වී වතු කම්කරුවන්ගේ ජීවිතය විදහා දක්වන දෙමළ නාට්‍යයක් වේදිකා ගත කිරීම වලක්වාලීමට දැරු උත්සාහයක් සම්බන්ධයෙන් ශ්‍රී ලංකා මානව හිමිකම් කොමිසමට පැමිණිල්ලක් ඉදිරිපත් වී තිබේ.
ජුලි මස 09 වැනිදා සවස බොගවන්තලාව, කොටියාගල ප්‍රදේශයේ රඟ දැක්වීමට නියමිතව තිබු ‘ලයත්තු කෝළිගල’ නාට්‍යය යුද හමුදාව හා පොලිස් STF බලකාය වතු පාලනාධිකාරිය සමග එක්වී වලක්වාලීම සම්බන්ධයෙන් ජුලි 26 වැනිදා ශ්‍රී ලංකා මානව හිමිකම් කොමිසමට පැමිණිල්ලක් ඉදිරිපත් කරමින් නාට්‍යයේ අධ්‍යක්ෂවරයා අනාගතයේ නිර්මාණකරණයේ යෙදීමේදී ආරක්ෂාව තහවුරු කරගැනීමට ඇති හැකියාව පිළිබඳව බිය පල කරයි.
“නාට්‍යකරුවෙක් හැටියට සහ කලා ක්ෂේත්‍රයේ නියැලෙන කෙනෙක් හැටියට අපි වතු කම්කරුවන්ගේ ප්‍රශ්න කතා කරන්න සහ ඒක ගැන අපිට කලා නිර්මාණයක් කරන්න අයිතියක් තියනවා. ඒකට කොහොමද මේ හමුදාවේ මැදිහත්කම වෙන්නේ. ඒක මොන පදනම යටතේද? ඒ වගේම ඉදිරිකාලයේදී අනාගතයේදී අපි මේ වගේ දේවල් කරන කොට කොහොමද අපි අපේ ආරක්ෂාව තහවුරුකරගන්නේ වැනි දේවල් වලට පිලිතුරු ලබා ගන්න අද අපි මානව හිමිකම් කොමිසමට ආවා පැමිණිල්ලක් භාර දෙන්න,” වතුකරය පදනම් කරගත් නාට්‍යවේදී රාසයියා ලෝගනාදන් ප්‍රකාශ කළේය.
කඳුරට ප්‍රවීණ නාට්‍යවේදී රාසයියා ලෝගනාදන්ගේ අධ්‍යක්ෂණයක් වන ‘ලයත්තු කෝළිගල්’ නාට්‍යය සම්බන්ධයෙන් යුද හමුදාව විමසීම් කළ බව පිළිගන්නා කොටියාගල වතු පාලනාධිකාරිය ඒ තොරතුරු යුද හමුදාවට ලබා දෙන බව මීට ඉහත දී පවසා තිබුනි.
යුද හමුදාව, STF සහ වතු පාලනාධිකාරිය කදුකරයේ දෙමළ ජනතාවගේ සංස්කෘතික ක්‍රියාකාරකම් සෝදිසි කරන ආකාරය සම්බන්ධයෙන් නාට්‍යවේදී රාසයියා ලෝගනන්දන් කොළඹදී මාධ්‍යවේදීන්ට කළ හෙළිදරව්ව පහත වීඩියෝවෙන්.
Facebook Comments
