ජනපති, අගමැති රාජපක්ෂ සොහොයුරන්ට සිය තනතුරුවලින් ඉල්ලා අස් වන ලෙස බල කරමින් විරෝධතාවයේ නිරත වූ අරගලකරුවන්ට මැයි 9 වැනිදා සිදු කළ පහරදීමට පෙර හිටපු අගමැතිගේ ප්‍රධානත්වයෙන් අරලියගහ මන්දිරය තුළ පැවැත්වූ රැස්වීමේ දී සාකච්ඡා කළ කරුණු නිවැරදි ලෙස තහවුරු කර ගැනීමට පොලිසිය අසමත්ව තිබේ.
ජනතාවගේ මූලික අයිතිවාසිකම් ආරක්ෂා කිරීම සඳහා ප්‍රමාණවත් ආරක්ෂාවක් ලබාදී නීතියේ ආධිපත්‍යය නොබිඳී පවත්වා ගැනීමට නීතිය ක්‍රියාත්මක කිරීමේ නිලධාරීන් කටයුතු කළේද යන්න සම්බන්ධයෙන් නිර්දේශ ඉදිරිපත් කරමින් ශ්‍රී ලංකා මානව හිමිකම් කොමිෂන් සභාව විසින් එම අසමත්කමේ වගකීම පවරා ඇත්තේ ආරක්ෂක ලේකම්වරයා යටතේ ඇති රාජ්‍ය බුද්ධි ඒකකය වෙතයි.
ආණ්ඩුවේ දේශපාලකයන් ප්‍රමුඛ මැර පිරිස් මැයි 9 ප්‍රචණ්ඩ ප්‍රහාරයේ යෙදීමට පෙර අගමැති නිල නිවස තුල පැවති රැස්වීමක් අමතා මැති ඇමතිවරුන් ප්‍රකෝපකාරී කතා පවත්වනු සමාජ මාධ්‍ය අවුළුවා තිබුණි.
“පාර්ලිමේන්තු මන්ත්‍රීවරුන් ඇතුළු අනෙකුත් රාජ්‍ය සහ රාජ්‍ය නොවන නිලධාරීන් අරලියගහ මන්දිරය තුළ කළ කතා නිවැරදි ලෙස තහවුරු කර ගැනීමට පොලිසියට නොහැකි වී ඇති බව අනාවරණය විය. මෙම තීරණාත්මක තොරතුරු ලබා නොගැනීමේ අපොහොසත්කම ආරක්ෂක ලේකම්වරයා යටතේ ඇති රාජ්‍ය බුද්ධි ඒකකයට පවරනු ලැබ ඇත,” යයි ශ්‍රී ලංකා මානව හිමිකම් කොමිසමේ සභාපති, විනිසුරු රෝහිනී මාරසිංහ හා කොමසාරිස් අනූසුයා ෂන්මුගනාදන්ගේ අත්සනින් නිකුත් කළ නිවේදනයක දැක්වේ.
ප්‍රහාරය සම්බන්ධයෙන් ශ්‍රී මානව හිමිකම් කොමිසම විශේෂ විමර්ශනය කර ඇත්තේ විශේෂ නියෝජිත කණ්ඩායමක් යොදවමිනි.
විමර්ශන නිර්දේශවලින් හෙළිවන කරුණක් නම් රාජ්‍ය ඔත්තු සේවය අරගලකරුවන් අතරේ යොදවා තිබූ බවයි.
“බුද්ධි වාර්තා ඉතා ප්‍රයෝජනවත් වුවද එය අනේකවිධ තොරතුරු මූලාශ්‍රයන් අතරින් එකක් පමණි. අනෙක් ඒවා භූමියෙන් එන සජීවී සහ සෘජු තොරතුරු (එනම් විවිධ සහභාගිවන්නන්ගේ සහ ඔත්තු සපයන්නන්ගේ කරුණු ඇතුළත්), හා CCTV දර්ශන ආදිය යි” යනුවෙන් අගෝස්තු 23 වැනිදා නිකුත් කර ඇති නිර්දේශ වල සඳහන්ය.
මැයි 9 වැනි දින රාත්‍රී 11.50 සිට 1.00 දක්වා පොලිස්පතිවරයා සහ ඔහුගේ යටත් නිලධාරීන් සහ පොලිස්පතිවරයාට යටත් නිලධාරීන් අතර සිදු වූ දුරකතන සංවාද සහ පොලිස්පතිවරයා සහ ආරක්ෂක ලේකම්වරයා අතර සිදු වූ දුරකතන සංවාදය පරීක්ෂා කිරීමට කමිටුවකට උපදෙස් දෙනු ලැබු බවත් ශ්‍රී ලංකා මානව හිමිකම් කොමිෂන් සභාව පවසයි. ඒ සඳහා විදුලි සංදේශ නියාමන කොමිසමේ සහාය ලබාගන්නා ලෙස උපදෙස් දී ඇත.
අදාළ කමිටුව කුමක් දැයි පැහැදිලිව දක්වා නැත.
