උතුරේ අලුත් නාවික මෙහෙයුම් ගැන ඉන්දීය විරෝධය

උතුරේ ධීවර විරෝධතා හමුවේ නැවත ආරම්භ කරන ලද මෙහෙයුම් මගින් ලංකාවේ නාවික හමුදාව විසින් අත්අඩංගුවට ගෙන රඳවා ගෙන සිටින ධීවරයන් නිදහස් කරන ලෙස ඉල්ලා දකුණු ඉන්දීය ධීවරයෝ විරෝධතා උද්ඝෝෂණයක් දියත් කර තිබේ.

මෙම අත් අඩංගුවට ගැනීම් සිදුකර ඇත්තේ ශ්‍රී ලංකාවේ චීන තානාපතිවරයා උතුරේ ධීවරයන්ද මුණ ගැසී පැවැත්වූ තුන්දින සංචාරයක් හමාර වීමත් සමගය. ඔහු එහිදී ඉන්දු ලංකා සාමුද්‍රික සමීපතා සම්බන්ධයෙන්ද විමසීම් කර තිබුණි.

ඉන්දීය ධීවරයන් සම්බන්ධයෙන් තමිල්නාඩු ප්‍රාන්ත පාලනය වන ද්‍රවිඩ මුන්නේත්‍ර කලහම් (DMK) පක්ෂයේ පාර්ලිමේන්තු මන්ත්‍රීවරුන් හදිසි විවාදයක් ඉල්ලා ලෝක් සභාවට යෝජනාවක් බාර දී ඇත.

නාවික හමුදා අත්අඩංගුවේ සිටින තම වෘත්තීය සගයන් නිදහස් කරන ලෙස ඉල්ලා රාමේශ්වරම් ධීවරයන් ඊයේ [19] සිට අඛණ්ඩ වර්ජයක් අරඹා ඇතැයි ඉන්දීය මාධ්‍ය වාර්තා කරයි.

නාවික හමුදාව පවසන්නේ මෙරට මුහුදු සීමාව පැන ඩෙල්ෆ් දුපත ආසන්නයේ මසුන් මරමින් සිටී ඉන්දීය ධීවරයන් 43 දෙනෙක් ට්‍රෝලර් යාත්‍රා හයක් සමගින් දෙසැම්බර් 18 වැනිදා මධ්‍යම රාත්‍රියේදී සිදු කළ විශේෂ මෙහෙයුමකින් අත්අඩංගුවට ගත් බවත්,තවත් ඉන්දීය ධීවරයන් 12 දෙනෙකු මන්නාරම ආසන්න මුහුදේ මසුන් අල්ලමින් සිටියදී ඊයේ (19) අත්අඩංගුවට ගත් බවය.

අත් අඩංගුවට ගන්නා ලද ඉන්දීය ට්‍රෝලර් යාත්‍රා මේ වනවිට යාපනයේ මයිලට්ටි නාවික හමුදා කඳවුරු වරායේ රඳවා ඇති ආකාරය වීඩියෝවේ දැක්වේ.

“පවත්නා සෞඛ්‍ය මාර්ගෝපදේශයන්ට අනුකූලව සිදු කළ මෙම මෙහෙයුම මගින් මන්නාරම දකුණු මුහුදු තීරයේදී නාවික හමුදා භාරයට ගත් ඉන්දීය ජාතික ධීවරයින් ක්ෂණික ප්‍රතිදේහ පරීක්‍ෂණ සඳහා යොමු කිරීමෙන් පසු ඉදිරි නීතිමය කටයුතු සඳහා අදාල අංශ වෙත යොමු කිරීමට අවශ්‍ය කටයුතු සිදු කරමින් පවතින අතර, ශ්‍රී ලංකාවට අයත් මුහුදු සීමාව තුළට විදෙස් ධීවරයින් ඇතුළුවී සිදුකරනු ලබන අනවසර ධීවර කටයුතු මැඩපැවැත්වීම උදෙසා නාවික හමුදාව ඉදිරියටත් අඛණ්ඩව මෙහෙයුම් සිදුකරනු ලබයි,” යනුවෙන් නාවික හමුදාව නිවේදනය කර ඇත.

