කොක්කුතුඩුවායි සමූහ සුසානයේ කැනීම් තවත් කල් යයි

ජාත්‍යන්තර ප්‍රමිතීන් අනුගමනය කරන බවට රාජ්‍ය නිලධාරීන් විසින් සහතික වීමෙන් අනතුරුව, කොක්කුතුඩුවායි සමූහ සුසානයේ කැණීම් කටයුතු අධිකරණ වෛද්‍ය නිලධාරීන් කණ්ඩායමකගේ සහායද සහිතව, පුරාවිද්‍යා දෙපාර්තමේන්තුවට පැවරීමට අධිකරණයේ මූලිකත්වයෙන් පවත්වන ලද ඉහළ පෙළේ හමුවක දී තීරණය කර තිබේ.

සමූහ මිනී වලක් බවට සැක කෙරෙන මෙම ස්ථානය, ජල සම්පාදන දෙපාර්තමේන්තුවේ කාර්ය මණ්ඩලය මුලතිව් දිස්ත්‍රික්කයේ මධ්‍යම කොක්කුතුඩුවායි ප්‍රදේශයේ ජූලි 29 වැනි දින ජලනල එළීමට අගල් හාරමින් සිටියදී අහම්බයෙන් හමු වී තිබුනි.

මුලතිව් අධිකරණ සංකීර්ණයේදී දිසා විනිසුරු ටී. ප්‍රදීපන්ගේ මූලිකත්වයෙන් ජුලි 13 වැනිදා පවත්වන ලද ඉහළ පෙලේ සාකච්ඡාවකින් පසුව, මෙම ස්ථානයේ ඉදිරි කැණිම් කටයුතු පිළිබද තීරණය ගැනීම අදට කල් තබා ඇත.

විමර්ශන කටයුතු වලදී ජාත්‍යන්තර නිරීක්ෂකයන්ට අවස්ථාව ලබා දුන්නද, ඉදිරි කැනීම් සදහා විදේශීය මැදිහත් වීමක් සිදු කර නොගන්නා බවට තීරණය වී තිබේ. කැනීම් කටයුතු වාර්තා කිරීමට මාධ්‍යවේදීන්ට අවසර ලැබේ.

මේ සදහා අවශ්‍ය අරමුදල් අතුරුදහන් වූවන්ගේ කාර්යාලය (OMP) හරහා ලබා ගන්නා ලෙස විමර්ශකයන්ට උපදෙස් දී ඇත.

ශරීර කොටස් ඇතුළු ගොඩගන්නා ද්‍රව්‍යයන්හි සහ සුසාන භූමියේ ආරක්ෂා තර කිරීම සම්බන්ධයෙන් සවිස්තරාත්මකව සාකච්ඡා කිරීම අද හමුවට යෙදී තිබේ.

කෝකිලායි පොලිස් ස්ථානයේ ස්ථාන භාර නිලධාරී ඇතුළු ජ්‍යෙෂ්ඨ පොලිස් නිලධාරීන් සහභාගි වූ මෙම හමුවට, මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේව සහ යාපනය රෝහලේ අධිකරණ වෛද්‍ය නිලධාරීන් වන සෙල්ලයියා ප්‍රනවන් සහ රුද්‍රන් පසුපති මයුරදන් ද 13 දා සාකච්ඡාවට සහභාගී වී ඇත.

අතුරුදහන් තැනැත්තන් පිළිබඳ කාර්යාලය (OMP) වෙනුවෙන් ජ්‍යෙෂ්ඨ නීතිඥ ජෙනගානදන් තට්පරන්, දෙමළ ජාතික සන්ධානයේ පාර්ලිමේන්තු මන්ත්‍රී හා ජනාධිපති නීතිඥ එම්. ඒ. සුමන්දිරන්, නීතිඥ කේසවන් සයන්දන්, නීතිඥ වී.එස් ධනංජයන් සහ නීතිඥ රුචිකා නිත්‍යානන්දරාජා මෙම හමුවට සහභාගි විය.

මානව හිමිකම් සහ සංවර්ධන මධ්‍යස්ථාන (CHRD) නියෝජනය කරමින් නීතිඥ රනිතා ඥානරාජා හා නීතිඥ වී.කේ නිරංජන් වින්දිතයන් වෙනුවෙන් පෙනී සිටියහ.

