ගෝඨාභයගේ ජනාධිපති සමාවක් ගැන නඩු අහන්න උසාවිය අවසර දෙයි

දෙමළ සමුල ඝාතනයක වරදකාර හමුදා නිලධාරියකු ජනාධිපති විසින් නිදහස් කර යැවීමට එරෙහිව වසර තුන හමාරකට ඉහත දී අධිකරණයට ඉදිරිපත් කර තිබු පෙත්සම් විභාග කිරීමට ශ්‍රේෂ්ඨාධිකරණය අවසර ලබා දී තිබේ.

පස් හැවිරිදි ළදරුවකු ඇතුළු දෙමළ අට දෙනකුගේ සමූහ ඝාතනයට වරදකරු වු සුනිල් රත්නායක හමුදා සෙබලාට ගෝඨාභය රාජපක්ෂ ජනාධිපතිවරයා විසින් සමාව දී නිදහස් කර යැවීමට ගත් තීරණය බල රහිත කරන ලෙස විකල්ප ප්‍රතිපත්ති කේන්ද්‍රය සහ එහි විධායක අධ්‍යක්ෂ පාක්‍යසෝති සරවනමුත්තු මෙන්ම සමූල ඝාතනයේ වින්දිතයන්ගේ පවුල්වල සාමාජිකයන් ඇතුළු තවත් පාර්ශව කිහිපයක් 2020 වසරේ අප්‍රේල් මාසයේ දී ශ්‍රේෂ්ඨාධිකරණයෙන් ඉල්ලා තිබුනි.

විජිත් මලල්ගොඩ, අචල වෙන්ගප්පුලි සහ අර්ජුන ඔබේසේකර යන ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල විසින් ඔක්තෝබර් 12 වැනි බ්‍රහස්පතින්දා ආණ්ඩුක්‍රම ව්‍යවස්ථාවේ 12 (1) වගන්තිය උල්ලංඝනය වීම පිළිබඳව පෙත්සම් ඉදිරියට ගෙන යෑමට අවසර ලබා දී ඇත.

එමෙන්ම සුනිල් රත්නායකගේ සමාවට අදාල ලියකියවිලි කිහිපයක් ශ්‍රේෂ්ඨාධිකරණය ලබාදීමට නීතිපති දෙපාර්තමේන්තුව භාරගෙන තිබේ. විකල්ප ප්‍රතිපත්ති කේන්ද්‍රය නිවේදනය කර ඇත්තේ නඩුව ලබන වසරේ මැයි 17 වැනිදා කැදවීමට අධිකරණය තීරණය කළ බවයි.

“වගඋත්තරකරුවන්ට පෙත්සම් සම්බන්ධයෙන් ඔවුන්ගේ විරෝධතා ඉදිරිපත් කිරීමටත්, පෙත්සම්කරුවන්ට එම විරෝධතාවලට ප්‍රතිචාර දැක්වීමටත් කාලය ලබාදුන් ශ්‍රේෂ්ඨාධිකරණය, 2024 මැයි 17 වැනිදා මෙම නඩුව නැවතත් කැඳවීමට තීරණය කළේය.”

ඥානපාලන් රවිවීරන්, සෙල්ලමුත්තු දේවකුලසිංහම්, විල්වරාජා ප්‍රදීපන්, සින්නයියා විල්වරාජා, නඩේසු ජෙයචන්ද්‍රන්, කදීරන් ඥානචන්ද්‍රන්, ඥානචන්ද්‍රන් ශාන්තන් සහ පස් හැවිරිදි විල්වරාජා යාපනයේ මිරුසුවිල් හිදී 2000 දෙසැම්බර් 19 දා ඝාතනය කිරීම සම්බන්ධයෙන් මහාධිකරණයෙන් ලබා දුන් දඬුවම, 2019 වර්ෂයේ අප්‍රේල් මස, බුවනෙක අලුවිහාරේ,නලින් පෙරේරා,සිසිර ද ආබෘ, ප්‍රියන්ත ජයවර්ධන හා මුර්ධු ප්‍රනාන්දු යන පංච පුද්ගල ශ්‍රේෂ්ඨාධිකරණ විනිසුරු මඩුල්ල විසින් සනාථ කර ඇති බැවින් ජනාධිපති දුන් සමාව වඩාත් බරපතල බව විකල්ප ප්‍රතිපත්ති කේන්ද්‍රය පෙත්සමින් පෙන්වා දී තිබුනි.

