දෙමළ බහුතරයක් ජීවත්වන යාපනයේ පිහිටි පොලිස් ස්ථානයේ පැමිණිල්ල ලියා ගැනීමට දෙමළ පොලිස් නිලධාරීන් නැති වීම නිසා බ්‍ර්තාන්‍ය වාසි දෙමළ කාන්තාවක් සහ දෙමළ මාධ්‍යවේදියෙක් මහත් අපහසුතාවයට පත්ව තිබේ.
දුම්රියක් තුළදී දෙමළ කාන්තාවකට හිරිහැර කොට මාධ්‍යවේදියාට ජාතිවාදී ලෙස පරුෂ වචනයෙන් බැන වැදුනු ප්‍රවේශ පත්‍ර පරීක්ෂකයකුට විරුද්ධව පැමිණිලි කිරීමට යාපනය පොලිසියට ගිය අවස්ථාවේදී මෙයට මුහුණ දුන් බවයි වාලම්පුරි මාධ්‍යවේදී උදයරාසා ශාලින් පවසන්නේ.
කොළඹ සිට කන්කසන්තුරේ බලා ධාවනය වූ දුම්රියේ ගමන් ගනිද්දී අතවරයට ලක්වූ බවට චෝදනා කරන කාන්තාව සහ ඇය වෙනුවෙන් මැදිහත්වූ එම මැදිරියේම සිටි වාලම්පුරි මාධ්‍යවේදීයාට ප්‍රවේශ පත්‍ර පරීක්ෂාකරුවා බැන වදිනු දැක්වෙන වීඩියෝවක් සිලෝන් නිවුස් වෙත ලැබී ඇත.
කොළඹ සිට යාපනය බලා ගමන් ගන්නා දුම්රියට වව්නියාවෙන් ගොඩවූ කාන්තාවට ප්‍රවේශ පත්‍ර පරීක්ෂක ජයන්ත පෙරේරා හිරිහැර කරන අවස්ථාවේ මැදිහත් වූ තමන්ට පහර දීමට තැත් කරමින්, ජාතිය හෙලා දකින පරුෂ වචනයෙන් බැන වැදුනු බව උදයරාසා ශාලින් කියා සිටියේය.
පැය 4 පොලිසියේ
තම මාධ්‍ය හැඳුනුම්පත පෙන්වා තත්ත්වය සංසිඳුවන්න උත්සාහ කළ අවස්ථාවේදී ‘මීඩියා ලොකුද’ කියා තමන් හට අසභ්‍ය වචනයෙන් බැන වැඳුන බවයි ඔහු පවසන්නේ.
සිදුවූ අඩන්තේට්ටම පිළිබඳ පැමිණිල්ල භාර දීම සඳහා පැය හතකට ආසන්න කාලයක් ගත කරන්නට සිදුවූ බව මාධ්‍යවේදී උදයරාසා ශාලින් 08 අඟහරුවාදා මාධ්‍යවේදින් හමුවේ ප්‍රකාශ කළේය.
“අපි මුලින්ම 11 ට ගියා. නුමුත් එතන දෙමළ කතා කරන්න පුළුවන් නිලධාරියෙක් නැති නිසා පැය 4 ක් බලාගෙන ඉන්න උනා,” යි මාධ්‍යවේදී ශාලින් කියා සිටියේය.
පැමිණිල්ල කරන්නට පොලීසි ගිය අවස්ථාවේදීත් ප්‍රවේශ පත්‍ර පරීක්ෂකයා උදයරාසා ශාලින්ට පහර දීමට කඩා පැන තිබේ.
චෝදනා ප්‍රතික්ෂේප කරන චූදිත ජයනාත් පෙරේරා යාපනය මහේස්ත්‍රාත් අධිකරණය විසින් 9 බදාදා රුපියල් ලක්ෂයක ශරීර ඇපයක් පිට මුදා හරින ලදී.
Facebook Comments
