දෙසීය පනහකට අධික ජීවිත සංඛ්‍යාවක් අහිමි කරමින් සිදුකළ පාස්කු ඉරුදින ප්‍රහාර මාලාවේ මහ මොලකරු සිටින්නේ එම ප්‍රහාරයේ දේශපාලන වාසි ලබාගත් අය සමගයැයි දිවයිනේ ජ්‍යෙෂ්ඨතම මානව හිමිකම් ක්‍රියාධරයෙක් චෝදනා කරයි.
“මේකේ අපි හොදටම හොයලා බලන්න ඕනේ මේ බෝම්බ ප්‍රහාරයේ දේශපාලන වාසිය කාටද? අන්න ඒක හොයා ගත්තොත් අපි කියනවා මහ මොළකරු ඉන්නේ එතන. කුමන්ත්‍රණය තියෙන්නේ එතන.”
අතුරුදහන්වුවන්ගේ පවුල් එකතුවේ සභාපති ජ්‍යෙෂ්ඨ මානව හිමිකම් ක්‍රියාධර බ්‍රිටෝ ප්‍රනාන්දු ඒ බව සඳහන් කළේ පාස්කු ප්‍රහාරයට මාස 27 ක් සපිරෙන ජුලි 21 බදාදා මීගමුවේ පැවැති විරෝධතාවයක් අතරතුරදී මාධ්‍ය වෙත අදහස් දක්වමිනි.
පාස්කු ඉරුදින ප්‍රහාරයේ මහ මොලකරුවන් රටට හෙළි දරව් කරන ලෙස බලකරමින් කිතුනු පූජකතුමන්, පැවිදි සොහොයුරියන්, සිවිල් සංවිධාන සාමාජිකයන් හා ක්‍රියාකාරීන්ගේ ද ප්‍රජාවගේ ද සහභාගිත්වයෙන් මීගමුව බාල්දි හන්දියේදී පැවැති නිහඩ විරෝධතාවය සංවිධානය කර තිබුනේ මීගමුව පුරවැසි එකමුතුව හා මරදාන සමාජය හා සාමයික කේන්ද්‍රය විසිනි.
ඇත්ත කාරණා යටපත් කර කරන බොරු පරීක්ෂණ එපා! සැබෑ පරීක්ෂණ තුළින් ඇත්තම මහ මොලකරු සොයන්න! අසම්පුර්ණ පරීක්ෂණ කටයුතු නැවත විධිමත්ව සම්පුර්ණ කරන්න! පරීක්ෂණවල විනිවිදභාවය පෙන්වන්න! අලුතින් පාර්ලිමේන්තුවේ මතු කළ කරුණු මගහැර නොයන්න! පාස්කු ප්‍රහාරයට යුක්තිය ඉල්ලා අදහස් දක්වන අය මර්දනය නොකරනු! පාස්කු ප්‍රහාරය දේශපාලන වාසි ගැනීමට භාවිතා කිරීම නවතනු!, පරස්පර ව්‍යාජ අදහස් දක්වමින් පරීක්ෂණ දියාරු කිරීම නවතනු! ඉල්ලීම් මුලික කරගනිමින් විරෝධතාවය දියත් කර තිබුනි.
කාදිනල් ට ප්‍රශ්න
පාස්කු ප්‍රහාරයට වග කිව යුතු ඇතැම් පොලිස් නිලධාරීන්ට එරෙහිව නඩු පවරමින් ආණ්ඩුව පැහැදිලි පියවර කිහිපයක් ගෙන ඇතැයි පැවසු බ්‍රිටෝ ප්‍රනාන්දු තව දුරටත් අවධාරණය කළේ හිටපු ජනාධිපතිවරයාට සහ අගමැතිවරයාට විරුද්ධව කිසිදු පියවරක් ගෙන නොමැති බවයි.
ප්‍රහාරයේ මහ මොලකරුවන් අනාවරණය කර ගැනීම සදහා මාසයක් ඇතුලත ආණ්ඩුවෙන් බලාපොරොත්තු වන පිළිතුර නොලැබුනහොත් කොළඹ අගරදගුරු කාදිනල් මැල්කම් රංජිත් හිමියන් කුමක් කරන්නේදැයි මානව හිමිකම් ක්‍රියාධරයා එහිදී ප්‍රශ්න කළේය.
පාස්කු ප්‍රහාරය සම්බන්ධයෙන් පාර්ලිමේන්තුව තුළ කතාබහට ලක් වු වු සැක සහිත කාරනා මතු කරමින් මසක් තුළ පිලිතුරු බලාපොරොත්තුවෙන් පසුගිය 13 වැනිදා කතොලික සභාව ලෙස මැල්කම් කාදිනල් රංජිත් හිමියන් ජනාධිපතිවරයාට ලිපියක් යොමු කළ බව ඔහු එහිදී සිහිපත් කළේය.
දේවස්ථාන සහ සංචාරක හෝටල් කිහිපයක් ඉලක්ක කර ගනිමින් 2019 අප්‍රේල් මස 21 වන දින එල්ල කළ මරාගෙන මැරෙන බෝම්බ ප්‍රහාර මාලාව නිසා 250 කට අධික සාමාන්‍ය වැසියන් සංඛ්‍යාවක් මියගියහ.
කටුවාපිටිය ශාන්ත සෙබස්තියන් දේවස්ථානය, කොටහේන කොච්චිකඩේ ශාන්ත අන්තෝනි දේවස්ථානය, මඩකලපුව සියොන් දේවස්ථානය, දෙහිවල හෝටලයක සහ කොළඹ කිංග්ස්බරි, ෂැන්ග්‍රිලා, සිනමන් ග්‍රෑන්ඩ් හෝටල්වල දෙවසරකට ඉහතදී බෝම්බ පිපිරීම් සිදු වුයේ පුද්ගලයන් 268ක් ජීවිතක්ෂයට පත්කරමින්, තවත් 500කට අධික ප්‍රමාණයක් තුවාල සිදුකරමිනි.
සැකකරුවන් තිදෙනකුට එරෙහිව ඇමරිකා එක්සත් ජනපදය චෝදනා ගොනු කොට ඇතත්, ත්‍රස්ත නීති යොදාගෙන ශ්‍රී ලංකාවේ සිරකොටගෙන ඉන්නා සිය ගණනකගෙන් කිසිවකුටත් අදත් නඩු පවරා නැත.
Facebook Comments
