උතුරේ දියත් කළ යුද්ධය අතරතුරදී ශ්‍රී ලංකාවේ සිවිල් වැසියන්ට එරෙහිව සිදු කරන ලද කුරිරුකම් හෙළිදරව් කරමින් රාජකාරියේ යෙදී සිටියදී ඝාතනයට ලක් වූ හෝ අතුරුදහන් කරනු හෝ ලැබූ මාධ්‍යවේදීන්ට යුක්තිය ඉල්ලා උද්ඝෝෂණයක් දියත් කර තිබේ.
දේශසීමා නොමැති මාධ්‍යවේදියෝ (Reporters without Borders – RSF) සංවිධානයේ අලුත්ම ලෝක මාධ්‍ය නිදහස් දර්ශකයට අනුව, මාධ්‍ය නිදහස අතින් ශ්‍රී ලංකාව පසුගිය වසරට වඩා මෙවර තව දුරටත් පහළට ඇද වැටී තිබේ.
මේ වසරේදී ශ්‍රී ලංකාව පසුවෙන්නේ රටවල් 180 ක් අතුරින් 150 වැනි ස්ථානයේයි.
2023 වසරේ ශ්‍රී ලංකාව රටවල් 180 අතුරින් 135 වෙනි ස්ථානයෙන් පසුවු අතර මෙවර එය ස්ථාන 15කින් පහත වැටීමකි.
ලෝක මාධ්‍ය නිදහස සඳහා වන දිනය යෙදී තිබු මැයි 3 වැනිදා යාපනය මාධ්‍ය සමාජය ඉදිරිපිටදී, සහෝදර මාධ්‍යවේදීන් සමග විරෝධතා දියත් කළ එම මාධ්‍ය සමාජයේ සභාපතිවරයා දෙමළ බසින් සඳහන් කළේ , මෙවරත් ලෝක මාධ්‍ය නිදහස් දිනය සැමරීමට සිදුව ඇත්තේ ද මාධ්‍ය මර්දනයක් මධ්‍යයේම බවයි.
“අපි මෙතන එකතුවෙලා අපේ මාධ්‍යවේදීන්ට යුක්තිය ඉල්ලනවා. නමුත් ප්‍රජාතන්ත්‍රවාදී රටක් යැයි කියන ශ්‍රී ලංකාව එසේ ක්‍රියාත්මක වන බවක් පේන්න නෑ. රාජ්‍ය යාන්ත්‍රණය විසින් මාධ්‍ය සහ මාධ්‍යවේදීන් මර්දනය කිරීම අලුත් ආකාරයකින් අපට දකින්නට පුළුවන්. මෙය අපට අලුත් දෙයක් නොමෙයි.”
යාපනය මාධ්‍ය සමාජයේ සභාපති මාධ්‍යවේදී ආරුමුගම් සබේස්වරන් එහිදී වැඩි දුරටත් අවධාරණය කළේ කුමන තර්ජන පැමිණියත් ජනතාව වෙනුවෙන් සිදු කරන වාර්තාකරණය අත් නොහරින බවයි.
“අපි තුවක්කු තර්ජන මැද්දේත් පුවත් පළ කර තිබෙනවා. නමුත් කුමන තර්ජන එල්ල කළත්, කුමන මර්දනයක් එල්ල කළත් අතීතයේ ඝාතනයට ලක් වූ අපේ සහෝදර මාධ්‍යවේදීන්ගේ මතකයන් රැගෙන අපි ගමන යනවා.”
මාධ්‍යවේදීන් 44 ක්
ජනතා අරගලයකින් මීට දෙවසරකට ඉහත දී පලවා හරින ලද හිටපු ජනාධිපති ගෝඨාභය රාජපක්ෂ ආරක්ෂක ලේකම් සමයේදී ඝාතන සහ පැහැරගැනීම් ඇතුළු පීඩාවලට රට තුලදී ලක්වූ මාධ්‍යවේදීන් ගණන 44 ක් බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසින් සම්පාදනය කරන ලද වාර්තාවක දැක්වේ.
ඉන් වැඩි ප්‍රමාණයක් උතුරේ දෙමළ මාධ්‍යවේදීන්ය. ඔවුන් කිසිවකුටත් මේ තාක් යුක්තිය ඉටු වී නොමැත.
මාධ්‍යවේදීන් ඝාතනය සහ අතුරුදහන් කිරීම ගැන වගකිව යුත්තන්ට ශ්‍රී ලංකාවේ මෙතෙක් පැවති ආණ්ඩු විසින් දඬුවමින් මිදී සිටීමේ වරප්‍රසාදය සලසා දීම යුක්තිය ඉටු කිරීමට ප්‍රධානතම බාධාවක් ලෙස එක්සත් ජාතීන්ගේ සංවිධානය හා යුරෝපා සංගමය ඇතුළු ආයතන විසින් පෙන්වා දී ඇතත්, ඒ සම්බන්ධයෙන් ආණ්ඩුව මේ දක්වා කිසිදු පියවරක් ගත් බවක් දැන ගන්නට නැත.
Facebook Comments
