පොලිසිය ‘ජනතාව වෙනුවෙන් පෙනී ඉන්නේ නෑ’

නීතිය හා සාමය ආරක්ෂා කිරීම බාර පොලිසිය ජනතාව වෙනුවෙන් පෙනී නොසිටීම නිසා ශ්‍රී ලංකා රජය කෙරෙහි ඇති ජනතා විශ්වාසය දිනෙන් දින නැති වී යන බව හිටපු දෙමළ ජනතා නායකයකු සඳහන් කරයි.

“නීතිය හා සාමය ආරක්ෂා කළ යුතු පොලිසිය සහ ත්‍රිවිධ හමුදාව මෙම නීති විරෝධි ඉදිකිරීම නිර්මාණය කරන්නත්, ඒක ආරක්ෂා කරන්නත් උදව් කරන කොට ජනතාව පාරේ ඉදලා සටන් කරනවා. පොලිසිය ජනතාව වෙනුවෙන් නෙමෙයි ඉන්නේ. ඔවුන්ගේ ක්‍රියාකාරකම් නිසා ශ්‍රී ලංකා රජය කෙරෙහි ඇති විශ්වාසය දිනෙන් දින නැති වී යනවා.”

දෙමළ ජාතික ජනතා පෙරමුණේ ප්‍රධාන ලේකම්, සෙල්වරාසා ගජේන්ද්‍රන් හිටපු මන්ත්‍රීවරයා 2025 පෙබරවාරි 20 වැනිදා එම චෝදනාව එල්ල කළේ, යුද හමුදාව විසින් කන්කසන්තුරේ වලිකාමම් උතුරේ තයියිට්ටි ප්‍රදේශයේ ඉදිකර තිබෙන තිස්ස විහාරස්ථානය ඉදිරිපිටදී නවම් පොහොය දිනයේ දියත් කළ උද්ඝෝෂණයක් සම්බන්ධයෙන් පොලිසිය විසින් කර තිබු කැදවීමකට අදාලව ප්‍රකාශ ලබා දීමෙන් පසු මාධ්‍යවේදීන් වෙත අදහස් දක්වමිනි.

හිටපු මන්ත්‍රීවරයා එහිදී තව දුරටත් චෝදනා කළේ අධිකරණය සම්බන්ධයෙන් ජනතා විශ්වාසය නැතිවීමට හේතුව පොලිසිය වන අතර ඔවුන් පක්ෂග්‍රාහී, ජාතිවාදී හා දෙමළ විරෝධී ආකාරයෙන් කටයුතු කරන බවටයි.

“අධිකරණය ගැන විශ්වාසය නැතිවෙන්න හේතුව පොලිසිය. අපරාධ උසාවියට වාර්තා කළ යුතු පොලිසිය පක්ෂග්‍රාහී, ජාතිවාදී, දෙමළ විරෝධී හා සිංහල හිතවාදී නිසා අපට සාධාරණයක් ඉටු කළ නොහැකි තත්වයක් තිබෙනවා.”

කන්කසන්තුරේ වලිකාමම් උතුරේ තයියිට්ටි ප්‍රදේශයේ හමුදා අනුග්‍රහයෙන් ඉදිකර තිබෙන තිස්ස විහාරස්ථානය ඉදිරිපිටදී නවම් පොහොය දිනයේ දියත් කළ උද්ඝෝෂණය සම්බන්ධයෙන් ප්‍රකාශ ලබා ගැනීම සදහා දෙමළ ජාතික ජනතා පෙරමුණේ ප්‍රධාන ලේකම්, සෙල්වරාසා ගජේන්ද්‍රන් එම පක්ෂයේ කාන්තා අංශයේ නායිකා වාසුකී සුදාහරන් හා යාපනය නල්ලුර් ශිව ගුරු ආශ්‍රමයේ තවතිරු වේලන් ස්වාමි පෙබරවාරි 20 වැනිදා පලාලි පොලිස්ථානය වෙත කැදවා තිබුනි.

