මැතිසබේට විශේෂඥ සහාය සොයයි

0

පාර්ලිමේන්තුවේ විශේෂ කාරක සභා සඳහා විශේෂඥයන්ගේ සහ පර්යේෂකයන්ගේ සහාය ලබා ගැනීමට රජයේ අවධානය යොමුව තිබේ.

පාර්ලිමේන්තුව තුළ ක්‍රියාත්මක වන මුදල් කාරක සභාව, පොදු ව්‍යාපාර පිළිබඳ කාරක සභාව (කෝප් කමිටුව), ගිණුම් කාරක සභාව වැනි විශේෂ කාරක සභා සඳහා විශේෂඥයන් සහ පර්යේෂකයන්ගේ සහාය ලබා ගැනීමට පාර්ලිමේන්තුවේ සම්බන්ධීකරණ කාරක සභාවේ දී දැඩි අවධානය යොමු වූ බවයි පාර්ලිමේන්තුවේ මහ ලේකම් ධම්මික දසනායක පවසන්නේ.

කථානායක මහින්ද යාපා අබේවර්ධනගේ ප්‍රධානත්වයෙන් පැවැති මෙම කාරක සභාවට සහභාගි වූ සභානායක සහ විදේශ කටයුතු පිළිබඳ අමාත්‍ය දිනේෂ් ගුණවර්ධන, මුදල් කාරක සභාවේ සභාපති පාර්ලිමේන්තු මන්ත්‍රී අනුර ප්‍රියදර්ශන යාපා සහ වෙළඳ අමාත්‍ය බන්දුල ගුණවර්ධන ඇතුළු කාරක සභා සභාපතිවරු ගණනාවක් මේ පිළිබඳව අදහස් දක්වමින් ආර්ථිකය ඇතුළු විවිධ විෂය ක්ෂේත්‍ර ප්‍රවීණයන්ගේ දායකත්වය ලබා ගැනීමේ අවශ්‍යතාව පෙන්වා දුන් බව පාර්ලිමේන්තුවේ සන්නිවේදන දෙපාර්තමේන්තුව පවසයි.

මුදල් කාරක සභාව වැනි කාරක සභාවන්ට අයවැය වකවානුවේදී දිනපතා රැස්වීමට සිදුවීමත්, එමෙන්ම ආර්ථික කටයුතු හා මූල්‍ය අණ පනත් සංවාදයට ලක් කර ඒවාට අනුමැතිය ලබා දීමටත් සිදුවන නිසා විශේෂඥයන්ගේ මෙන්ම පර්යේෂකයන් ගේ සහය දැඩි ලෙස අවශ්‍ය වන බව අනුර ප්‍රියදර්ශන යාපා පෙන්වා දී තිබේ.

එය අනුමත කළ සභානායක අමාත්‍ය දිනේෂ් ගුණවර්ධන ද සුවිශේෂී කාරක සභා වලට විශේෂඥයන්ගේ සහාය ලබා ගැනීම ඉතා වැදගත් වන බව සඳහන් කර තිබේ.

එමෙන්ම ස්ථාවර නියෝග සංශෝධනය කර පාර්ලිමේන්තු උපදේශක කාරක සභා රැස්වීම් අමාත්‍යංශය තුළ දී පැවැත්වීමට ඇති හැකියාව සොයා බැලිය යුතු බවත් ඒ හරහා වැඩි නිලධාරීන් පිරිසකගේ දායකත්වය ලබාගැනීමට හැකිවන බවත් අමාත්‍යවරයා පෙන්වා දී ඇත.

මෙයට අමතරව මහජන පෙත්සම් කාරක සභාව වැනි මහජනතාව සෘජුව සහභාගීවන කාරක සභා පාර්ලිමේන්තුවෙන් පිටත ස්ථානයක දී පැවැත්වීමට ඇති හැකියාව පිළිබඳ මෙහිදී අවධානය යොමු වූ බවද මහ ලේකම් දසනායක පෙන්වා දෙයි.

ඒ සඳහා පාර්ලිමේන්තුවෙන් පිටත රජයේ ගොඩනැගිල්ලක් යොදා ගැනීම සඳහා ස්ථානයක් සොයා බලන ලෙස කාරක සභාවට සහභාගි වූ මන්ත්‍රීවරුන් උපදෙස් දුන් බව සදහන් කරන මහලේකම් ධම්මික දසනායක තව දුරටත් සඳහන් කර ඇතතේ ඒ හරහා කාරක සභා වලට මහජන සහභාගීත්වය වැඩි කළ හැකි වන බව මන්ත්‍රීවරුන් පෙන්වා දුන් බවයි.

පාර්ලිමේන්තු විවාද පැවැත්වෙන අවස්ථාවලදී මන්ත්‍රීවරුන්ට අදහස් දැක්වීමට අවශ්‍ය වන කරුණු වලින් ඔවුන් වඩාත් දැනුම්වත් කිරීම සඳහා පර්යේෂකයන් ගේ අවශ්‍යතාවය බන්දුල ගුණවර්ධන මෙන්ම පරිසර අමාත්‍ය මහින්ද අමරවීර ද පෙන්වා දී තිබේ.

එම විශේෂඥ ඥානය ලබා ගැනීම සඳහා මුදල් සම්පාදනය කෙරෙන්නේ කෙසේද යන්න පාර්ලිමේන්තු සන්නිවේදන දෙපාර්තමේන්තුව හෙළි කර නැත.

කථානායකවරයාගේ ප්‍රධානත්වයෙන් සම්බන්ධීකරණ කාරක සභාව සෑම මාස 2කට වරක් රැස්වන බව පාර්ලිමේන්තුවේ සන්නිවේදන දෙපාර්තමේන්තුව පවසයි.

කෝප් කමිටු රැස්වීම් සහ ගිණුම් කාරක සභා රැස්වීම් පටිගත කර, ඒවා විකාශය කරන බවත්, අනෙකුත් කාරක සභාවල සභාපතිවරුන්ගේ අවසරය ඇතිව එම කාරක සභා රැස්වීම් වල තොරතුරු පාර්ලිමේන්තුවේ සන්නිවේදන දෙපාර්තමේන්තුව හරහා මාධ්‍යයට නිකුත් කරන බවත් මහ ලේකම්වරයා වැඩි දුරටත් සදහන් කර ඇත.

Facebook Comments