යුක්තිය නොලබාම තවත් දෙමළ පියෙක් මිය ගිහින්

අතුරුදහන් සිය පුත්‍රයා සොයා ගැනීම වෙනුවෙන් දහසය වසරක් වෙහෙසුනු යුද පීඩිත වන්නියේ තවත් දෙමළ පියෙක් පිළිතුරු නොලබාම මියගොස් තිබේ.

යුද සමයේත්, ඉන් පසුවත් අතුරුදහන් තම ඥාතීන් සොයමින් දින දෙදහස් පන්සියකට ආසන්න කාලයක් උතුරු නැගෙනහිර අරගලයේ යෙදී සිටින මුල් පෙලේ සාමාජිකයන් පවසන පරිදි මේ වන විටත් යුක්තිය නොලබාම මියගොස් ඇති මව්පියන් ගණන 188 ට වැඩිය.

බලහත්කාරයෙන් අතුරුදහන් කළ සිය සමීපතමයන් සොයා ගැනීම වෙනුවෙන් වවිනියාවේ අඛණ්ඩව ක්‍රියාත්මක වන සත්‍යග්‍රහ භුමියේ දින 2428 ක් ද වාඩිලා සිටි මුත්තයියා ආරුමුගම් පියා මිය ගොස් ඇත්තේ ඔක්තෝබර් 12 වැනි බ්‍රහස්පතින්දාය.

2007 වසරේ වව්නියාව නගරයට ගිය ආරුමුගම් සිවකුමාර්ට අත් වු ඉරණම කුමක්දැයි දැන ගැනීමට ඔහුගේ පවුලේ සාමාජිකයන්ට මේ තාක් කිසිදු තොරතුරුක් ලැබී නොමැත.

තම පුත්‍රයා වු ආරුමුගම් සිවකුමාර් සොයමින් වෙහෙසුන වවුනියාව, මහා රම්බෙයිකුලම්, ශ්‍රී රාමපුරම් හි පදිංචිකරුවකු වු මුත්තයියා ආරුමුගම් පියා අයහපත් සෞඛ්‍ය තත්වයක් හේතුවෙන් මිය යන විට 65 වන වියේ පසු වු බව පළාත් බද වාර්තාකරුවෝ පවසති.

ඔහු විශ්වාස කර ඇත්තේ සිය පුත්‍රයා වු ආරුමුගම් සිවකුමාර් රජයේ ආරක්ෂක අංශ විසින් වව්නියාව නගරයේ දී පැහැර ගන්නට ඇති බවයි.

බලහත්කාරයෙන් අතුරුදහන් කරනු ලැබුවන් සොයාගැනීමේ අඛණ්ඩ අරගලයක යෙදී සිටින ඥාතීන්ට එකම සමීපතමයකු හෝ සොයා දීමට සමත් නොවු වසර පහ හමාරක් වයසැති අතුරුදහන් වූ තැනැත්තන් පිළිබඳ කාර්යාලයේ වත්මන් සභාපති මහේෂ් කටුලන්ද්රජයේ ප්‍රවෘත්ති දෙපාර්තමේන්තුවේදී මාධ්‍ය හමුවක් පවත්වමින් පසුගියදා සඳහන් කර තිබුනේ, යුද වින්දිත මව්වරුන්ට වකුගඩු සැත්කම්වලදී විශේෂ පහසුකම් ලබා දෙන බවයි.

“වකුගඩු ඔපරේෂන් එකකට ඉන්නවා මාස ගානක් පොලිමේ. එවැනි අවස්ථාවක අපි මේ ගණයේ අයට, වෛද්‍යවරුන්ට කතා කරලා ඒ රජයේ යාන්ත්‍රණයට කතා කරලා ඔවුන්ට ඒ විශේෂ පහසුකම් දෙනවා.” නීතිඥ මහේෂ් කටුලන්ද කියා තිබුණි.

යුද්ධාවසානයේ රජයේ හමුදාවට භාරවීමෙන්ද, පැහැරගනු ලැබීමෙන්ද අනතුරුව අතුරුදහන් කරන ලද සමීපතමයන්ගේ ඉරණම හෙළි කරගැනීම සඳහා දෙමළ ජනතාව ඉකුත් පහළොස් වසරකට ආසන්න කාලයක් තිස්සේ ඉල්ලා සිටින්නේ ජාත්‍යන්තර මැදිහත්වීමකි.

යුද්ධයේ අවසාන දින වලදී ආරක්ෂක අංශ භාරයට පත් වීමෙන් පසුව හා යුද්ධයේ අවසන් මොහොතේ අතුරුදහන් වු තමන්ගේ ආදරණීයයන්ට අත්වූ ඉරණම හෙළි කරන ලෙස රජයට බල කරමින් 2017 වසරේ පෙබරවාරි සහ මාර්තු මාසවලදී වව්නියාව, කිලිනොච්චිය, යාපනය, මුලතිව්, ත්‍රිකුණාමලය සහ අම්පාර දිස්ත්‍රික්ක වල සත්‍යග්‍රහ ව්‍යාපාර ආරම්භ විය.

බලහත්කාරයෙන් අතුරුදහන්කරවුවන් වෙනුවෙන් යුක්තිය ලබා දෙන බව පවසමින් ආණ්ඩුව යෝජනා කර තිබෙන අතුරුදන්වූවන් සඳහා නිකුත් කරන සහතිකය ලබා ගැනීමත්, වන්දි මුදල් ලබා ගැනීමත් තම සමීපතමයන් අහිමිව සිටින යුද වින්දිත දෙමළ මව්වරු ප්‍රසිද්ධියේම ප්‍රතික්ෂේප කරති.

රාජ්‍ය ආරක්ෂක අංශ ප්‍රධාන සැකකරුවන්ව සිටින බැවින්, යුද අපරාධ චෝදනා පිලිබඳ පරීක්ෂණ ක්‍රියාත්මක කිරීමට ශ්‍රී ලංකා රජයට දේශපාලනික උවමනාවක් නොමැති බව මානව හිමිකම් ක්‍රියාකාරීන් දිගින් දිගටම පෙන්වා දී තිබේ.

ආණ්ඩුක්‍රම ව්‍යවස්ථාවේ 13 වැනි සංශෝධනය සහ බලය බෙදීම පිළිබඳ සිය යෝජනා සහ ඉදිරි ක්‍රියාමාර්ග සම්බන්ධයෙන් අගෝස්තු 9 වැනිදා ජනාධිපති රනිල් වික්‍රමසිංහ පාර්ලිමේන්තුවවේ සිදු කළ විශේෂ ප්‍රකාශයේදී සඳහන් කර තිබුනේ උතුරු නැඟෙනහිර ජනතාවට යුක්තිය ඉටු කිරීමේ අවශ්‍යතාව තමන් යළිත් අවධාරණය කරන බවයි.

අතුරුදහන් වූවන් පිළිබඳ කාර්යාලය වෙත ලැබී ඇති පැමිණිලි 21,374 න් 3,462 ක විමර්ශන මේ වන විට අවසන් කර ඇති අතර ඉතිරි පැමිණිලි සඳහා විමර්ශන ප්‍රගතියක් ලබන අතර, සත්‍ය සෙවීමේ යාන්ත්‍රණය සම්පූර්ණයෙන් ක්‍රියාත්මක වීමෙන් පසු මෙම ක්‍රියාවලිය වේගවත් විය හැකි බව ඔහු සඳහන් කර තිබුනි.