එදින ඔවුන්ට පොලීසිය දැනුම් දී ඇත්තේ තිස්ස විහාරස්ථානයේ නායක හිමියන් විසින් පොලිස්ථානයට කළ පැමිණිල්ලක් අනුව සිදු කරනු ලබන විමර්ශනයකට අදාලව ප්‍රකාශ ලබා ගැනීම සදහා මෙම කැදවීම සිදු කළ බවයි.

නවම් පොහොය දිනයේ තිස්ස විහාරය ඉදිරිපිටදී දියත් කළ විරෝධතාවය වාර්තා කළ තම්බිතුරෙයි ප්‍රදීපන් සහ කන්දසාමි පරදන් යන ප්‍රාදේශිය මාධ්‍යවේදීන් දෙදෙනාද ප්‍රකාශ ලබා ගැනීම සදහා පෙබරවාරි 21 වැනි සිකුරාදා පොලිසිය වෙත කැදවා තිබු බවයි පළාත් බද වාර්තාකරුවන් පවසන්නේ.

පලාලි පොලිස් ස්ථානයේ නිලධාරින් පෙබරවාරි 20 වැනිදා දෙමළ ජාතික ජනතා පෙරමුණේ ප්‍රධාන ලේකම්, සෙල්වරාසා ගජේන්ද්‍රන් හිටපු මන්ත්‍රීවරයාගෙන් ප්‍රශ්න කර ඇත්තේ නවම් පොහොය දිනයේ තිස්ස විහාරය ඉදිරිපිට දියත් කළ විරෝධයට ඔහු සහභාගි වුයේ කුමන පදනමකින්ද යන්නයි.

සිය භුමිය අනවසරයෙන් අත් පත් කරගනිමින් ඉදිකළ පන්සල 2023 වසරේ විවෘත කිරීමට යන බවට දන්වමින් ඉඩම් හිමියන් විසින් සිය භුමිය නිදහස් කර ගැනීම සදහා සහයෝගය ඉල්ලා සිටි බව පොලිසියට දැනුම් දී ඇති හිටපු මන්ත්‍රීවරයා එහිදි තව දුරටත් පවසා ඇත්තේ එදින සිට සෑම පසලොස්වක පොහෝය දිනත්, එයට පෙර දිනත් අධිකරණ නියෝගවලට අවනත වෙමින් ඉඩම් නිදහස් කරන ලෙස බල කරමින් විහාරස්ථානය සමීපයේ දී විරෝධතා දියත් කළ බවයි.

“කන්කසන්තුරේ ඓතිහාසික තිස්ස විහාරස්ථානයේ ප්‍රතිසංස්කරණය කරන ලද චෛත්‍යයෙහි කොත තැන්පත් කිරීමේ පුණ්‍ය උත්සවය” 2023 අප්‍රේල් 27 වැනි දින සිදු කළ බව අප්‍රේල් 29 වැනිදා ශ්‍රී ලංකා යුද හමුදාව සිය නිල පුවත් වෙබ් අඩවියේ සදහන් කර තිබුනි.

“ක්‍රිස්තු වර්ෂ 3 වන සියවස දක්වා දිව යන ඉතිහාසයකයට උරුමකම් කියන මෙම විහාරස්ථානය දේවානම්පියතිස්ස රජු විසින් කරවන ලද බව ඉතිහාසයේ සඳහන් වෙතැ,” යි යුද හමුදාව පවසයි.

සිය ඉඩම් නිදහස් කරන ලෙස ඉල්ලමින් සෑම මසකම පුර පොහොය දිනයේ විහාරස්ථානය සමීපයේ විරෝධතාවයේ නිරත දෙමළ ජනයා චෝදනා කරන්නේ දෙමළ පවුල් 14 ට අයත් පරප්පු 100 කට (අක්කර 6.2) ආසන්න භුමියක් බලහත්කාරයෙන් අත්පත්කර ගනිමින් යුද හමුදාව තිස්ස විහාරස්ථානය ඉදි කර ඇති බවයි.

විහාරස්ථානය ඉදිකිරීම වෙනුවෙන් තෙලිප්පලෙයි ප්‍රාදේශිය ලේකම්වරයාගේ අනුමැතියද හිමිව නොමැති බවටද උද්ඝෝෂණයේ යෙදී සිටින දෙමළ ජනයා කරුණු දක්වති.