පාසල් ගේට්ටු වැරදියට ඇර ආණ්ඩුවෙන් ගුරු සංගම් වලට දොස්

වසංගත සමයේ සැලසුමක් නොමැතිව පාසල් ආරම්භ කිරීමේ අසාර්ථකත්වය වසා ගැනීමට ආණ්ඩුව ගුරු සංගම්වලට චෝදනා කරන බව දිවයිනේ ප්‍රමුඛතම ගුරු සංගමයක් පවසයි.

අධ්‍යාපන ලේකම්වරයා හා කෙහෙලිය රඹුක්වැල්ල අමාත්‍යවරයා විසින් රජයේ ප‍්‍රවෘත්ති දෙපාර්තමේන්තුවේදී නොවැම්බර් 24 අගහරුවාදා පවත්වන ලද මාධ්‍ය සාකච්ඡාවකදී පාසල් ආරම්භ කිරීමට වෘත්තීය සමිති විරුද්ධ වන්නේ විවිධ දේශපාලන වුවමනා වෙනුවෙන් යයි ප‍්‍රකාශ කරමින් තම අසාර්ථකත්වය වසා ගැනීමට ගුරුසංගම් වලට චෝදනා කිරීම ලංකා ගුරු සංගමය විසින් හෙලා දැක තිබේ.

පාසල් නැවත විවෘත කළ ඊයේ දිනයේ සිසුන්ගේ පැමිණීම ඉතා අවම මට්ටමක පැවති අතර අද දිනයේ ද සිසුන්ගේ පැමිණීම අඩු වීම මගින්ද පැහැදිලි වන්නේ කිසිදු සැලසුමකින් තොරව ආරම්භ වූ පාසල් වෙත තම දරුවන් එවීමට දෙමව්පියන් ක‍්‍රියා කර නැති බව යැයි ලංකා ගුරු සංගමය නිවේදනයක් මගින් කියා සිටී.

පාසල් ආරම්භ නොකළ යුතුයැයි ගුරු-විදුහල්පති වෘත්තීය සමිති විසින් කිසිවිටෙකත් ප‍්‍රකාශ නොකරන ලද බව අවධාරණය කරන ලංකා ගුරු සංගමයේ ප්‍රධාන ලේකම් පවසන්නේ වෘත්තීය සමිති විසින් පෙන්වා දෙන ලද්දේ කෝවිඩ් 19 පළමු ව්‍යාප්තියෙන් පසු පියවර කිහිපයක් යටතේ පාසල් ආරම්භ කළ ආකාරයට සෞඛ්‍ය අංශවල උපදෙස් හා නිර්දේශ අනුව විධිමත් සැලැස්මක් යටතේ පාසල් ආරම්භ කරන ලෙස බවයි.

එසේම පාසල්වල සෞඛ්‍ය ආරක්ෂක කටයුතු සඳහා විධිමත් ප‍්‍රායෝගික වැඩපිළිවෙලක් සකස් කළ යුතු බව වෘත්තීය සමිති අවධාරණය කළ බවත් ගුරු සංගම් නායක ජෝසප් ස්ටාලින් අද දිනයේ නිකුත් කළ මාධ්‍ය නිවේදනයේ සදහන්ය.

අධ්‍යාපන ලේකම්ගේ “ඉලක්කම් විජ්ජා”

ජ්‍යෙෂ්ඨ වෘත්තීය සමිති නායකයා චෝදනා කරන්නේ අධ්‍යාපන ලේකම්වරයා ඉලක්කම් විජ්ජාවක් පෙන්වමින් පාසල්වල සෞඛ්‍ය ආරක්ෂක කටයුතු සඳහා මුදල් වෙන් කළ බව මාධ්‍ය ඔස්සේ ප‍්‍රකාශ කළ ද මේ දක්වා අදාළ මුදල් භෞතිකව පාසල්වලට ලැබී නොමැති අතර, සෞඛ්‍ය ආරක්ෂක පහසුකම් වෙනුවෙන් පිරිවැය දැරීමට සිදුව ඇත්තේ ද දෙමාපියන්ට බවයි.

