එක්සත් ජාතීන්ගේ රැකවරණ යටතේ මෙරට රැඳී සිටින මියන්මාර සරණාගතයන් හට පහර දීම දැඩිව හෙලා දකින ජනමාධ්‍ය හා මුදල් ඇමැතිවරයා එම පහර දීමට නායකත්වය දුන් බෞද්ධ භික්ෂුන් “චීවරධාරි රස්තියාදුකාරයන්” ලෙසට චෝදනා කරයි.
මෙම පහර දීම ජාත්‍යන්තර වශයෙන් බෞද්ධ ධර්මයට කල විශාලම පහර දීම බවයි අමාත්‍ය මංගල සමරවීර නිවේදනයක් නිකුත් කරමින් පෙන්වා දෙන්නේ.
“චීවරධාරී රස්තියාදුකාරයන් පැමිණ මුළු බෞද්ධ ආගමටම ජාත්‍යන්තර වශයෙන් කළ හැකි විශාලම පහරදීම කළා. ලෝකයේ තිබෙන ඉතාමත් නිහතමානී, අහිංසක ආගමක්, ධර්මයක් ලෙස සලකන බෞදධයන් ම්ලේච්ඡ මිනීමරුවන්, රස්තියාදුකාරයන් ලෙස දැකගැනීමට සිදුවීම සමස්ත බෞද්ධ ආගමටම නිග්‍රහයක්.” යැයි ඇමතිවරයා පවසයි.
අක්මීමන දයාරතන හිමිගේ නායකත්වය යටතේ රෝහින්ග්‍යවරුන් රඳවා සිටි ගල්කිස්ස ප්‍රදේශයේ නිවසක් අසලට 26 අඟහරුවාදා කඩා වැඳි පිරිස “මියන්මාර ත්‍රස්තවාදීන් පිරිසක්” එම ස්ථානයේ රැඳී සිටින බව පවසමින් කලහකාරි ලෙස හැසිරෙන විඩියෝ සමාජ ඡාලා වල පල කර තිබුණි.
බෞද්ධ භික්ෂුන්ගේ විරෝධය හමුවේ ගල්කිස්ස ප්‍රදේශයේ එක්සත් ජාතීන්ගේ සරණාගතයන් කාර්යාලයේ රැකවරණය ලබමින් රැඳි සිටි මියන්මාර රෝහින්ග්‍යා මුස්ලිම්වරු 30 වැඩි ප්‍රමාණයක් ආරක්ෂාව පතා සිය රැකවරණයට ගත් බව පොලිස් මාධ්‍ය ප්‍රකාශක රුවන් ගුණසේකර සිලෝන් ජර්නල්ස් වෙත කියා සිටියේය.
තාවකාලිකව රැඳී සිටින මියන්මාර “අහිංසක සරණාගතයන්ට” පහරදීම ඉතාම පහත් ක්‍රියාවක් ලෙස හෙලා දකින ඇමැති මංගල මියන්මාර සරණාගතයන් මෙරට රැඳී සිටි පලමු අවස්ථාව මෙය නොවන බව පෙන්වා දෙයි.
සියලුම දෙනා මෙම පහරදීමට විරුද්ධ විය යුතු බව මෙන්ම එක්සත් ජාතීන්ගේ රැකවරණය යටතේ සිටින සරණාගතයන්ට පහරදුන් අයවලුන්ට නීතිය වහාම ක්‍රියාත්මක කල යුතු බව සිය නිවේදනය හරහා මංගල සමරවීර ඇමැතිවරයා අවධාරණය කර තිබේ.
Facebook Comments
