ජනාධිපති උසාවියට කැඳවීම වැලැක්වූ අභියාචනාධිකරණයට අභියෝගයක්

0

ගෝඨාභය රාජපක්ෂ ආරක්ෂක ලේකම් සමයේ නම වසරකට උඩදී අතුරුදහන් දේශපාලන හා මානව හිමිකම් ක්‍රියාකාරීන් දෙදෙනකු පිළිබඳ නඩු විභාගයකට සාක්ෂිදීම සඳහා අධිකරණය හමුවේ පෙනී සිටින ලෙස දන්වා නිකුත් කර තිබෙන සිතාසිය බලරහිත කරමින් අභියාචනාධිකරණය විසින් දෙන ලද නියෝගයක් අභියෝගයට ලක් කිරීමට පෙරටුගාමී සමාජවාදී පක්ෂය තීරණය කර තිබේ.

ලලිත් කුමාර වීරරාජු සහ කුගන් මුරුගනාදන් 2011 වසරේ දෙසැම්බර් මස 9 දා පැහැරගෙන ගොස් අතුරුදන් කිරීමට අදාල නඩු විභාගයකට සාක්ෂිදීම සඳහා අධිකරණය හමුවේ පෙනී සිටින ලෙස දන්වා යාපනය මහෙස්ත්‍රාත් අධිකරණය මගින් ජනාධිපති ගෝඨාභය රාජපක්ෂ වෙත නිකුත් කර තිබු සිතාසිය බලරහිත කරමින් අභියාචනාධිකරණය නොවැම්බර් 24 අගහරුවාදා රිට් ආඥාවක් නිකුත් කර ඇත.

“ගෝඨාභය රාජපක්ෂට සිතාසි යැවීමේ බලයක් නැති අතර ජනාධිපතිවරයෙකු අධිකරණයට ගෙන්විය නොහැකි” බවට අභියාචනාධිකරණ තීන්දුවට අනුව දක්වා ඇති හේතු දෙකම පිලිනොගන්නා බව පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ පවසන්නේ.

අධිකරණය ගෝඨාභය රාජපක්ෂට සිතාසි යැව්වේ හිටපු ආරක්ෂක අමාත්‍යාංශ ලේකම් ලෙස වන අතර රජයේ නිලධාරීන්ට සිතාසි යැවීමේ බලයක් අධිකරණයට ඇති බවත් සිය මුහුනු පොතේ සටහනක් යොදමින් පුබුදු ජයගොඩ අවධාරණය කර තිබේ.

එමෙන්ම මෙම නඩුවට ඔහු කැඳවන්නේ සාක්ෂිකරුවකු ලෙස විනා චූදිතයකු ලෙස නොවන බව සිහිපත් කරන පෙරටුගාමී සමාජවාදී පක්ෂයේ අධ්‍යාපන ලේකම් අවධාරණය කරන්නේ යමෙක් ජනාධිපතිවරයා වූ පසු ඊට පෙර ඔහු දන්නා කරුණක් සම්බන්ධයෙන් අධිකරණයට තොරතුරු ලබාදීම මග හැරීමේ බලයක් ව්‍යවස්ථාවෙන් ලබාදී නොමැති බවයි.

අභියාචනාධිකරණයේ සභාපති විනිසුරු ඒ. එච්. එම්. ඩී. නවාස් සහ සෝභිත රාජකරුණාගෙන් සමන්විත විනිසුරු මඩුල්ල විසින් අද ලබා දුන් රිට් ආඥාව සම්බන්ධයෙන් අභියාචනයක් ගොනු කිරීමට පෙරටුගාමී සමාජවාදී පක්ෂය තීරණය කර තිබේ.