තමිල්නාඩු මහ ඇමැති එම්.කේ. ස්ටාලින් ඉන්දීය මධ්‍යම ආණ්ඩුවේ අභ්‍යන්තර කටයුතු ඇමැති එස්.ජෙයශන්කර් වෙත ලිපියක් යොමු කරමින් ඉල්ලා සිටින්නේ ලංකා නාවික හමුදා අත්අඩංගුවේ පසුවන ඉන්දීය ධීවරයන් 55 දෙනා නිදහස් කර ගැනීමට පියවර ගන්නා ලෙසය.

ඉන්දීය ධිවර සංවර්ධන දෙපාර්තමේන්තුව හා එරට නාවික පොලිසිය විසින් ධීවරයන්ට දැඩි ලෙස අවධාරණය කර තිබුනේ ඉන්දීය මුහුදු සිමා මායිම් පැන මසුන් ඇල්ලීමට ගිය හොත් දැඩි දඩුවම් ලබා දෙන බවය. මෙරට ඉන්දීය මහ කොමසාරිස් ගෝපාල් බග්ලේ ඉකුත් මාසයේ ඉන්දියාවේ සංචාරය කරමින් ලංකා මුහුදු සීමාව ආක්‍රමණය කොට මසුන් මැරීමට ගිය හොත් ගැටළු මතුවිය හැකි බවට අනතුරු අඟවා තිබිණි.

මුහුදු සිමා පැන එන ඉන්දියානු ධීවරයන් මෙරට මත්ස්‍ය සම්පත කොල්ලකෑම දිගු කලක පටන් උතුරේ ධීවරයන් මුහුණ දෙන බරපතල ගැටළුවකි.

ශ්‍රී ලංකා නාවික හමුදාව එම කොල්ලය වලකා ලන්නට නිසි පියවර නොගන්නා බවට උතුරේ ධීවර සංවිධාන දිගින් දිගටම චෝදනා කර තිබේ.

මේ නිසා පසු ගිය කාලය තුල උතුරේ ධීවරයන්ට සිදුවූ හානියට වන්දි ලෙස රුපියල් මිලියන 400 ක මුදලක් ලබා දෙන ලෙස උතුරේ ධීවරයන් විසින් මෙරට ඉන්දීය මහකොමසාරිස්වරයා වෙත ඉල්ලීමක් ද කළේය.

මේ අතර උතුරේ තුන් දින සංචාරයක් නිම කරමින් මෙරට චීන තානාපති කී සෙන්හොං පවසා තිබුනේ උතුරේ ධීවර පවුල් 2500ක් සඳහා රුපියල් කෝටි දෙකක් වටිනා ධීවර ආම්පන්න, වියලි ආහාර සහ මුව වැසුම් ලබා දුන් බවයි.

එම ගමනේදී ඉන්දියාව එල්ලේ පිහිටි ශ්‍රී ලංකාවේ උතුරුදිග පේදුරු තුඩුවේ සක්කෝට්ටෙයි තුඩුවට ද ඔහු ගොස් තිබේ.

එතැන් සිට ඉන්දියාවට කොතරම් දුරක් ඇතිදැයි ශ්‍රී ලංකාවේ හමුදා නිලධාරියකුගෙන් විමැසූ තානාපතිවරයාට කිලෝමීටර් තිහකැයි පිළිතුරු ලැබුණු බව සන්ඩේ ටයිම්ස් පුවත්පත වාර්තා කරයි.

එහි වැඩි දුරටත් සඳහන් වන පරිදි චීන නිලධාරියකු එම ස්ථානයෙන් ඩ්‍රෝන යානාවක් ගුවන් ගතකොට වීඩියෝ දර්ශනද ලබාගෙන තිබේ.