ත්‍රස්ත මර්දන නීතිය සම්බන්ධයෙන් රජයේ ප්‍රකාශිත ප්‍රතිපත්තිය සහ පොලිසිය එය යොදාගන්නා ආකාරය අතර පරස්පරයක් වේද යන්න සම්බන්ධයෙන් ගැටළු මතුවී තිබේ.
ප්‍රවේසමින් පරිහරණය කරන බවට ආණ්ඩුව ප්‍රකාශයට පත් කර ඇති ත්‍රස්තවාදය වැළක්වීමේ පනත යටතේ මිනිස් ඝාතනයක් සම්බන්ධයෙන් අත්අඩංගුවට ගත් සැකකරුවකු රඳවා තබා ගැනීම ගැටළුවක් නොමැති බව වැඩ බලන පොලිස්පතිවරයාගේ මතයයි.
“දැනට පවතින නීතියක් තුලින් ක්‍රියාත්මක කිරීම විමර්ශනීය කටයුත්තක් මිසක් ඒක අපි බැහැර කරලා නැ. දැනට පවතින ත්‍රස්තවාදය වැලැක්වීමේ පනත තවමත් ක්‍රියාත්මකයි. ඒ ක්‍රියාත්මක වීම තවමත්, ඒ පනත අවලංගු වෙලා නැ. ඉතින් පවතින නීතියක් තුලින් අපරාධ විමර්ශනයක් කිරීම මං හිතන්නේ පුද්ගලිකව ඔබතුමාට ගැටළුවක් ඇති. ඒ සම්බන්ධයෙන් අවශ්‍ය ක්‍රියාමාර්ග ගැනීම මං හිතන්නේ පවතින නීතියත් එක්ක ගැටළුවක් නැහැ.”
වැඩ බලන පොලිස්පති ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය පෙබරවාරි 22 වැනි සෙනසුරාදා ඒ බව කියා සිටියේ ගණේමුල්ල සංජීව නමින් ප්‍රකට සංජීව කුමාර සමරරත්න ඝාතනය සම්බන්ධයෙන් අත්අඩංගුවට ගත් සැකකරු ත්‍රස්තවාදය වැළැක්විමේ පනත යටතේ රඳවා තබා ගැනීම නීතිය අවභාවිතයක් බව සඳහන් කරමින් මාධ්‍යවේදියෙක් නැගු ප්‍රශ්න කිරීමට පිළිතුරු වශයෙනි.
ජනාධිපති අනුර කුමාර දිසානායක පවසන්නේ පාතාල කණ්ඩායම් අතර ගැටුම් නිර්මාණය වුවත්, එය පොදු මහජනතාවගේ ආරක්ෂාවට ගැටලුවක් වී නොමැති බවයි.
ත්‍රස්තවාදය වැලැක්වීමේ පනත අහෝසි කරන බවට පොරොන්දු දී බලයට පත් ආණ්ඩුව එම පනත සංශෝධනය කරමින් සකස් කොට ඇති අවසාන පනත් කෙටුම්පත ‘තවදුරටත් අධ්‍යයනය කර වැඩි දියුණු කිරීමට’ ජනාධිපති නීතිඥ රියන්සි අර්සකුලරත්න ප්‍රමුඛ කමිටුවක් පත් කිරීමට පෙබරවාරි 19 වැනිදා අමාත්‍ය මණ්ඩල රැස්වීමෙි දි තින්දු කර තිබුනි.
පාර්ලිමේන්තුවේ සභානායක, අමාත්‍ය බිමල් රත්නායක 2025 ජනවාරි 21 දා පවසා තිබුනේ ත්‍රස්තවාදය වැලැක්විමේ පනත ඉතාම පරිස්සමෙන් පාවිච්චි කරන්නට සිදු වන බවයි.
“ඒ වගේම ත්‍රස්ත විරෝධී පනත ගැන කියන්න තියන එකම දේ තමයි ඒක අපේ අභිලාෂයවත්, ප්‍රතිපත්තියවත් නෙමෙයි, නමුත් අළුත් පනත සකස් කරගන්නකං රටේ තියන නීති අපිට ඉතාම පරිස්සමෙන් පාවිච්චි කරන්න වෙනවා. මොකද අපි ආණ්ඩුවක් කරන්න ඕන පනත් සම්මත වෙනකං” යැයි ඔහු පවසා තිබුනි.
නව රජය බලයට පත් වීමෙන් පසු ත්‍රස්තවාදය වැළැක්විමේ පනත යොදා ගනිමින් උතුරු නැගෙනහිර මාධ්‍යවේදීන් ඇතුළු දෙමළ ක්‍රියාධරයන් ත්‍රස්ත මර්දන සහ විමර්ශන කොට්ඨාසයට කැදවීම් රැසක්ම වාර්තා වී ඇති බව එම දෙපළාතේ වාර්තාකරුවෝ පවසති.
Facebook Comments
