රාජපක්ෂ පාලනයේ සිදුවු ඝාතන සම්බන්ධව එම අපරාධ වලට සම්බන්ධ වු පුද්ගලයින් විසින් ඉදිරි දින කිහිපය තුළ හෙළි කරනු ඇති බවට සුව ඇමැතිවරයා ඉඟි පළ කර තිබේ.
එම ඝාතන සිදුවු ආකාරය පිළිබඳව ඇසු තමන් හට කෑම කා ගැනීමට පවා නොහැකි වූ බව පවසන රාජිත සේනාරත්න ඇමැතිවරයා කාන්තාවක් එය අසා සිටියා නම් සිහිසුන් වන බව ද කියා සිටියේය.
“තමුන්නාන්සේලාට තව දවස් දෙක තුනක් යන විට ලොකු හෙළිදරව්වක් ඇතිවෙයි. මේ සිදු වූ ඝාතන ගැන. ඒ ඝාතන කළ පුද්ගලයින් මේ රටට ඇවිල්ලා කියයි. මෙතෙක් මේ ගැන හිතන්න විඥානය නොතිබුන අයට එතකොට විඥානය පහළ වෙයි. ඔවුන් කොච්චර අසරණ වුණාද ඒ දුන්න නියෝග අනුව කියලා. ඔවුන් ඒවා කරන්න ගිහින් කොච්චර අසරණ වුණා ද කියලා.” යි අමාත්‍යවරයා 07 බ්‍රහස්පතින්දා රණවිරු ප්‍රඥප්තිය එළිදැක්වීමේ මාධ්‍ය හමුවේදී පැවසීය.
එවක ආරක්ෂක ලේකම්ව සිටි පොහොට්ටු පක්ෂයේ ජනාධිපති අපේක්ෂක ගෝඨාභය රාජපක්ෂ හමුදා නිලධාරින් නොයෙකුත් ඝාතන ක්‍රියාවලට යොදා ගෙන ඔවුන් පාවා දී සැඟව සිටි බව ද අමාත්‍යවරයා සඳහන් කළේය.
රාජපක්ෂවරු තම විරුද්ධවාදින් ඝාතනය කිරීම හා වධ හිංසා කළ බවට චෝදනා කළ ඇමැතිවරයා එවැනි කුරිරු වධහිංසා ප්‍රජාතන්ත්‍රවාදී රටක සිදුවන බවට කිසිවෙක් විශ්වාස නොකරන බවත් ජාත්‍යන්තරය හමුවේ රට හෑල්ලු වු බවද කියා සිටියේය.
“එදා රාජපක්ෂවරු මරන්න හිතුන අය මැරුවා, විරුද්ධවාදීන්ට ශාරීරික වධහිංසා කළා. ඒක මේ රටට කළු පැල්ලමක් වුණා. ජාත්‍යන්තරය ඒ සිද්ධින් අහලා අපේ රට කෙළෙසුවා. මෙවැනි කුරිරු වධහිංසා මෙවැනි ප්‍රජාතන්ත්‍රවාදී රටක සිදු වෙනවා කියලා කවුරුත් හිතන්නේ නැහැ. මේ රටෙන් පිටස්තර කෙනෙක් මේ රට ප්‍රජාතන්ත්‍රවාදී, නිදහස්, ස්වාධීන නීතිගරුක රාජ්‍යක් කියලා පිළිගන්නේ නැහැ. ඒ ඝාතන කරපු අයගෙන් ඒ කථා මම ඇහුවාම මට කෑම කන්න පවා බැරි වුණා. කාන්තාවක් වගේ ඇහුවනම් සිහිසුන්ව වැටෙනවා.”
රාජපක්ෂවරුන්ගේ අණ පිලිපදිමින් අපරාධ සිදුකළ හමුදා නිලධාරින් “රණවිරුවන්” ලෙස හැඳින්වු රාජිත සේනාරත්න අමාත්‍යවරයා දැන් ඔවුන් එම අපරාධ වලට සම්බන්ධ වීම ගැන කම්පා වන බව වැඩි දුරටත් පැවසීය.
Facebook Comments