පෝරකයට නියමවී සිටි රත්නායක මුදියන්සේලාගේ සුනිල් රත්නායක හමුදා නිලධාරියා හට සමාව ප්‍රදානය කිරීමට ජනාධිපතිවරයා ගන්නා ලද තීරණය විනිවිද භාවයකින් තොර සහ පිළිගත් නීති සිද්ධාන්ත වලින් තොර බවට පෙත්සම්කරුවන් චෝදනා කර ඇත.

එම නිසා සිද්ධියෙන් මියගිය පුද්ගලයන්ට සහ ඔවුන්ගේ ඥාතීන්ට මෙන්ම එම නඩුවේ සාක්ෂිකරුවන් බියගැන්වීම මෙන්ම ඔවුන්ට අගතියක් සිදුවන බවද එම පෙත්සමෙන් පෙන්වා දී තිබුනි.

“නීති විරෝධීයි”

මිරුසුවිල් සංහාරයේ වැරදිකරු වු රත්නායක මුදියන්සේලාගේ සුනිල් රත්නායක නිදහස් කර යැවීමට ජනාධිපතිවරයා ගත් තීරණය නීතියට හා ව්‍යවස්ථාවට පටහැනි බව පෙන්වා දෙන පෙත්සම්කරුවෝ ශ්‍රේෂ්ඨාධිකරණයෙන් ඉල්ලා සිටින්නේ එම තීරණයෙන් ආණ්ඩුක්‍රම ව්‍යවස්ථාව උල්ලංඝනය කර ඇති බවට තීන්දුවක් ලබා දෙන ලෙසටයි.

ඊට අමතරව සිරකරු හට පොදු සමාව ලබා දීමට අදාළව ජනපති ගෝඨාභය රාජපක්ෂ විසින් නිකුත් කරන ලද ගැසට් නිවේදනය සහ එම ගැසට් නිවේදනය නිකුත් කිරීමට පාදක වු ලේඛන පිළිබඳව පරීක්ෂණයක් පවත්වන ලෙසට ද පෙත්සම්කරුවෝ අධිකරණයෙන් ඉල්ලා තිබුනි.

ගෝඨාභය රාජපක්ෂ විසින් රත්නායක මුදියන්සේලාගේ සුනිල් රත්නායකට ලබා දුන් පොදු සමාව බල රහිත කිරීමේ ආඥාවක් නිකුත් කරන ලෙසද විකල්ප ප්‍රතිපත්ති කේන්ද්‍රය සහ එහි විධායක අධ්‍යක්ෂ පාක්‍යසෝති සරවනමුත්තු 2020 වසරේ ශ්‍රේෂ්ඨාධිකරණයට ඉදිරිපත් කරන ලද මුලික අයිතිවාසිකම් පෙත්සමෙන් වැඩි දුරටත් ඉල්ලා තිබුනි.

පස් හැවිරිදි ළදරුවකු ඇතුළු දෙමළ අට දෙනකුගේ සමූහ ඝාතනයට එල්ලුම් ගසට නියම වී සිටි ගජබා රෙජිමේන්තුවේ හමුදා නිලධාරියකු වු රත්නායක මුදියන්සේලාගේ සුනිල් රත්නායක හිටපු ජනාධිපතිවරයා විසින් නිදහස් කර යවනු ලැබුවේ කොරෝනා වයිරස් අවදානමෙන් ජීවිත බේරාගැනීම සඳහා හිරගෙදර තදබදය අඩුකිරීමට සුළු වැරදිකරුවන් කවර කොන්දේසි යටතේ හෝ නිදහස් කරන මෙන් ඉල්ලා අනුරාධපුර රැඳවියන් දියත් කළ උද්ඝෝෂණයකට බන්ධනාගාර නිලධාරීන් විසින් වෙඩිතබා ඉපලෝගම කලාකරඹෑව පූගොල්ලාගම කේ. එම්. ඒ. සමන් කුමාර සහ ගල්ගමුව උස්ගල සියඹලන්ගමුව කේ. එල්. ඩී. අසංක පුෂ්ප කුමාර මරුමුවට පත් වී තවත් හයක් තුවාල ලබා රෝහල් ගතවීමෙන් දින පහක් ගතවීමත් සමගය.

ගෝඨාභය රාජපක්ෂ ද ගජබා රෙජිමේන්තුවේ හිටපු නිලධාරියෙකි.

ගෝල්පේස් පිටිය මුල්කරගත් ආණ්ඩු විරෝධී අරගලය හමුවේ ශ්‍රී ලංකාවෙන් පලාගිය ජනාධිපති ගෝඨාභය රාජපක්ෂ 2022 ජූලි 14 වැනි සිය ධුරයෙන් ඉල්ලා අස්විය.