“සුදු වෑන් යැවීම තවදුරටත් කරන්න බෑ” යැස්මින් සූකා

ශ්‍රී ලංකාවේ අතුරුදහන් කරනු ලැබුවන් පිළිබඳ සත්‍යය සොයා යාමට සම්බන්ධ වීම නිසා තරුණ දෙමළ ක්‍රියාධාරීන් පැහැරගැනීමට, වධහිංසනයට මෙන්ම ලිංගික දූෂණයට ගොදුරු වී ඇති බව අලුතින් හෙළි වී තිබේ.

දකුණු අප්‍රිකාව මුලස්ථාන කොටගත් ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP)විසින් අතුරුදහන් වූ තැනැත්තන් පිළිබඳ ජාත්‍යන්තර දිනය නිමිත්තෙන් නිකුත් කරන ලද වාර්තාව අනුව බ්‍රිතාන්‍යයේ පමණක් අඩුම වශයෙන් එවැනි වින්දිතයන් පහළොස් දෙනකුට දේශපාලන රැකවරණ ලැබී ඇත.

“යුද්ධය අවසන් වී දශකයකට වැඩි කලක් ගතව තිබියදීත්, යුද්ධයේදී සිය සොයුරු, සොයුරියන් අහිමිවූ බොහෝ දෙනකු ඇතුළු දෙමළ තරුණ, තරුණියන්ට සත්‍යය සොයා යාම නිසා දරුණු මිලක් ගෙවන්නට සිදු වී ඇතැ,” යි සත්‍යය හා යුක්තිය සඳහා වන ජාත්‍යන්තර ව්‍යාපෘතියේ (ITJP) විධායක අධ්‍යක්ෂිකා යැස්මින් සූකා පවසා තිබේ.

තම ස්නේහවන්තයන්ට සිදුවූයේ කුමක්ද යන්න දැනගැනීමේ උවමනාවෙන් පෙලෙන අයට හිංසා කරමින් ඔවුන් පසුපස සුදු වෑන් යැවීම තව දුරටත් කළ නොහැකි බව යැස්මින් සූකා සිය නිවේදනය මගින් ශ්‍රී ලංකාවේ ආණ්ඩුවට මතක් කර දී තිබේ.

බ්‍රිතාන්‍යයේ රැකවරණ ලැබුන’වුන් කැපී පෙනුණු මානව හිමිකම් ක්‍රියාධාරීන් නොවන අතර ඔවුහු නම් එක්රැස් කළ, විරෝධතා වලට උදව් කළ හෝ අතුරුදහන් වුවන්ගේ ඥාතීන්ට පැමිණිලි ගොනු කිරීම සඳහා ආධාර උපකාර කළ තරුණ තරුණියන් බව සති අන්තයේ නිකුත් කර තිබෙන නිවේදනයේ සදහන්ය.

තමන් මුහුණ පා සිටින බරපතල අවදානම ගැන ඒ කිසිවකුටත් කිසිදු අදහසක් තිබී නොමැති බව විධායක අධ්‍යක්ෂිකා යැස්මින් සූකා පෙන්වා දෙයි.

වධබන්ධන මාලාවක්

“එක් අයකුට කියා තිබුනේ යෞවනයකු වන ඔහු ගැන යුද හමුදාව උනන්දුවක් දක්වනු නැති බවයි. සිරකරගෙන සිටියදී ඔවුන්ට ආරක්ෂක අංශ අතින් විඳින්නට සිද්ධ වූයේ යටි පතුලට කස පහර දීම, ලිංගේන්ද්‍රිය තැලීම, සිගරට් වලින් පිළිස්සීම, ගිනියම් යකඩ පොල්ලෙන් හංවඩු ගැසීම, ජල හිංසනය, හුස්ම හිර කිරීම, පීඩාකාරී ඉරියව් වලින් එල්ලා තැබීම, බොරු ඝාතන සහ මරණ තර්ජන වලට අමතරව ලිංගික දූෂණය සහ කල්ලි දූෂණය වැනි කෘර වධබන්ධන වලටය.”

“මේ පවුල්වල අයිතියක් වන යුක්තිය ඉල්ලා බල කිරීමේදී ඔවුන් කිහිප වාරයක් වින්දිතයන් බවට පත් කොට තිබේ. එහි වගකීම මුළුමනින්ම ඇත්තේ සත්‍යය හෙළි කරගැනීමට කිසිදු උවමනාවක් නැති රාජ්‍යය අතය,” යි යැස්මින් සූකා පවසා තිබේ.

අතුරුදහන් වුවන් පිළිබඳ ITJP සංවිධානයේ වෙබ් අඩවිය 2009 මැයි 18දා හෝ ඊට ආසන්න දිනවලදී රජයේ අත් අඩංගුවේ දී අතුරුදහන් වූ බවට චෝදනා කෙරෙන දෙමළ 340 කගේ නම් සහ ඡායාරූප අඩංගු කෝෂ්ඨාගාරයක් බව පෙන්වා දෙන එම නිවේදනයේ වැඩි දුරටත් දැක්වෙන්නේ ඔවුන් ශ්‍රී ලංකා යුද හමුදාවට භාරවෙනු ඇසින් දුටු සාක්ෂිකරුවන් ගණනාවක් විදේශවල ජීවත් වන බවයි.