අධ්‍යාපන ලේකම්වරයාගේ වගකීම් විරහිත ක්‍රියාකාරීත්වය සම්බන්ධයෙන් දෙමාපියන් විරෝධය පළ කර ඇත්තේ තම දරුවන් පාසල් වෙත එවීමට කටයුතු නොකිරීමෙන් බව අවධාරණය කරන වෘත්තීය සමිති නායකයා තව දුරටත් පෙන්වා දෙන්නේ මේ තත්වය තුළ ගුරුවරුන්ට පමණක් අවදානම් තත්වය යටතේ පාසලට පැමිණ නිකරුණේ කාලය ගත කිරීමට සිදුව ඇති බවයි.

වෘත්තීය සමිතිවලට චෝදනා කිරීම පසෙක තබා අධ්‍යාපන අමාත්‍යාංශය පාසල් ආරම්භ කර පවත්වා ගෙන යාම වෙනුවෙන් විධිමත් වැඩපිළිවෙලක් සකස් කළ යුතු බව ලංකා ගුරු සංගමය අධ්‍යාපන බලධාරීන්ට දැනුම් දී සිටි.

එසේම පාසල තුළින් තම දරුවාට කෝවිඩ් 19 වසංගතය ආසාදනය වීම සිදු නොවන බවට දෙමාපියන් තුළ විශ්වාසයක් ඇති කිරීමට අධ්‍යාපන අමාත්‍යාංශය කටයුතු කළ යුතු අතර, පාසල සුරක්ෂිත ස්ථානයක් බවට පත් කිරීමට විධිමත් වැඩපිළිවෙලක් සහිතව කටයුතු කළ යුතු බවත් එම මාධ්‍ය නිවේදනය මගින් අවධාරණය කර තිබේ.

දෙවැනි කොරෝනා වසංගත රැල්ල දිවයින පුරා ව්‍යාප්ත ව සමස්ථ ආසාදිතයන් ගණන විසි දහස ඉක්මවා තිබියදී පාසල් වල හය ශ්‍රේණියේ සිට දහතුන ශ්‍රේණිය දක්වා නොවැම්බර් 23 සඳුදා ආරම්භ කිරීමට අධ්‍යාපන බලධාරීන් කටයුතු කර තිබුනි.

බස්නාහිර පළාත සහ හුදකලා කරන ලද ප‍්‍රදේශවල පාසල්හැර මෙසේ අනෙකුත් පාසල් ඊයේ දින ආරම්භ කරන ලද්දේ කෝවිඩ් 19 පැතිරීම වැලැක්වීමට අදාළ කිසිදු විධිමත් වැඩපිළිවෙලකින් තොරව බවයි ලංකා ගුරු සංගමය පවසන්නේ.

“2020.11.19 වන බ‍්‍රහස්පතින්දා අධ්‍යාපන අමාත්‍යාංශය විසින් හදිසියේ ම නිවේදනය කරන ලද්දේ 23 වන සදුදා දින සිට පාසල් ආරම්භ කරන බවයි. ගුරු විදුහල්පතිවරු නියෝජනය කරන වෘත්තීය සමිති හෝ ක්ෂේත‍්‍රයේ අනෙකුත් පිරිස්වල අදහස් විමසීමකින් තොරව මෙසේ පාසල් ආරම්භ කිරීම සම්බන්ධයෙන් ගුරු-විදුහල්පති වෘත්තීය සමිති සිය විරෝධය පළ කර සිටින ලදී. එසේම වෘත්තීය සමිති විසින් ප‍්‍රකාශ කර සිටියේ 11, 12, 13 ශ්‍රේණි පමණක් ආරම්භ කර ඉදිරි සතියක කාලය තුළ අනෙකුත් පන්ති ආරම්භ කිරීම පිළිබඳව තීරණය කළ යුතු බවයි.”