ජාතික ප්‍රශ්නයට විසඳුම් ලබා දෙන නව ව්‍යවස්ථාවක් හරහා අතුරුදහන් කරවීම වැනි මර්දන ක්‍රියා නවතාලිය හැකි බවට ජාතිවාදයට එරෙහිව සටන් වදින වාමාංශික නායකයකු ප්‍රකාශ කර තිබේ.
දෙමළ ප්‍රදේශ වල මෙන්ම සිංහල ප්‍රදේශ වල ද අතුරුදහන් කරවීම සිදුවුයේ ජාතිවාදි සටන් නිසා බවට ආචාර්ය වික්‍රමබාහු කරුණාරත්න 30 බ්‍රහස්පතින්දා අතුරුදහන් කරවීම් වලට එරෙහි දිනය සැමරීමට අතුරුදහන් වුවන් පිළිබඳ කාර්යාලය සංවිධානය කළ උත්සවය අවසානයේ මාධ්‍ය වෙත කියා සිටියේය.
“ජාතික ප්‍රශ්නය විසඳන්නෙ නැතුව දෙමළ ජනතාව මර්දනය කිරීම උඩ තමයි අතුරුදහන් කිරීම ප්‍රශ්නය ඉතාම උග්‍ර තලයකට ගමන් කළේ. සිංහල ප්‍රදේශ වල අතුරුදහන් වීමත් ආවේ දේශප්‍රේමීන්ගේ කියලා ජාතිවාදි සටනක් කරලා ඒකෙ උදවිය තමයි බොහෝ විට සිංහල ප්‍රදේශ වල ගොදුරු වුනේ,” යනුවෙන් නව සම සමාජ පක්ෂ නායකයා ප්‍රකාශ කළේය.
ජාතිවාදී පදනම මත සිදු වු සටන් වලදී අතුරුදහන් කරවීම් සිදු කරනු ලැබු බව පෙන්වා දුන් ආචාර්ය වික්‍රමබාහු බලය බෙදීම හරහා එම පළාත් වල ජනයාගේ අයිතිවාසිකම් ලබා දී පමණක් මර්දනය නවතා ගත හැකි බවයි අවධාරණය කරන්නේ.
ප්‍රජාතන්ත්‍රවාදි විප්ලවය බිඳ වැටී නැවත ෆැසිස්ට් පාලනයක් ඇති වුවහොත් අතුරුදහන් වුවන් පිළිබඳ වු කාර්යාලය වැනි ආයතන සුන්බුන් ගොඩක් බවට පත්වන බව කී නව සම සමාජ පක්ෂ නායකයා එම ආයතන වල ප්‍රධානීන් පවා අතුරුදහන් කරවනු ඇති බවට අනතුරු ඇඟවීය.
නව ව්‍යවස්ථාවක් සකස් කර ශක්තිමත් පදනමක් මත ප්‍රජාතන්ත්‍රවාදය ස්ථානගත කිරීමෙන් පමණක් ස්වාධීන ආයතන වලින් රටට ප්‍රයෝජනයක් ගත හැකි බ නව සම සමාජ පක්ෂ නායක ආචාර්ය වික්‍රමබාහු කරුණාරත්න වැඩි දුරටත් කියා සිටියේය.
Facebook Comments
