ණය ගෙවා ගන්නට බැරිව ආණ්ඩුව රාජ්‍ය සේවක පඩිය ආපසු ඉල්ලයි

0

ජාත්‍යන්තර කම්කරු දිනය සමරා සිව් දිනක් ගතවෙද්දී, රාජ්‍ය සේවකයන්ට ඉදිරියේදී ලැබීමට නියමිත මාසික වැටුප ආපසු ආණ්ඩුවටම දෙන ලෙස ජනාධිපති කාර්යාලය කල් වේලා ඇතිවම ඉල්ලා තිබේ.

රටේ අයවැය හිඟය අඩුකර, ණය කළමනාකරණය වෙනුවෙන් රාජ්‍ය සේවකයන් ගේ මැයි මාසයේ වැටුප ආපසු ලබා දෙන ලෙස ජනාධිපති ලේකම්වරයා ඉල්ලා සිටී.

” අප රටේ රාජ්‍ය සේවයේ වැටුප් හා දීමනා සදහා මාසිකව රුපියල් බිලියන 100ක ට ආසන්න ප්‍රමාණයක මුදලක් රජයට අවශ්‍යයි.එක් මසක් අප මේ වැටුප නොගෙන එම මුදල වැන්දඹු අනත්දරු ගෙවීම් සදහා යොදවන ලෙස මහා භාණ්ඩාගාරය උපදෙස් දුනහොත් හා රාජ්‍ය සංස්ථා, මණ්ඩල, මහ බැංකුව, බැංකු හා රක්ෂණ වැනි රාජ්‍ය ආයතන රජයේ බදු නොවන ආදායම් ලෙස ඔවුන්ගේ වැටුප ප්‍රධානය කළහොත් අපේ රටේ මැයි මාසයේ වියදම අඩුවී ආදායම වැඩීවීමෙන් සැමවිටම කතා කරන අයවැය හිගය අපටම අඩු කර ගත හැකිය,” යි ආචාර්ය පී.බී ජයසුන්දර ජනාධිපති කාර්යාලයේ ලිපි ශීර්ෂයෙන් යවන ලද ලිපියේ සඳහන් වෙයි.

රජයේ හා විදේශීය ආදායම් අවහිර වී ඇති අවස්ථාවක සේවක වැටුප් ආණ්ඩුවේම රඳවා ගතහොත් රට පීඩාවට පත් කර තිබෙන ණය කළමනාකරණයට දැඩි පහසුවක්ද වනු ඇති බව ජනාධිපති ලේකම්වරයාගේ විශ්වාසයයි.

ආයතනිකව හා පෞද්ගලිකව ලැබෙන පරිත්‍යාග සහ සෘජු තැන්පතු සමඟ COVID–19 සෞඛ්‍ය හා සමාජ ආරක්ෂණ අරමුදලේ ශේෂය අප්‍රේල් මස 29 දින වන විට රුපියල් මිලියන 878 ඉක්මවා ඇති බවට ජනාධිපති මාධ්‍ය ඒකකය විසින් ප්‍රසිද්ධියට පත් කර තිබියදීත් තම පෞද්ගලික ආයාචනයක් ලෙස සදහන් කරමින් ජනාධිපති ලේකම්වරයා විසින් මැයි 5 දින රාජ්‍ය නිලධාරීන්ට ලියා ඇති ලිපියකින් ආයාචනා කර ඇත්තේ මාසික වැටුප දීමට අපහසු අයට “මාසයක වැටුපෙන් අඩක්, සතියක වැටුපක්, දිනක වැටුප වශයෙන්” මේ සදහා දායකත්වය ලබා දෙන ලෙසයි.

කොවිඩි 19 වෛරසය ලෝක ආර්ථිකය මුළුමනින්ම හුදකලා කර සෑම රටකම ජන ජීවිතය දැඩි අවිනිශ්චිතතාවයකට පත් කර ඇති බව පවසන ජනාධිපති ලේකම් පී.බී ජයසුන්දර සිය ලිපියේ වැඩි දුරටත් සදහන් කර ඇත්තේ සමස්ත රාජ්‍ය සේවයේ පුරෝගාමීත්වයත්, සංවිධානාත්මක හා සාම්ප්‍රදායික පෞද්ගලික අංශයේ පසුගාමීත්වයත් පවතින වෙළද පොල ආර්ථිකයේ දැඩි අවදානම් තත්වයත් , රාජ්‍ය අංශයක කාර්ය භාරය පෞද්ගලික අංශයට මුළුමනින්ම ඉටුකළ නොහැකි බවත් ආර්ථික විද්‍යා පාඩමක් ලෙස කොවිඩ් 19 තුළ අවබෝධ කරගැනීම කාලෝචිත බවයි.

රාජ්‍ය සේවකයන්ගේ මැයි මස වැටුප ඉල්ලා ජනාධිපති ලේකම් පී.බී ජයසුන්දර විසින් යොමු කළ ලිපිය අග්‍රාමාත්‍ය ලේකම්, අමාත්‍ය මණ්ඩල ලේකම්, ශ්‍රී ලංකා මහ බැංකුවේ අධිපති, සියළු අමාත්‍යාංශ ලේකම්වරුන්, පළාත් සභා ප්‍රධාන ලේකම්වරුන් හා පළාත් සභා ලේකම්වරුන්, දිස්ත්‍රික් හා ප්‍රදේශිය ලේකම්වරුන්, විශ්ව විද්‍යාල ප්‍රතිපාදන කොමිෂන් සභා සභාපතිතුමා ඇතුළු සියළු උප කුලපතිවරු, දෙපාර්තමේන්තු, සංස්ථා රාජ්‍ය බැංකු, රාජ්‍ය සමාගම් හා ව්‍යවස්ථාපිත ආයතන, ප්‍රධානීන් සහ අනිකුත් සියළුම රාජ්‍ය නිලධාරීන් වෙත යොමු කර තිබේ.

Facebook Comments

wedding people