දස වසරකටත් වැඩි කාලයක් තිස්සේ බලහත්කාරයෙන් අතුරුදහන් කොට සිටින සිය සමීපතමයන්ට අත්වු ඉරණම හෙළි කර ගැනීම සදහා ජාත්‍යන්තර මැදිහත්වීමක් ඉල්ලමින් උතුරු හා නැගෙනහිර ප්‍රදේශ කිහිපයකම විරෝධතා දියත් කර තිබේ.
උතුරු සහ නැගෙනහිර බලහත්කාරයෙන් අතුරුදහන් කරනු ලැබුවන්ගේ පවුල් වල ඥාතීන්ගේ සහභාගිත්වයෙන් අගෝස්තු 30 ඉරිදා අතුරුදහන් කරවීමට එරෙහි ජාත්‍යන්තර දිනයේ පැවැති විරෝධතා සදහා දේශපාලන පක්ෂ නියෝජිතයන්, සිවිල් සංවිධාන ක්‍රියාකාරීන්, ආගමික නායකයන් ඇතුලු පිරිස් සිය ගණනින් එක්වී සිටියහ.
යාපනය, කිලිනොච්චි, මුලතිව්, මන්නාරම මෙන්ම මඩකලපුව හා ත්‍රිකුණාමල දිස්ත්‍රික්ක වලත් විරෝධතා පැවති බව උතුරු, නැගෙනහිර වාර්තාකරුවෝ පවසති.
මඩකලපුව කල්අඩි පාලම අසලින් ආරම්භ කළ විරෝධතා පා ගමන, මඩකලපුව මහත්මා ගාන්ධි උද්‍යානය තෙක් පැමිණ විරෝධතාවය දියත් කර තිබේ.
පෙළපාලිය නවතා දැමීමට වෙර දරන පොලිසියේ නිලධාරියකු විසින් තම අතුරුදහන් සැමියාගේ එකම සේයා රුවත් පැහැර ගන්නා ලද බව විරෝධතාවයේ යෙදී සිටි එක් මාතාවක් සෝබරව කියා සිටියාය.
“අපි පෙළපාලියේ ඇවිදගෙන එද්දී මගේ මහත්තයා මුත්තුලිංගම් ඥානසෙල්වම්ගේ පොටෝ එක පොලිස් නිලධාරීයෙක් බලෙන් මගෙන් උදුර ගත්තා,” යි තම්බිරාසා සෙල්වරාණි පැවසුවාය.
“එයා දැන් මෙතන නෑ. මගේ මහත්තයාගේ ගෙදර තිබ්බ එකම පොටෝ එක. ඒක ලැබෙනකම් මට යන්න බෑ. මට ගෙදර ගිහින් නිදාගන්නත් බයයි”
විරෝධතාවය නතර කිරීම සදහා පොලීසිය විසින් අධිකරණ නියෝගයක් ගෙන තිබුනද එය නොතකා අතුරුදහන්වුවන්ගේ පවුල් වල ඥාතීන් සිය විරෝධතාවය ක්‍රියාත්මක කළ බව වාර්තාකරුවෝ පවසති.
උතුරු පළාතට අයත් යාපනය, කිලිනොච්චි, වව්නියා, මුලතිව් සහ මන්නාරම දිස්ත්‍රික්ක වල අතුරුදහන්වුවන්ගේ ඥාතීන් උදෑසන 11 ට යාපනය බස් නැවතුම්පොළ ඉදිරිපිටදී ආරම්භ කළ විරෝධතා පෙළපාලිය යාපනය දිස්ත්‍රික් ලේකම් කාර්යාලය දක්වා ගමන් කර එහිදී උද්ඝෝෂණයක් පවත්වා තිබේ.
එක්සත් ජාතීන්ට සංදේශයක්
අතුරුදහන් වුවන්ට යුක්තිය ඉල්ලා උතුරු සහ නැගෙනහිර බලහත්කාරයෙන් අතුරුදහන්කරවුවන්ගේ පවුල් වල ඥාතීන් විසින් එක්සත් ජාතින්ගේ මානව හිමිකම් මණ්ඩලය වෙත ඊමේල් මගින් සන්දේශයක් ද යොමු කර තිබු බව උතුරේ වාර්තාකරුවෝ වැඩි දුරටත් පවසති.
