ඉදිරි ජනාධිපතිවරණයට විදෙස් රට වලින් බලපෑම් ඇති බවට පොහොට්ටු පක්ෂයෙන් කරන චෝදනා එම පක්ෂයේම ප්‍රබලයෙකු විසින් ප්‍රතික්ෂේප කර තිබේ.
කිසිඳු විදේශ රටකින් ජනාධිපතිවරණයට බලපෑම් එල්ල නොවනු ඇතැයි තමා විශ්වාස කරන බව ශ්‍රී ලංකා පොදුජන පෙරමුණේ ජාතික සංවිධායක හිටපු අමාත්‍ය බැසිල් රාජපක්ෂ ජාත්‍යන්තර මාධ්‍යට පවසා ඇත.
මෙවර පමණක් නොව 2015 දී තම ආණ්ඩුව වෙනස් කිරීමට ඉන්දියාව හෝ වෙනත් රටක් විපක්ෂයට සහාය පළ කළ බවට පෞද්ගලිකව තමා සතුව සාක්ෂි නොමැති බව හෙතෙම ද හින්දු පුවත් පතට සම්මුඛ සාකච්ඡාවක් දෙමින් කියා තිබේ.
කෙසේ වෙතත් මෙවර මැතිවරණයට මෙන්ම 2015 දී ආණ්ඩු වෙනස් කිරීමට එක්සත් ජාතික පක්ෂය හට ඇමරිකාව සහාය දුන් බවට විවිධ අවස්ථාවන්හි පොහොට්ටු පක්ෂයේ විමල් වීරවංශ මන්ත්‍රීවරයා චෝදනා කර තිබුනි.
2015 දී ආණ්ඩු වෙනසක් කිරීමට කිසිවකුට හෝ අවශ්‍යතාවක් මතු වූයේ නම් එම අඩුපාඩු මොනවාදැයි මේ වන විට මැනවින් අවබෝධ කරගෙන ඇති බවද ඔහු ප්‍රකාශ කර ඇත.
ශ්‍රී ලංකාවේ අංක එකේ මිතුරා සහ අසල්වැසියා ලෙස,ආරක්ෂක සහ දේශපාලනික කාරණාවලදී ඉන්දියාව සමග සහයෝගයෙන් ක්‍රියා කිරීම අත්‍යවශ්‍ය බවත් එලෙසම ආර්ථිකමය කටයුතු වලදී චීනය සමග සහයෝගයෙන් ක්‍රියා කිරීමද අවශ්‍ය බව ඇමරිකාවේද පුරවැසි භාවය හිමි බැසිල් රාජපක්ෂ ප්‍රකාශ කර සිටී.
ඉදිරි ජනාධිපතිවරණය ජයග්‍රහණය කිරීමට දෙමළ ජනතාවගේ ඡන්දය තීරණාත්මක සාධකයක් බව අවධාරණය කර ඇති බැසිල් රාජපක්ෂ බලය විමධ්‍යගතකිරීම සඳහා තම පක්ෂය සිය උපරිම කැපකිරීමෙන් ක්‍රියා කරන බවයි වැඩි දුරටත් පෙන්වා දී ඇත්තේ.
රටේ ජාතික ප්‍රශ්නයට විසඳුම් දීම සඳහා නව ව්‍යවස්ථාවක් අවශ්‍ය නම් එය ජනතාවට තීරණය කිරීමට ඉඩ දිය යුතු බව ද හිටපු අමාත්‍ය බැසිල් රාජපක්ෂ ද හින්දු පුවත් පතට කියා ඇත.
Facebook Comments
