කොව්ඩ් 19 රෝග ව්‍යාප්තිය පාලනය කිරීමට දමන ලද සීමා කිරීම් ලිහිල් කිරිමෙන් පසුව කොරෝනා රෝගය සමාජය තුල පැතිරියාමේ අවදානමක් ගැන සෞඛ්‍ය අමාත්‍යවරිය අනතුරු අඟවා තිබේ.
රෝග ලක්ෂණ නොමැතිව කොවිඩ් 19 වයිරසය අසාදනය වු පුද්ගලයන් සමාජය පුරා සිටිය හැකි බව පවසන සෞඛ්‍ය හා දේශීය වෛද්‍ය අමාත්‍ය පවිත්‍රා වන්නිආරච්චි මෙරට කොරෝනා අසාදනය වු පිරිසගෙන් හරි අඩක පමණ ප්‍රමාණයක් විසින් ලක්ෂණ පෙන්නුම් නොකළ බවයි පවසන්නේ.
එබැවින් කොරෝනා රෝගය ව්‍යාප්තයට දමා තිබු සීමා ලිහිල් කරන ප්‍රදේශ වල පවා කොව්ඩි 19 අසාදනය වු අසාදිතයන් සිටිය හැකි බවට සැක පළ කරන ඇමැතිවරිය ඒ හරහා සමාජය තුල රෝගය පැතිරිමේ අවධානමක් ඇති බවයි පෙන්වා දෙන්නේ.
“ඇඳිරි නීතිය ලිහිල් කිරිමේදී ඔබ කල්පනාකාරී විය යුතුයි මෙම රෝග ලක්ෂණ පෙන්නුම් නොකරන රෝගීන් ඉඳහිට ඔබ අතර ගැවසිය හැකි. ඒ් හරහා යම් කිසි ප්‍රවනතාවයක් තියෙනවා සමාජය තුළ මෙම රෝගීන්ගෙන් ඔබටත් රෝගය වැළඳීමට,” යි සුව ඇමැතිවරිය ලෝක අත් සේදීමේ දිනය වෙනුවෙන් මාධ්‍ය වෙත විඩියෝ පණිවුඩයක් නිකුත් කරමින් කියා සිටියාය.
සෞඛ්‍ය අංශ දැනුවත් කර ඇති පරිදි සමාජ දුරස්ථභාවය ආරක්ෂ කර ගනිමින් දෑත් පිරිසිදුව තබා ගනිමින් කොරෝනා වයිරසයෙන් බේරීමට ක්‍රියා කරන ලෙසටයි පවිත්‍රා වන්නිආරච්චි අමාත්‍යවරිය ජනතාවගෙන් ඉල්ලා සිටින්නේ.
Facebook Comments
