තමන්ගේ කැමැත්ත පරිදි මහින්ද රාජපක්ෂගේ නායකත්වයෙන් ආණ්ඩුවක් පිහිටුවමින් හා නීති විරෝධී ලෙස පාර්ලිමේන්තුව විසුරුවාලමින් ව්‍යවස්ථාව උල්ලංඝනය කල බවට චෝදනා එල්ලවී ඇති ජනාධිපතිවරයා නැවත වරක් ව්‍යවස්ථාව කඩකර ඇති බව පාර්ලිමේන්තුවේදී අනාවරණය වී තිබේ.
ආණ්ඩුක්‍රම ව්‍යවස්ථාව අනුව ජනාධිපතිවරයා මාස තුනකට වරක් පාර්ලිමේන්තු සැසිවාරයට සහභාගී විය යුතුව තිබුණද ජනාධිපති මෛත්‍රීපාල සිරිසේන පසුගිය වසරේ ඔක්තෝම්ර් 12 දාට පසුව පාර්ලිමේන්තුවට සහභාගී වී නොමැති බව 24 බ්‍රහස්පතින්දා පාර්ලිමේන්තුවේදී හෙළි විය.
ඒ අනුව මාස තුනකට වැඩි කාලයක් ජනාධිපති සිරිසේන මහතා පාර්ලිමේන්තුවට සහභාගී නොවී ආණ්ඩුක්‍රම ව්‍යවස්ථාව උල්ලංඝනය වන ආකාරයට කටයුතු කර ඇත.
“ආණ්ඩුක්‍රම ව්‍යවස්ථාව අනුව ජනාධිපතිවරයා පාර්ලිමේන්තුවට වගකීමට බැදී සිටිනවා. ආණ්ඩුක්‍රම ව්‍යවස්ථාවට අනුව මාස තුනකට වරක් ජනාධිපතිවරයා පාර්ලිමේන්තුවට සහභාගී විය යුතුව තිබෙනවා. නමුත් එතුමා අවසන්වතාවට පාරිලිමේන්තුවට සහභාගී තිබෙන්නේ පසුගිය ඔක්තෝම්බර් 12 දා. මේ වනවිට මාස තුන ඉක්මවා තිබෙනවා.” යි ජනතා විමුක්ති පෙරමුණු නායකයා පාර්ලිමේන්තුවේදී කියා සිටියේය.
“ආණ්ඩුක්‍රම ව්‍යවස්ථාවට අනුව ජනාධිපතිවරයා පාර්ලිමේන්තුවට වගකීම් ඉටුකිරීමට බැදී සිටියත් ඒ වගකීම ඉටුකිරීමට සඳහා ඔහු මාස 03 ට වරක් සහභාගී විය යුතුව තිබුණත් ඔහු මාස තුන ඉක්මවා ගොස් තිබියදීත් පාරිලිමේන්තුවට සහභාගී වී නැති බව ඉතා හොදින් පෙන්වාදී තිබෙනවා. මේ සම්බන්ධයෙන් ආණ්ඩුවේ තීන්දුව කුමක්ද කියා මම දැනගන්න කැමතියි.” යැයි අනුර කුමාර දිසානායක මන්ත්‍රීවරයා ප්‍රශ්න කළේය.
මේ පිළිබඳව ජනාධිපතිවරයාට දන්වන බව කී සභානායක ලක්ෂ්මන් කිරිඇල්ල ඇමැතිවරයා තමාට කල හැක්කේ එය පමණක් බව වැඩි දුරටත් කියා සිටියේය.
Facebook Comments