ජුඩ් අමලදාස් පියතුමා සහ යාපනය නල්ලුර් ශිව ගුරු ආශ්‍රමයේ තවතිරු වේලන් ස්වාමි ද සහභාගි වූ මෙම හමුවට යාපනය දිස්ත්‍රික් පාර්ලිමේන්තු මන්ත්‍රී සහ දෙමළ ජාතික ජනතා පෙරමුණේ (TNPF) ලේකම් සෙල්වරාසා ගජේන්ද්‍රන්ද ද සහභාගි වී ඇත.

සමූහ සුසාන භූමිය හමුවූ අවස්ථාවේ මෙන්ම මුල්ම කැනීම් සිදුකළ අවස්ථාවේ සහභාගී වූ පිරිස අතර සිටි උතුරු පළාත් සභාවේ හිටපු මන්ත්‍රී තුරෙයිරාසා රවිහරන්, මුලතිව් දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන්ගේ සංගමයේ සභාපතිනි මරියසුරේෂ් ඊශ්වරී සමග සමාජ ක්‍රියාකාරික පීටර් ඉලන්චේලියන් ද එම සාකච්ඡාවට සහභාගි වී තිබේ.

අධිකරණ වෛද්‍ය නිලධාරී වාසුදේවගේ මූලිකත්වයෙන්, සෙල්ලයියා ප්‍රනවන් සහ රුද්‍රන් පසුපති මයුරදන් ඇතුලු යාපනය රෝහලේ අධිකරණ වෛද්‍ය නිලධාරීන් කණ්ඩායමක්, කැනීම් කටයුතු මෙහෙයවන පුරාවිද්‍යා දෙපාර්තමේන්තුවට සහය වනු ඇත.

ජාත්‍යන්තර සහ විශේෂඥ දැනුමට අනුකූල නොවන ලෙස සිදුකරනු ලබන ඕනෑම කැනීම් කටයුත්තකින් විමර්ශන කටයුතු වලට බාධා සිදුවිය හැකි බවටත්, එමගින් සත්‍යය වැළලී යා හැකි බවටත්, වින්දිතයන් වෙනුවෙන් සහභාගී වූ නියෝජිතයන් බිය පළ කර තිබේ.

කොක්කුතොඩුවායි සමූහ මිනීවල අනාවරණය වීමට සතියකට කලින් දේශීය හා විදේශීය මානව හිමිකම් සංවිධාන හතරක් විසින් ශ්‍රී ලංකාවේ මෙතෙක් හමුවූ සමූහ සුසාන 20ක කැනීම් අසාර්ථක වූ ආකාරය පිළිබඳව කොළඹදී එළිදැක්වූ වාර්තාවක ඉදිරි විමර්ශන සාර්ථක කරගැනීම සඳහා ගුරුකොට ගත හැකි ලෝක සම්මත මාර්ගෝපදේශ හඳුන්වා දී තිබුණි.

බහිර් නීතික, අත්තනෝමතික සහ ලඝු ඝාතන සාර්ථක ලෙස වලක්වා ලීම සහ විමර්ශනය පිළිබඳ 2016 සංශෝධිත එක්සත් ජාතීන්ගේ අත්පොත (මිනීවළවල් කැනීම සම්බන්ධ මාර්ගෝපදේශ ද ඇතුලත් මිනසෝටා මූලපත්‍රය), ජාත්‍යන්තර රතු කුරුස කමිටුවේ (ICRC) මගපෙන්වීම සහ අතුරුදහන් තැනැත්තන් පිළිබඳ ජාත්‍යන්තර කොමිසමේ (ICMP) සමූහ මිනීවළවල් ආරක්ෂා කිරීම සහ විමර්ශනය පිළිබඳ 2020 බෝර්න්මත් මූලපත්‍රය ඒ මාර්ගෝපදේශ වෙයි.

අලුත්ම සමූහ මිනීවලේ කැනීම් සඳහා මුදල් ලබාදීමට නිර්දේශ කොට ඇති OMP කාර්යාලයේ නියෝජිතයන්ටද එම වාර්තාව පිළිගන්වන ලදී.