ක්‍ෂුද්‍ර මූල්‍ය සමාගම් වලින් ලබා ගත් ණය පියවා ගත නොහැකිව පසුගිය වසරේ දී පමණක් යාපනය දිස්ත්‍රික්කයේ පුද්ගලයින් 60 දෙනෙකු සිය දිවි නසා ගෙන ඇති බවට ජනතා විමුක්ති පෙරමුණේ මන්ත්‍රීවරයෙකු පාර්ලිමේන්තුවේදී කියා තිබේ.
ලංකාවේ සමස්ත ජනගහනයෙන් මිලියනකට වඩා ණය වී ඇති බව 23 බදාදා ණය සහනදායක (සංශෝධන) පනත් කෙටුම්පත දෙවැනි වර කියවීමේ පාර්ලිමේන්තු විවාදයට එක්වෙමින් පාර්ලිමේන්තු මන්ත්‍රී බිමල් රත්නායක කියා සිටියේය.
“ලංකාවේ සමස්ත ජනගහනයෙන් මිලියනයකට වැඩි ප්‍රමාණයක් ණය ගැතිභාවයට ලක්ව තිබෙනවා. එය ග්‍රාමීය නාගරික වතු ආදී වශයෙන් සලකා බැලීමේදී විශාල ප්‍රමාණයක් වෙනවා. ඒ වගේම ණය ගෙවා ගැනීමට නොහැකිව සියදිවි හානි කරගත් විශාල පිරිසක් ඉන්නවා.”
“ඒ වගේම ඇතැම් ආයතන ණය අයකිරීමේ පොලී අනුපාත විශාල වශයෙන් ඉහළ දමා තිබෙනවා. ගිය වසර් යාපනය දිස්ත්‍රික්කයේ 60 දෙනෙක් ණය ගෙවාගන්න බැරිව සියදිවි නසාගෙන තිබෙනවා.” යි මන්ත්‍රීවරයා පෙන්වා දී ඇත.
සිය දිවි නසා ගෙන ඇති බහුතරය කාන්තාවන් බව කී බිමල් රත්නායක මන්ත්‍රීවරයා ක්‍ෂුද්‍ර මූල්‍ය ණය හේතුවෙන් සුරාකෑමට ලක් වන බහුතරය කාන්තාවන් බව ද ප්‍රකාශ කළේය.
අලුත් ක්‍ෂුද්‍ර මූල්‍ය ණය දෙන ආයතන පිහිටුවීමට අවසර ලබා නොදෙන ලෙස ඉල්ලා සිටි මන්ත්‍රීවරයා දැනට පවතින ආයතන සියල්ල සමාලෝචනය කරන ලෙසට රජයෙන් ඉල්ලීමක් කරන ලදී.
ක්‍ෂුද්‍ර මූල්‍ය ණය ලබා ගැනීම නිසා අසරණ වූ ජනතාවගේ පැමිණිලි භාර ගැනීමට සියලු ප්‍රාදේශීය සභාවල මණ්ඩලයක් ඇතිකරන්න ලෙසත් ක්‍ෂුද්‍ර මූල්‍ය ණය ගැන දැඩි නීති පනවන ලෙසයි මන්ත්‍රී බිමල් රත්නායක වැඩි දුරටත් ඉල්ලා සිටියේ.
Facebook Comments
