හිටපු ආරක්ෂක ලේකම් ගෝඨාභය රාජපක්ෂ හට ඇමරිකාවේදී නඩු පැවරීමට ආණ්ඩුවේ කිසිදු සම්බන්ධයක් නොමැති බව රජය කියා තිබේ.
ඇමරිකාවේ පිහිටි ශ්‍රී ලංකා කොන්සල් ජෙනරාල් කාර්යාලය සහ ඩයස්පෝරාව සම්බන්ධවී තමන් හට නඩු පැවරූ බවට ගෝඨාභය රාජපක්ෂ කරන ලද ප්‍රකාශ සම්බන්ධව මාධ්‍ය කළ විමසීමකදී රාජිත සේනාරත්න අමාත්‍යවරයා මේ බව පැවසීය.
“ජාත්‍යන්තරයේ තියෙන එල්ටීටීඊ ඩයස්පෝරාවට අයිති NGO එකක්, ඒ වගේම ලංකාවේ යම් යම් කොටස්, ඒ වගේම කණගාටුයි කියන්න කැලිෆෝනියාවේ තියෙන කොන්සියුල ජෙනරල් කාර්යාලයෙනුත් මේක මෙහෙයුවා ඒ වගේ පහත් තත්ත්වයකට දේශපාලනය ගෙන යාම ඉතාමත් අසාධාරණයි.” යැයි අධිකරණයෙන් ලද අවසරයෙන් ඇමරිකාවට ගොස් පැමිණි ගෝඨාභය රාජපක්ෂ කටුනායක ගුවන් තොටුපලේදී 12 සිකුරාදා මාධ්‍ය වෙත කියා සිටියේය.
කොන්සල් ජෙනරාල් කාර්යාලය නඩු පැවරීමට කිසිදු සම්බන්ධයක් නැති බවට ඇමරිකාවේ කොන්සල් ජෙනරාල්වරිය ද තමන් වෙත තහවුරු කළ බව රාජිත සේනාරත්න අමාත්‍යවරයා වැඩි දුරටත් සඳහන් කළේය.
ගෝඨාභය රාජපක්ෂ ආරක්ෂක ලේකම් ධුරය දරන සමයේ හිටපු අමාත්‍ය දුමින්ද සිල්වා ඇතුළු පිරිස විසින් ඝාතනය කරන ලද හිටපු ජනාධිපති මහින්ද රාජපක්ෂගේ වෘත්තීය සමිති අධ්‍යක්ෂ භාරත ලක්ෂ්මන් ප්‍රේමචන්ද්‍රගේ සහෝදරිය වන ස්වර්ණා ගුණරත්න ඇමරිකාවේ කොන්සල් ජෙනරාල්වරිය ලෙස කටයුතු කරයි.
අහිංසා වික්‍රමතුංග හා රෝයි මනෝජ් සමදානම් විසින් තමන්ට එරෙහි වන්දි නඩුවක් පවරා ඇති බව පිළිගත් ගෝඨාභය රාජපක්ෂ එහෙත් එම නඩු සඳහා හරියාකාරව සීතාසි බාර දී නොමැති බවට තමන් විශ්වාසය පළ කරන බව ද සඳහන් කළේය.
කෙසේ වෙතත් ඇමරිකාවේ සිටින තම නීතිඥයන් එම නඩු නිශ්ප්‍රභා කර ගැනීමට උත්සාහ දරන බව ද හෙතෙම කියා සිටියේය.
තමන් මීට පෙර දස වතාවක් පමණ ඇමරිකාවට ගොස් තිබුණද මෙවැනි දෙයක් සිදු නොවුන බව කී හිටපු ආරක්ෂක ලේකම්වරයා මෙය ලංකාවේ ඉදිරි ජනාධිපතිවරණය ඉලක්ක කර ගනිමින් තමන් හට මෙසේ නඩු පවරා ඇති බවට අවධාරණය කරන ලදී.
සිය පියා නමින් කටුගෙයක් ඉදිකිරීමේදී රුපියල් තිස්තුන් කෝටියකට අධික රජයේ මුදලක් වංචා කළ බවට නැගෙන චෝදනාවක් විභාග කරන ත්‍රිපුද්ගල විශේෂ මහාධිකරණය හිටපු ආරක්ෂක ලේකම්ට විදේශ ගතවීමට ලද ඇමරිකාවට ගොස් පැමිණි හිටපු ආරක්ෂ ලේකම්වරයා පිළිගැනීමට ඒකාබද්ධ විපක්ෂ නියෝජනය කරන මැති ඇමැතිවරුන් ඇතුළු පිරිසක් පැමිණ සිටිනු දැකගන්නට ලැබුණි.
හිටපු ආරක්ෂක ලේකම්වරයාට එරෙහිව පවරා ඇති නඩුවලින් නගා ඇති චෝදනා වලට සති තුනක් වග උත්තර ගොණු නොකළ හොත් චුදිතයා නොමැතිව නඩුව විභාගයට ගැනීමට එක්සත් ජනපද අධිකරණය කටයතු කරනු ඇත.
Facebook Comments
