වත්මන් රජය උතුරේ ජනතාවට නිදහස ලබා දීමට කැප වී කටයුතු කරන බව පවසන සෞඛ්‍ය,පෝෂණ හා දේශීය වෛද්‍ය අමාත්‍යවරයා එම ජනතාව වර්ජන, විරෝධතා වල නිරතවීම ගැන සතුට පළ කර තිබේ.
උතුරේ පවතින විරෝධතා නිදහස පෙන්නුම් කරන අවස්ථාවක් බව දොස්තර රාජිත සේනාරත්න ඇමැතිවරයා 16 බ්‍රහස්පතින්දා යාපනය ශික්ෂණ රෝහලේ පැවති උත්සවයක දී කියා සිටියේය.
“වත්මන් රජය උතුරේ ජනතාවට සියලු නිදහස ලබාදීමට කටයුතු කරනවා. මම අද සතුටු වෙනවා උතුරේ ජනතාව නිදහසේ වර්ජන, විරෝධතා වල නිරතවීම ගැන. දකුණේ ජනතාව වගේ ඔවුන්ටත් ඒ සදහා අයිතියක් තිබෙනවා. තවත් අතකින් ඒ තමයි ලැබී ඇති නිදහස පෙන්නුම් කරන අවස්ථාවක් වන්නේ.”
යුද්ධය නිසාවෙන් උතුරේ ජනයාට නිදහස අහිමි වු බව පෙන්වා දුන් ඇමැතිවරයා පවතින ගැටලු වලට සාකච්ඡා මාර්ගයෙන් විසඳුම් සොයා ගත හැකි බවට අවධාරණය කළේය.
තම ජිවිතය තුල සිංහල, දෙමළ, මුස්ලිම් සියලු ජාතීන්ගේ අයීතින් වෙනුවෙන් එක ලෙස හඬ නගා ඇති බව ද සෞඛ්‍ය,පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න වැඩි දුරටත් පැවසීය.
මෙහිදී රුපියල් මිලියන 530 ක ආධාර යටතේ යාපනය ශික්ෂණ රෝහල් භුමියේ ඉදිකරන පුනරුත්ථාපන රෝහල සදහා මුල්ගල තැබීම සහ සෞඛ්‍ය අමාත්‍යාංශයේ රුපියල් මිලියන 600 ක ප්‍රතිපාදන යටතේ ඉදිකරන ලද හෙද නිල නිවාස සංකීර්ණය විවෘත කිරීම සෞඛ්‍ය අමාත්‍යවරයා අතින් සිදු කෙරුණි.
මෙම අවස්ථාවට උතුරු පළාත් ප්‍රධාන අමාත්‍ය සී.වී විග්නේෂ්වරන්, සෞඛ්‍ය නියෝජ්‍ය අමාත්‍ය ෆයිසාල් කාසීම්, පාර්ලිමේන්තු මන්ත්‍රීවරුන් වන විජයකලා මහේෂ්වරන්, මාවෙයිසේනාධිරාජා, එස්.සර්වණභවන්, උතුරු පළාත් සභාවේ මැති ඇමැතිවරු, සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා ඇතුලු නියෝජ්‍ය අධ්‍යක්ෂ ජනරාල්වරුන් සහ අධ්‍යක්ෂවරුන්, රෝහල් අධ්‍යක්ෂ ටී. සත්‍යමූර්ති, රාජ්‍ය ඖෂධ නීතිගත සංස්ථාවේ සභාපති නීතිඥ සරත් ලියනගේ, කළමණාකාර අධ්‍යක්ෂ ආචාර්ය එච්.එම්.එම් රූමි, සාමාන්‍යාධිකාරි දිනුෂ දසනායක ඇතුලු විශාල පිරිසක් එක්ව සිටියහ.
Facebook Comments
