දරුවන් ඉලක්ක කරගනිමින් අසභ්‍ය අන්තර්ගත ශ්‍රී ලංකාවෙන් අන්තර්ජාලයට මුදාහරින යූටියුබ් නාලිකා නමයක් පිළිබඳව තොරතුරු තාක්ෂණය සම්බන්ධයෙන් මැදිහත්වන ක්රියාධාරීන් පිරිසක් දේශීය හා ජාත්‍යන්තර බලධාරීන්ට පැමිණිලි කර තිබේ.
එම නාලිකාවලට අයත් url යොමු ද සහිතව ශ්‍රී ලංකා පොලිසියට ලිපියක් යොමු කරමින් ශ්‍රී ලංකා තොරතුරු තාක්ෂණ සංගමය ඉල්ලා ඇත්තේ ඒ පිළිබදව අවශ්‍ය නීතිමය ක්‍රියාමාර්ග ගන්නා ලෙසයි.
යූටියුබ් බලධාරීන්ටද ඒ සම්බන්ධයෙන් වාර්තා කර ඇති බව සංගමයේ සභාපති රජීව් යසිරු කුරුවිටගේ මැතිව් පවසයි.
කාන්තා හා ළමා කටයුතු අමාත්‍යාංශය, ශ්‍රී ලංකා පොලීසිය හා අපරාධ පරීක්ෂණ දෙපාර්තුමේන්තුව වෙත පිටපත් යොමු කරමින් ශ්‍රී ලංකා තොරතුරු තාක්ෂණ සංගමය යොමු කර තිබෙන ලිපියක සදහන්ව ඇත්තේ මේ දිනවල දරුවන් බොහෝ ප්‍රමාණයක් නිවෙස්වල සිටින අතර ඒ හේතුවෙන් බොහොමයක් දරුවන් ඉගෙනුම් ඉගැන්වීම් ක්‍රියාවලීන් සහ වෙනත් පරිබාහිර කටයුතු සිදුකරගැනීමට වැඩි වශයෙන් අන්තර්ජාලය භාවිතා කිරීමට යොමුව තිබෙන බවයි.
එය අවස්ථාවක් කරගනිමින් තම ආදායම ඉහල නංවා ගැනීමට මෙම යූටියුබ් චැනල් මෙහෙය වන්නන් යුහුසුළුව කටයුතු කරන බවත් අසභ්‍ය සිංහල යූටියුබ් වීඩියෝපට බොහෝමයක්ම තොරතුරු තාක්ෂණය, අන්තර්ජාල මෙවලම් භාවිතය සහ ඉංග්‍රීසි භාෂාව ඉගෙනීම පහසුකරන පාඨමාලා ලෙසින් හඳුන්වා තිබෙන නිසා කුඩා ළමුන් අසභ්‍ය හා ලිංගික කුතුහලය මතුකරන වීඩියෝපට සදහා ඉතා පහසුවෙන්ම ග්‍රහණය වන බවත් ශ්‍රී ලංකා තොරතුරු තාක්ෂණ සංගමයට පෙනීගොස් ඇති බව රජීව් යසිරු කුරුවිටගේ මැතිව් පවසයි.
කාන්තා හා ළමා කටයුතු අමාත්‍යාංශය ප්‍රමුඛ පොලීසිය වෙත ශ්‍රී ලංකා තොරතුරු තාක්ෂණ සංගමය යොමු කළ ලිපිය මගින් වැඩි දුරටත් පෙන්වා දී ඇත්තේ කුඩා දරුවන් මේ දිනවල වැඩි වශයෙන් අන්තර්ජාලය සහ යූටියුබ් අඩවිය තුල යොදාගනු ලබන keyword අසභ්‍ය අන්තර්ගතයන් ප්‍රවර්ධනය සදහා යොදාගෙන ඇති බවයි.
දරුවන්ට නුසුදුසු අසභ්‍ය වීඩියෝපට බොහෝමයක් මේ දිනවල “යූටියුබ් trending” පවා පැමිණ තිබෙන බව ශ්‍රී ලංකා තොරතුරු තාක්ෂණ සංගමයේ නිරීක්ෂණය වී තිබේ.
මේ සම්බන්ධයෙන් කඩිනමින් අවධානය යොමු කර අවශ්‍ය නීතිමය ක්‍රියාමාර්ග ලබාගැනීමට කටයුතු කරන ලෙස ශ්‍රී ලංකා තොරතුරු තාක්ෂණ සංගමය කාන්තා හා ළමා කටයුතු අමාත්‍යාංශය, ශ්‍රී ලංකා පොලීසිය හා අපරාධ පරීක්ෂණ දෙපාර්තුමේන්තුවෙන් වැඩි දුරටත් ඉල්ලා තිබේ.
Facebook Comments