“අප මේ තීන්දුවට එරෙහිව අභියාචනයක් ගොනු කරන අතර නීතිමය අරගලයට සීමා නොවී යුක්තිය උදෙසා දේශපාලන අරගලය පණ පොවමු. මේ ප්‍රශ්නය ලලිත් සහ කුහන් සහෝදරවරුන්ට සීමා නොවේ. මෙය සියළු අතුරුදන් කිරීම් වලට එරෙහි අරගලයේ සංකේතයකි. එබැවින් අපි සටන අත නොහරිමු. විවිධ සටන්බිම් තුළ අරගලය පණ ගන්වමු,” යි පුබුදු ජයගොඩ සිය මුහුණු පොතේ යෙදු සටහනේ වැඩි දුරටත් සඳහන්ය.

ලලිත් කුමාර වීරරාජු සහ කුගන් මුරුගනාදන් පැහැරගෙන ගොස් අතුරුදන් කිරීම සම්බන්ධයෙන් යාපනය මහෙස්ත්‍රාත් අධිකරණය හමුවේ පවතින හබයාස් කෝප් නඩු විභාගය සඳහා සාක්ෂි දීමට 2019 වසරේ සැප්තැම්බර් මස 27 වනදා අධිකරණය හමුවේ පෙනීසිටින ලෙස දන්වමින් යාපනය මහෙස්ත්‍රාත් අධිකරණය මගින් හිටපු ආරක්ෂක ලේකම් ලෙස ගෝඨාභය රාජපක්ෂ වෙත නොතීසියක් නිකුත් කර තිබුණි.

එල්ටීටීඊය පරාජය කළ සමයේ තමන් ආරක්ෂක ලේකම් වශයෙන් සිටි බැවින් ආරක්ෂක හේතු මත යාපනය අධිකරණයේ පෙනී සිටිය නොහැකි බව සඳහන් කරමින් ගෝඨාභය රාජපක්ෂ විසින් දක්වන ලද කරුණු පිළිගත් අභියාචනාධිකරණ විනිසුරු දීපාලි විජේසුන්දර ඔහු යාපනයට කැඳවීම අත් හිටුවන නියෝගයක් නිකුත් කළාය. නමුත් උසාවි යාමට නියමිතව තිබුණු දිනයට පසුදා උතුරු නැගෙනහිර සංචාරය කරමින් ඡන්ද ව්‍යාපාරයේ යෙදී සිටි ගෝඨාභය රාජපක්ෂ නිරුපද්‍රිතව ආපසු පැමිණියේය.

එම පෙත්සමට අදාළ ව නොවැම්බර් 24 අගහරුවාදා තීන්දුව ප්‍රකාශයට පත්කළ අභියාචනාධිකරණයේ සභාපති විනිසුරු නවාස් පවසා ඇත්තේ මහෙස්ත්‍රාත් අධිකරණයක් මගින් යම් පුද්ගලයකු වෙත සිතාසියක් නිකුත් කළ හැක්කේ යම්කිසි නිශ්චිත කරුණක් සඳහා පමණක් බවයි.

එහෙත් ගෝඨාභය රාජපක්ෂ වෙත මෙම සිතාසිය නිකුත්කර තිබෙන්නේ නීතිඥවරයකු ඉදිරිපත් කළ මෝසමකට අනුව යැයි පෙන්වාදුන් සභාපති විනිසුරු නවාස් ඒ තුළ කිසිදු නීතිමය පදනමක් දක්නට නොලැබෙන බව සඳහන් කළේයැයි මාධ්‍ය වාර්තා කර තිබේ.

ඒ අනුව අධිකරණය හමුවේ පෙනීසිටින ලෙස දන්වමින් ගෝඨාභය රාජපක්ෂ වෙත යාපනය මහෙස්ත්‍රාත් අධිකරණය විසින් නිකුත්කර ඇති සිතාසිය නීතියට පටහැනි මෙන්ම බලරහිත ලියවිල්ලක් බව සභාපති විනිසුරුවරයා පවසද්දී, එම සිතාසිය බලරහිත කරමින් රිට් ආඥාවක් නිකුත් කරන බව විනිසුරු මඩුල්ල සදහන් කර තිබේ.

Facebook Comments