ජාතික රූපවාහිනියට පිටස්තර රජයේ බලධාරීන් කඩා වැදී ගැටුම් කාරී තත්වයක් හටගෙන තිබේ.
මතබේදයට තුඩුදී තිබෙන MCC ගිවිසුම ගැන පැවැත්වුනු වැඩසටහනක් අතරතුර කොළඹ දිසාපති දිසාපතිවරයා ඇතුලු පිරිසක් කඩා වැදීමෙන් අනතුරුව මැතිවරණ කොමසාරිස් වරයාද රූපවාහිනියට පැමිණි බව මුදල් අමාත්‍යවරයා පවසයි.
ඔහු විසින් එය හඳුන්වා ඇත්තේ “ගෙස්ටාපෝ පන්නයේ ප්‍රහාරයක්” ලෙසයි.
ගෙස්ටාපෝ යනු හිට්ලර්ගේ ෆැසිස්ට් පාලනය යටතේ පවත්වාගෙන යනු ලැබූ වධක පොලිසියයි.
“රූපවාහිනියට ගෙස්ටාපෝ පන්නයේ කඩා වැදීමක්! MCC ගැන මගේ සම්මුඛ සාකච්ඡාවේ නිෂ්පාදනය නවත්වන්නට කොලඹ දිසාපතිගේ මැරයන් උත්සාහ කළා. මැතිවරණ කොමසාරිස් තත්වය සමහන් කළා. දිසාපති වගවිය යුතුයි,” යනුවෙන් මංගල සමරවීර අමාත්‍යවරයා නිකුත් කළ ට්විටර් පනිවිඩයක දැක්වේ.
රූපවාහිනී මාධ්‍ය කාර්ය මණ්ඩලය පවසන්නේ කොළඹ අතිරේක දිස්ත්‍රික් ලේකම්වරයා අනවසරයෙන් රූපවාහිනි සංස්ථාවේ ප්‍රධාන පාලක මැදිරියට ඇතුළු වීමට ගත් උත්සාහය ව්‍යර්ථ කෙරූ බවයි.
පොලිස් නිල ඇඳුමින් සිටි පුද්ගලයෙක් ප්‍රධාන පාලක මැදිරිය ඇතුළ වීඩියෝ ගත කිරීමට උත්සාහ කළ බවට චෝදනා කරන රූපවාහිනි සංස්ථා සේවකයන් පූර්ව දැනුම්දීමක් හා නිසි අවසරයකින් තොර ප්‍රධාන පාලක මැදිරියට පිටස්තරයන්ට ඇතුල් විය නොහැකි බවට කියා සිටිති.
මෙම සිදුවීමෙන් පසු මැතිවරණ කොමිෂන් සභාවේ සභාපතිවරයා ද ඒ ගැන සොයා බැලීමට ජාතික රූපවාහිනියට පැමිණ ඇති අතර එහිදී සභාපතිවරයා රූපවාහිනී සංස්ථාව ඇතුළට ගොස් එහි නිලධාරින් හට දෝෂාරෝපණය කළ බවට සේවකයෝ චෝදනා කරති.
හදිසි පරික්ෂාවකට බව පවසමින් ශ්‍රී ලංකා රූපවාහිනී සංස්ථාවට ගොස් සිටි කොළඹ අතිරේක දිස්ත්‍රික් ලේකම්වරයාට එළියට ඒමට නොදී සිවිල් ආරක්ෂකයන් ගේට්ටු වසා දැමීම සම්බන්ධව කුරුඳුවත්ත පොලිසියට පැමිණිල්ලක් ලැබී ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී රුවන් ගුණසේකර පැවසීය.
පොලිස් නිලධාරින් සමඟ 07 බ්‍රහස්පතින්දා රූපවාහිනී සංස්ථාවට ගිය බවත්, එහිදී අයුතු ලෙස අවහිරයක් කළ බවට අතිරේක දිස්ත්‍රික් ලේකම්වරයා පැමිණිලි කර ඇති බවයි පොලිසිය පවසන්නේ.
මැතිවරණයේදී පිළිපැදිය යුතු ආචාර ධර්ම සම්බන්ධයෙන් නිර්දේශ නිකුත් කරන සහ ප්‍රසිද්ධ සාකච්ඡා පවත්වන මැතිවරණ කොමිසමේ සභාපතිවරයා තමන් ද සම්බන්ධ මෙම සිද්ධිය ගැන කිසිවක් ප්‍රකාශ කළ වගක් දැන ගන්නට නැත.
Facebook Comments