දරුවන් 29 දෙනකුද ඇතුළුව අතුරුදහන් වූ සිය ගණනකට සිදුවුයේ කුමක්ද යන්න පිලිබඳව ඔවුන් භාරවන අවස්ථාවේ එහි සිටි වර්තමාන හමුදාපති ශවේන්ද්‍ර සිල්වා ඇතුළු හමුදා සෙන්පතියන්ගෙන් අතුරුදහන් වූ තැනැත්තන් පිළිබඳ කාර්යාලය එකම වතාවකවත් ප්‍රශ්න කර නැති වීම පුදුම සහගත කරුණක් බව ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය පවසයි.

මැයි 18

ඔවුන් විසින් විමර්ශනය කරනු ලබන පළමු සිද්ධිය මැයි 18 අතුරුදහන් වීම් විය යුතු අතර එහි මුල් පියවර විය යුත්තේ මැයි 18 භාරවීම් පුද්ගලිකවම නිරීක්ෂණය කළ බව ඇසින් දුටුවන් පවසන ශවේන්ද්‍ර සිල්වා සහ ජගත් ජයසූරිය වැනි හමුදා නිලධාරීන්ගෙන් ප්‍රශ්න කිරීම බව අතුරුදහන් වූ තැනැත්තන් පිළිබඳ කාර්යාලයට 2018 මැයි මාසයේ ලිපියක් යවමින් ITJP කියා සිටි බව අගෝස්තු 30 දා නිකුත් කළ නිවේදනය මගින් සිහි ගන්වා තිබේ.

“එක දවසක, එකම තැනක සිය ගණනක් ජනතාව අතුරුදහන් වී දශකයකට වැඩි කාලයක් ගතවීත්, යුද හමුදාවේ කිසිවකුගෙන් ප්‍රශ්න කර නැතිවීම විකාරයකි. ඒ වෙනුවට සිදුවී ඇත්තේ යුක්තිය ඉල්ලා සිටින’වුන් තව දුරටත් වින්දිතයන් බවට පත් කිරීම,” යි යැස්මින් සූකා පවසන්නීය.

“සංක්‍රාන්ති යුක්ති ක්‍රියාදාමයක් ඇතිවෙතැයි සිතමින් යුක්තිය ඉල්ලා සිටි ඥාතීන් වෙනුවෙන් ජාත්‍යන්තර ප්‍රජාවට සදාචාරාත්මක වගකීමක් තිබේ. දේශපාලකයන් හා හමුදා නිලධාරීන්ට අතට අත දීමට පෙළ ගැසෙමින් අලුත් ආණ්ඩුවට සහාය පල කරනු වෙනුවට, කොළඹ ඉන්නා තානාපති නිලධාරීන් කළ යුත්තේ අතුරුදහන් වූවන්ගේ ඥාතීන් සහ ඔවුන්ගේ නිර්භීත නීතිඥයන් යෙදෙන සත්‍ය ගවේෂණය වෙනුවෙන් ඉදිරිපත් වී දිගටම සහාය පල කරනු පිණිස ඔවුන් සමග ඡායාරූප වලට පෙනී සිටීමය” ඇය වැඩි දුරටත් කියා සිටියාය.

කෙහෙළිය රඹුක්වැල්ලගේ අවමානය

අතුරුදහන් වූ තැනැත්තන් පිළිබඳ කාර්යාලය (OMP) ට ලැබුණු පැමිණිලිවල සඳහන් පුද්ගලයන් අතරින් භාගයක්ම සැබවින්ම පිටරට ජීවත් වන බව ජනමාධ්‍ය අමාත්‍ය කෙහෙළිය රඹුක්වැල්ල විසින් වින්දිතයන්ට මහත්සේ නිග්‍රහ කරමින් පිළිකුල් සහගත ලෙස පවසා ඇති බව ද වාර්තා වී ඇතැයි යැස්මින් සූකාගේ නායකත්වයෙන් යුත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP)නිකුත් කළ නිවේදනයේ වැඩි දුරටත් සඳහන්ය.

“අතුරුදහන් වූවන්ගේ ඥාතීන්ට අපහාස කරමින්, නිමක් නොපෙනෙන ඔවුන්ගේ සන්තාපයන් මහත් නිර්දය ලෙසින් හා අවඥාවෙන් බැහැර කරන අභූත ප්‍රකාශ සම්බන්ධයෙන් ඇමැතිවරයා දැඩි දෝෂ දර්ශනයට ලක් කළ යුතුය. හත්දහසකට වැඩි ජනකායක් විදේශගත වී සිය දරුවන් හෝ මව්වරුන් හා සම්බන්ධ වන්නට තරම් කරදර නොවී සිටියේ කෙලෙසද? ඔවුන් ආගිය අතක් නොමැති බව වාර්තා කොට හුදෙක් බලධාරීන්ගේ සෝදිසි කිරීම් සහ අඩන්තේට්ටම් වලට ගොදුරු වීමෙන් ඥාතීන් ලබන ලාබය කුමක්දැ,” යි යැස්මින් සූකා ප්‍රශ්න කළාය.

පුද්ගලයන් 14,461 ක ලිපි ගොනු ඔවුන් සතුව ඇති අතර තවත් පැමිණිලි 129 ක් අලුතින් ලැබුණු බව OMP කාර්යාලය එක්සත් ජාතීන්ගේ සංවිධානයට වාර්තා කර ඇති බව ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය නිකුත් කර තිබෙන නිවේදනයේ වැඩි දුරටත් සදහන්ය.