දස අවුරුද්දකට ඉහතදී ‘ද නේෂන්’ පුවත්පතේ හිටපු නියෝජ්‍ය කර්තෘ පැහැරගෙන ගොස් පහර දුන් කණ්ඩායම් පිළිබඳව හිටපු ජනපති මහින්ද රාජපක්ෂ හට අවබෝධයක් තිබු බවට රාජ්‍ය අමාත්‍යවරයෙකු චෝදනා කරයි.
මාධ්‍යවේදීන් ජිවිතක්ෂයට පත්වීමට හා රට හැර යාමට සිදු වුයේ රාජපක්ෂ සමයේ තිබු බිහිසුණ කම නිසාවෙන් බව පවසන විදුලිබල හා පුනර්ජනනීය බලශක්ති රාජ්‍ය අමාත්‍ය අජිත් පී. පෙරේරා එදාට වඩා අද මාධ්‍යවේදීන්ට හොඳ බවයි පෙන්වා දෙන්නේ.
“කීත් නොයාර් පැහැරගෙන ගිහිල්ලා මරන්න උත්සාහ කරපු කණ්ඩායම පිළිබඳව පාලනයක් දැනුමක් මහින්ද රාජපක්ෂ මැතිතුමාට තිබ්බා. හැබැයි රාජපක්ෂ පාලනයේ තිබුණ බිහිසුණ කම මාධ්‍යවේදීයෙකුට ජීවිතය අහිමි වෙන්නට රට දාල යන්නට මුණ ඇඟපත විකෘති වෙන්න ගුටි කන්න සිද්ධ වුනේ රාජපක්ෂ පාලනය නිසා. මාධ්‍යකරුවන්ට එදාට වඩා අද හොඳයි. මේ අවුරුදු තුනට කිසිම මාධ්‍යවේදියෙක් ගුටි කෑවෙත් නැහැ මැරුණෙ නැහැ.” අමාත්‍යවරයා 16 බ්‍රහස්පතින්දා සිරිකොත පැවති මාධ්‍ය හමුවක දී සඳහන් කළේය.
පසුගිය රජය සමයේ මාධ්‍යවේදීන් පිළිබද තිබූ ආකල්පය විපක්ෂයේ සිටියදී පවා වෙනස් වී නොමැති බව පවසන රාජ්‍ය ඇමැතිවරයා ඒකාබද්ධ විපක්ෂය පැවැත්වූ මාධ්‍ය හමුවකට පැමිණ සිටි මාධ්‍යවේදියකුට මාධ්‍ය හමුවෙන් ඉවත්ව යන ලෙස කල බලපෑම මගින් එය වඩාත් තහවුරු වන බව ද කියා සිටියේය.
හිටපු ජනධිපතිවරු , වත්මන් ජනපති සහ අනාගත වෙන්න ජනාධිපතිවරු පවා රටේ නීතියටත් යටත් බැවින් ආරක්ෂ අංශයකින් ප්‍රකාශයක් ලබා ගැනීමට අවශ්‍ය යැයි දැන්වු විට එය ලබා දිය යුතු බව විදුලිබල හා පුනර්ජනනීය බලශක්ති රාජ්‍ය අමාත්‍ය නිතිඥ අජිත් පී. පෙරේරා වැඩි දුරටත් අවධාරණය කළේය.
කීත් නොයාර් 2008 මැයි මාසයේ පැහැරගෙන ගොස් දොම්පේ ප්‍රදේශයට ගෙනගොස් පහර දී තිබුණු අතර ඔහු සොයාගැනීමට සමීපතමයන් විසින් හිටපු ආරක්ෂක ලේකම් ගෝඨාභය රාජපක්ෂ ඇමතීමෙන් පසු ජ්‍යෙෂ්ඨ මාධ්‍යවේදියා නිදහස් කර තිබුනි.
කීත් නොයාර් පැහැරගෙන ගොස් පහරදී ඇත්තේ රජයේ ආරක්ෂක අංශ සම්බන්ධයෙන් ඔහුට තොරතුරු ලබා දෙන්නේ කව්දැයි හෙළි කර ගැනීමටය.
කතුවරයාට පහර දීමේ සිද්ධිය සම්බන්ධයෙන් හිටපු ජනපති මහින්ද රාජපක්ෂගෙන් 17 සිකුරාදා රහස් පොලිසිය ප්‍රකාශයක් ලබා ගැනීමට නියමිතව ඇත.
Facebook Comments