අතුරුදහන්වුවන් සොයා ගැනීම වෙනුවෙන් වසර 10 ට අධික කාලයක් රජයෙන් කළ ඉල්ලීම් සදහා මේ දක්වා කිසිදු සාධනීය ප්‍රතිචාරයක් ලැබී නොමැති බව පවසන විරෝධතාකරුවන් එහිදී සඳහන් කර ඇත්තේ සිය සමීපතමයන් සොයා ගැනීම වෙනුවෙන් ජාත්‍යන්තර මැදිහත්වීමක් අවශ්‍ය බවයි.
“ඔබේ හමුදාව විශ්වාස කරලා භාර දුන්න දරුවන් අතුරුදහන් වුයේ කෙසේද ?” යනුවෙන් දෙමළ සහ සිංහල බසින් ලියන ලද බැනරයක් ද අතුරුදහන්වුවන්ගේ ඥාතීන් සිය විරෝධතා පෙළපාලියට එක් කරගෙන තිබුනි.
අතුරුදහන්වුවන් වෙනුවෙන් රජය විසින් නිකුත් කිරීමට සුදානම් වන මරණ සහතිකය පිළිගැනීමට නොහැකි බවද එහිදී ඔවුන් අවධා‌රණය කර තිබේ.
මුලතිව් නගරයේ බස් නැවතුම් පොළ ඉදිරිපිටින් ආරම්භ කර දිස්ත්‍රික් ලේකම් කාර්යාලය දක්වා පා ගමනින් පැමිණ විරෝධතාවයේ නියැලුන අතුරුදහන්වුවන්ගේ පවුල් වල සාමාජිකයන් රජයට බල කර ඇත්තේ ත්‍රස්තවාදය වැළැක්වීමේ පනත වහාම අහෝසි කරන ලෙසයි.
OMP ‘සාකච්ඡාවක්’
පසුගිය රජය විසින් පිහිටුවන ලද අතුරුදහන් වූ තැනැත්තන් පිලිබඳ කාර්යාලය ( OMP) සිය සමීපතමයන් සොයා ගැනීම වෙනුවෙන් තුන් අවුරුද්දක් තිස්සේ කිසිදු සාධනීය පියවරක් ගෙන නැතිවීම සම්බන්ධයෙන් ඥාතීන්ගේ විරෝධයද පලවී තිබේ.
අතුරුදහන් වුවන් වෙනුවෙන් යහපාලන සමයේ ප්‍රසිද්ධියේ සමරු පැවැත්වූ OMP කාර්යාලය මේ අවුරුද්දේ සමාජ මාධ්‍ය ඔස්සේ කෙටි පණිවිඩයක් නිකුත් කරමින් ප්‍රකාශ කර තිබු පරිදි නම් නොකළ “අතුරුදහන් වීම් සම්බන්ධයෙන් කටයුතු කරන සංවිධාන සමග” හඳුනා නොගත් ස්ථානයකදී සාකච්ඡාවක් පවත්වා ඇත.
කුමක් සාකච්ඡා කළේදැ’යි OMP බලධාරීන් හෙළි කර නැත.
කිළිනොච්චි කන්දසාමි කෝවිල ඉදිරිපිටින් ආරම්භ කර A-9 මාර්ගය ඔස්සේ කිළිනොච්චි දිස්ත්‍රික් ලේකම් කාර්යාලය දක්වා පැමිණ විරෝධතාවයේ නියැලුන 500 ට අධික අතුරුදහන්වුවන්ගේ පවුල් වල ඥාතීන් එම විරෝධතාවය සදහා දේශපාලනඥයන් සහයෝගය නොදැක්වීම සම්බන්ධයෙන් සිය කනස්සල්ල පළ කළ බව වාර්තාකරුවෝ පවසති.
අතුරුදහන් කරවීමට එරෙහි ජාත්‍යන්තර දිනය සමරමින් ත්‍රිකුණාමලයේ ආණ්ඩුකාර ලේකම් කාර්යාලය ඉදිරිපිටත් විරෝධතාවයක් පවත්වා තිබේ.
අතුරුදහන් වුවන් මරණයට පත් වී ඇති බව ජනාධිපති ගෝඨාභය රාජපක්ෂ පවසා තිබියදී ජනමාධ්‍ය අමාත්‍ය කෙහෙළිය රඹුක්වැල්ල දෙමළ පුවත් පතකට කියා ඇත්තේ එයින් බාගයක්ම විදේශ ගතවී ඇති බවයි.
අනික් භාගය සම්බන්ධයෙන් ඔහු කිසිදු පැහැදිලි කිරීමක් කර නැත.
Facebook Comments
