වෙල් ලක්ෂයක් තිබූ වෙල්ලස්සෙන් නව ව්‍යවසායකයින් ලක්ෂයක් බිහි කිරීම “එන්ටර්ප්‍රයිස් ශ්‍රී ලංකා” වැඩපිළිවෙලේ අරමුණ බව රාජ්‍ය ව්‍යවසාය හා මහනුවර නගර සංවර්ධන අමාත්‍යවරයා පවසයි.
මොණරාගල පැවැත්වෙන එන්ටර්ප්‍රයිස් ශ්‍රී ලංකා ජාතික ප්‍රදර්ශනයේ දෙවැනි දිනය නිලවශයෙන් විවෘත කිරීමේ අවස්ථාවට එක්වෙමින් 30 බ්‍රහස්පතින්දා අමාත්‍ය ලක්ෂ්මන් කිරිඇල්ල මේ බව කියා සිටියේය.
ව්‍යවසායකයින් හඳුනාගනිමින් ලංකා ඉතිහාසෙය් ප්‍රථම වතාවට රාජ්‍ය බැංකු ගමට ගොස් ණය ලබා දුන් අවස්ථාව මෙය බව ද අමාත්‍යවරයා පෙන්වා දුනි.
“ලංකා ඉතිහාසයේ රාජ්‍ය බැංකු ගමට ගියේ නෑ. ජනතාව බංකුවට ගියා පමණයි සිදු වුනේ. ප්‍රථම වරට රාජ්‍ය බැංකු ගමට ගිහින් ගමේ අවශ්‍යතාවය හඳුනාගනිමින් ණය ලබාදීමේ අවස්ථාව ඇති කර තිබෙනවා. ග්‍රාමීය ජනතාව බැංකුවකට යන්නේ බොහොම සැකෙන්.රජය මෙය තේරුම් ගෙන මුදල් අමාත්‍ය මංගල සමරවීර අමාත්‍යතුමා සමඟ තීරණයක් ගත්තා, අපි ගමට යමු කියලා.ග්‍රාමීය තරුණ පරම්පරාවගේ අවශ්‍යතාවය අනුව ණය පහසුකම් ලබාදීලා,ව්‍යවසායකයින් බිහි කිරීමට යම්කිසි ශක්තියක් ලබදීමට තීරණය කළා.”
ග්‍රාමීය මට්ටමින් ව්‍යවසායකයින් නැංවීමේ අරමුණින් එන්ටප්‍රයිස් ශ්‍රී ලංකා ප්‍රදර්ශනය සමගාමීව ව්‍යවසායකයින් වෙත ව්‍යවසායක ණය ප්‍රදානය කිරීම ද ප්‍රදර්ශන භුමියේ දී සිදු කරන ලදී.
ව්‍යවසායකයින් ලක්ෂයක් බිහිකරමින් දේශීය ව්‍යවසායකත්වය ශක්තිමත් කිරීමේ අරමුණින් මෙම වැඩපිළිවෙල ක්‍රියාත්මක කෙරෙන බවයි රජය පවසන්නේ.
ජාතික ඉතිරිකිරීමේ බැංකුව, ලංකා බැංකුව, මහජන බැංකුව යන රාජ්‍ය බැංකු මඟින් මෙම ව්‍යවසායක ණය නිකුත් කර තිබෙන අතර සංඛේතාත්මකව ලෙස ව්‍යවසායකයින් සියයකට පමණ ණය ප්‍රදානය කළේ ය.
Facebook Comments