පොලිසියේ නායකත්වයට (lGP සහ උසස් නිලධාරීන්) ලැබෙන සියලුම තොරතුරු නිරන්තරයෙන් විශ්ලේෂණයට බදුන් කරන ක්‍රියා පටිපාටියක් තිබිය යුතු බව පෙන්වා දෙන ශ්‍රී ලංකා මානව හිමිකම් කොමිෂන් සභාව අවධාරණය කරන්නේ ඇතිවිය හැකි ඕනෑම පහරදීමකට නිලධාරීන් සූදානම් වීමට අවශ්‍ය සියලු තොරතුරු නිලධාරීන් වෙත ලබා ගැනීමේ ක්‍රමවේදයක් පොලිසිය සතුව තිබිය යුතු බවයි.
අරගල භූමියේ සිටි අණ දෙන නිලධාරියා කිසිදූ තීරණයක් නොගෙන සිටීම ගැටුමට මූලික හේතුව බව සභාපති, විනිසුරු රෝහිනී මාරසිංහ හා කොමසාරිස් අනූසුයා ෂන්මුගනාදන් නිකුත් කළ නිර්දේශ වල වැඩි දුරටත් සදහන්ය. නොවැළැක්විය හැකි ලෙස ගැටුමක් ඇති කරන ජන ගලායාම වැළැක්වීම සඳහා අවශ්‍ය මූලික ක්‍රමවේද යොදා ගැනීමට ගත යුතුව තිබූ පියවර ආරක්ෂක අංශ මගින් නොගෙන ඇති බවත් එහි සදහන්ය.
‘කමිටුව’ රැස්වෙලා
“සැබෑ අණ දෙන නිලධාරියා සහ එම නිලධාරියා සහ භූමියේ සිටින අණ දෙන නිලධාරීන් අතර ඇති සම්බන්ධය හඳුනා ගැනීමට කමිටුවට හැකි විය යුතුය. සහ අණ දෙන නිලධාරියාට පහර දීම වැළැක්වීමට තීරණය ගත හැකිද යන්න. භූමියේ සිටින නිලධාරියා කිසිදු තීරණයක් නොගැනීම ගැටුමට මූලික හේතුවයි. එය වැළැක්වූයේ කවරක් විසින් ද සහ කවුද? එය විමර්ශනය කිරීම වැදගත්ය. ගාලු පාර දිගේ ජනාධිපති ලේකම් කාර්යාලයට පිවිසීම වැළැක්වීමට ගාලු පාර හරහා වානේ බාධක නොතැනවීමට හේතුව කුමක්ද? අවාසනාවකට මෙන්, නොවැළැක්විය හැකි ලෙස ගැටුමක් ඇති කරන ජන ගලායාම වැළැක්වීම සඳහා මෙම මූලික ක්‍රමවේද ලබාදීමට කමිටුව නිසි පියවර ගෙන නොතිබුණි.”
කෙසේවෙතත්, ආරක්ෂක තත්වය සමාලෝචනය කිරීම සඳහා එම නම් නොකළ ‘කමිටුව’ දින කීපයක්ම රැස්වූ බව මානව හිමිකම් කොමිසම පවසයි.
නීතිය ක්‍රියාවේ යෙදවීමේ අංශයේ අපරාධකරුවන් කවුරුන්ද යන්න හා නීතිය කඩ කිරීම සම්බන්ධයෙන් වගකිව යුත්තන් හඳුනා ගැනීමටත් නීතිය ක්‍රියාවේ යෙදවීමේ අංශයේ නිලධාරීන්ගේ මෙකී රාජකාරි කඩකිරීම හේතුවෙන් තුවාල ලැබූ වින්දිතයන්ට ප්‍රමාණවත් ලෙස වන්දි ලබා දීම වෙනුවෙනුත් ජනාධිපතිවරයා විසින් කමිටුවක් පත් කළ යුතු බව මානව හිමිකම් කොමිසම නිර්දේශ කර තිබේ.
“නීතිය ක්‍රියාවේ යෙදවීමේ සමස්ත පද්ධතියම විමර්ශනය කිරීම එම කමිටුවට පැවරීමට ජනාධිපතිවරයාට හැකි බව මානව හිමිකම් කොමිසම වැඩිදුරටත් නිර්දේශ කරයි. එමෙන්ම වගකීම හඳුනාගෙන එවැනි නිලධාරීන් සමඟ දණ්ඩනකාරීව කටයුතු කිරීමට අවශ්‍ය පියවර ගැනීමේ අවශ්‍යතාවයද කොමිෂන් සභාව නිර්දේශ කරයි.”
විමර්ශනය සදහා කොමිෂන් සභාව විසින් පොලිස්පතිවරයා සහ පොලිසියේ ජ්‍යෙෂ්ඨ පොලිස් නිලධාරීන්, යුද හමුදාපතිවරයා, රාජ්‍ය බුද්ධි අංශයේ ජ්‍යෙෂ්ඨ නිලධාරීන් ද, අදාල සීසීටීවී දර්ශන සහ සියලුම ලේඛනගත සාක්ෂි ඇතුළත්ව පොලිස් දෙපාර්තමේන්තුවේ නිලධාරීන් රැසක් ද කැඳවා තිබු බව ශ්‍රී ලංකා මානව හිමිකම් කොමිසම පවසයි.
Facebook Comments
