කිසිදු පාර්ශවයකින් විදේශ අමාත්‍ය ධුරයෙන් ඉවත් වන ලෙසට බලපෑම් නොකළ බව කී අමාත්‍ය රවී කරුණානායක පාර්ලිමේන්තුවේදී විශේෂ ප්‍රකාශයක් කරමින් සිය ඇමති ධුරයට සමු දුන්නේය.
මහ බැංකු බැඳුම්කර වංචාව සම්බන්ධයෙන් චෝදනා එල්ල වී සිටින අමාත්‍ය රවී කරුණානායක එම වංචාව සම්බන්ධයෙන් විමර්ශන සිදු කරනු ලබන ජනාධිපති කොමිසම හමුවේ පසුගියදා සාක්ෂි ලබා දුනි.
සිය ඇමැති ධුරයෙන් ඉවත් වීමට ගත් තීරණය සම්බන්ධයෙන් කිසි විටෙකත් කම්පා නොවන බව මෙන්ම එය ඉතා ආඩම්බරයෙන් ගන්නා ලද තීරණයක් බවයි 10 බ්‍රහස්පතින්දා පාර්ලිමේන්තුව හමුවේ විශේෂ ප්‍රකාශයක් කරමින් අමාත්‍යවරයා කියා සිටියේ.
“බලලෝභී ක්‍රමන්ත්‍රණකරුවන්”
එල්ල වී ඇති චෝදනා හේතුවෙන් එක්සත් ජාතික පක්ෂය හෝ යහපාලන ආණ්ඩුව විනාශ කිරීමට “බලලෝභී ක්‍රමන්ත්‍රණකරුවන්ට” ඉඩ නොදෙන බව ද ඔහු අවධාරණය කළේය.
මහ බැංකු බැඳුම්කර සිද්ධියට චෝදනා එල්ල වීමත් සමඟ අමාත්‍ය රවී කරුණානායක හට සිය ධුරයෙන් ඉල්ලා අස්වන ලෙසට ජනපති හා අගමැති ඇතුළු විවිධ පාර්ශව ඉල්ලිම් කළ බව මාධ්‍ය වාර්තා කර තිබුණත් අමාත්‍යවරයා එම මාධ්‍ය වාර්තා ප්‍රතික්ෂේප කර තිබුණි.
රවී කරුණානායක පාර්ලිමේන්තුවේ විශ්වාසය කඩ කළ බව පවසමින් ඒකාබද්ධ විපක්ෂය විශ්වාස භංග යෝජනාවක් ඉදිරිපත් කර ඇති අතර ශ්‍රීලනිපය සහ එජාපයේ ඇතැම් පිරිස් එයට සහය පල කරනු ඇති බවට ඒකාබද්ධ විපක්ෂය විශ්වාසය පල කළේය.
ජනාධිපති මෛත්‍රීපාල සිරිසේන, අග්‍රාමාත්‍ය රනිල් වික්‍රමසිංහ හා රවී කරුණානායක එක්ව 09 බදාදා පවත්නා තත්ත්වය පිළිබඳ දීර්ඝ ලෙස කරුණු සාකච්ඡා කිරීමෙන් අනතුරුව අමාත්‍යවරයා සිය ධුරයෙන් ඉල්ලා අස්වීමට තීරණය කළ බව දේශපාලන ආරංචි මාර්ග පවසයි.
හොඳම මුදල් ඇමති කෙටිම විදේශ ඇමති
තුන් සමකටත් අඩු කාලයක් විදේශ අමාත්‍ය දැරූ රවී කරුණානායක ශ්‍රී ලංකාවේ ආණ්ඩුවක කෙටිම කාලයක් විදේශ අමාත්‍ය ධුරය දැරූ අයකු ලෙස ඉතිහාස ගතවෙයි.
‘ද බෑන්කර්’සඟරාව විසින් පිරිනමන ආසියානු පැසිෆික් කලාපයේ හොඳම මුදල් අමාත්‍යවරයා ලෙස සම්මාන හිමි කර ගැනීමටද හිටපු මුදල් අමාත්‍ය රවී කරුණානායක සමත් විය.
Facebook Comments
